کراچی: (ویب ڈیسک)ڈیری مافیا نے عاشورہ پر دودھ کی طلب میں غیرمعمولی اضافے سے فائدہ اٹھانے کے لیے من مانی قیمت کی وصولی شروع کردی ہے۔عاشورہ کے موقع پر بڑے پیمانے پر نذرونیاز کے لیے دودھ سے شربت، کھیر اور لوازمات تیار کیے جاتے ہیں، دودھ فروشوں نے موقع سے فائدہ اٹھاکر دودھ کی قیمتوں میں ہوشربا اضافہ کردیا ہے، شہری انتظامیہ اور سندھ حکومت بدستور آنکھیں بند کیے بیٹھی ہے اور شہریوں کو نذرونیاز کے لیے دودھ کے حصول میں سخت دشواری کا سامنا ہے۔شہر کے بیشتر علاقوں میںدودھ کی دکانیں صبح اور شام کے مخصوص اوقات میں چند گھنٹوں کیلیے کھولی جاری ہیں اور زیادہ تر دودھ من مانی قیمت پر مخصوص دکانوں پر فروخت کیا جارہا ہے، دودھ کی سرکاری قیمت تاحال 94روپے لیٹر مقرر ہے تاہم شہر بھر میں غیرسرکاری قیمت 110روپے لیٹر رائج کردی گئی ہے عاشورہ کے دنوں میں قیمت 140روپے لیٹر تک پہنچادی گئی ہے۔

سرینگر (خصوصی رپورٹ) مقبوضہ وادی میں کرفیو کے باعث عائد غیر قانونی پابندیوں کی وجہ سے اب تک سینکڑوں خواتین بچوں کو جنم دیتے زندگی کی بازی ہار چکی ہیں۔ وادی میں تمام سرکاری ہسپتال عملی طور پر بند پڑے ہیں۔ کرفیو کے باعث کاروباری اداروں کے ساتھ نجی کلینک بھی بند ہیں۔ جس وجہ سے مریضوں خاص طور پر خواتین کو شدید تکلیف کا سامنا ہے حاملہ خواتین گھروں وضع حمل کیلئے تڑپتی رہتی ہیں۔ دیسی ٹوٹکوں کے ذریعے دایہ سے علاج کرانا بھی ممکن نہیں کہ نہ کوئی گھر سے نکل کر دائی کو بلا سکتی ہے نہ دایہ آ سکتی ہے خاص طور پر وہ خواتین جن کے کیس پیچیدہ ہوتے ہیں وہ کئی کئی روز تکلیف سے تڑپنے کے بعد جان دے دیتی ہیں جبکہ بچے بھی پیٹ میں ہی دم توڑ دیتے ہیں اور اگر وضع حمل ہوتا بھی ہے تو پیچیدگی کی وجہ سے بچے بھی پیٹ میں ہی یا پیدائش کے فوری بعد دم توڑ دیتے ہیں سینکڑوں نومولود دنیا میں آنے سے پہلے یا دنیا میں آتے ہی جان دے رہے ہیں۔ انسانی حقوق کی تنظیموں نے صورتحال پر گہری تشویش کا اظہار کیا ہے اور جاں بلب مریضوں کو ہسپتال میں علاج معالجہ کی سہولت فراہم کرنے کا مطالبہ کیا ہے۔

اسلام آباد:(ویب ڈیسک) وفاقی برائے سائنس اینڈ ٹیکنالوجی فواد چوہدری نے ایک روپے لیٹر پانی اور بائیو گیس پلانٹ کے بعد پانی کی اے ٹی ایم متعارف کرانے کا اعلان کردیا ہے۔نجی ویب سائٹ کو دیے گئے ایک انٹرویو میں ان کا کہنا تھا کہ 22 کروڑ کی آبادی کا پانچ فیصد حصہ بازار سے منرل واٹر خریدنے کی سکت رکھتا ہے، لہذا وہ پانی کی دکانوں کے ذریعے عام آدمی کو تقریباً ایک روپے فی لیٹر صاف پینے کا پانی فراہم کرنا چاہتے ہیں۔فواد چوپدری نے کہا کہ ہم نے ہر تحصیل سے پانی کے نمونے لیے ہیں اور ضرورت کی مناسبت سے وہاں پانی صاف کرنے والے پلانٹ لگائے جائیں گے۔وفاقی وزیر نے کہا ان پلانٹس کے پانی کی کوالٹی کسی بھی برانڈڈ بوتل والے منرل واٹر سے کم نہیں ہوگی اور اس کی قیمت پچھتر پیسے سے ایک روپیہ فی لیٹر ہو گی۔ان کا کہنا تھا کہ حکومت پانی بنانے کا کاروبار نہیں کرتی اور نہ کوئی ارادہ رکھتی ہے۔ حکومت احساس پروگرام سے ہر تحصیل کے لوگوں کو قرضہ دے گی تاکہ وہ علاقے کی سطح پر پانی کا کاروبار کر سکیں۔انہوں نے کہا یوں سمجھ لیں پانی کی دکانیں ہوں گی یا واٹر اے ٹی ایم ہوں گے جہاں سے لوگ پانی وصول لے سکیں گے۔خیال رہے اس سے قبل فواد چوہدری گھریلو استعمال کے لیے چھوٹے سائز کا بائیو گیس پلانٹ بنانے کا اعلان بھی کر چکے ہیں۔ وزارت سائنس اینڈ ٹیکنالوجی نے ایک گیزر کے سائز کا بائیو گیس پلانٹ بنایا ہے جو نامیاتی کچرا دان کے طور پر کام ا?ئے گا۔یونٹ کی قیمت تقریباً 35 ہزار روپے ہے جو 5 سے 6 افراد والے خاندان کی ضرورت کے لیے گیس پیدا کر سکے گا۔

اسلام آباد:(ویب ڈیسک) مسلم لیگ ن کے رہنما میاں جاوید لطیف نے تصدیق کرتے ہوئے کہا ہے کہ سابق وزیراعظم نواز شریف نے مولانا فضل الرحمان کو لانگ مارچ کی حمایت کا پیغام پہنچا دیا ہے۔نجی ٹی وی کو انٹرویو دیتے ہوئے ان کا کہنا تھا کہ ملک میں مہنگائی اور غیر یقینی کی صورتحال بڑھتی جا رہی ہے جس کے بعد سرمایہ کار ملک سے اپنا سرمایہ نکال کر جا رہا ہے۔انہوں نے کہا کہ جس طرح ذوالفقارعلی بھٹو کو ایٹم بم بنانے کی سزا دی گئی اسی طرح میاں نواز شریف کو ملک میں سی پیک جیسا بڑا اقتصادی منصوبہ لگانے کی سزا دی جا رہی ہے۔ان کا کہنا تھا کہ وزیراعظم عمران خان نے امریکہ جا کر مقبوضہ کشمیر، ایران پالیسی اور سی پیک جیسے ملکی مفادات کا سودا کیا ہے جس پر عوام مشتعل ہے۔لیگی رہنما نے کہا کہ اگر حزبِ اختلاف کے تمام اراکین قومی اسمبلی سے استعفیٰ دے دیں تو حکومت مجبور ہو جائے گی کہ وہ ملک میں نئے انتخابات کرائے۔گزشتہ روز ن لیگی رہنما کا کہنا تھا کہ ایسا لگتا ہے نوازشریف اغوا برائے تاوان والوں کے پاس ہیں۔ وہ کسی صورت ڈیل نہیں کریں گے اور انصاف کا دوہرا معیار ہونے کے باوجود عدالت سے رہا ہوں گے۔پرویز رشید نے کہا کہ ڈیل کی بحث کرنے والے خود نہیں جانتے کہ وہ کیا کہہ رہے ہیں اور بات طے ہے کہ ن لیگ کبھی بھی ڈیل کی صورت میں اپنی قیادت کی رہائی نہیں چاہتی۔پرویزرشید کے مطابق نوازشریف کو لندن میں پیغام ملے تھے کہ وہ واپس نہ ا?ئیں اور سیاست سے کنارہ کشی کر لیں لیکن ن لیگی قائد نے ایسا نہیں کیا۔کیا اپوزیشن تقسیم ہے؟ اس سوال کے جواب میں ن لیگی رہنما کا کہنا تھا کہ سینٹ انتخاب میں 14 لوگوں نے اپنا ضمیر بیچا جو افسوسناک ہے لیکن اپوزیشن جماعتیں متفق ہیں۔کیا ن لیگ مولانا فضل الرحمان کے ساتھ مارچ کرے گی؟ اس کے جواب میں پرویز رشید نے کہا کہ حزب اختلاف کی تمام جماعتیں اپنا اپنا حصہ ڈالیں گی۔

اسلام آباد (ویب ڈیسک) یوم عاشور 10 محرم الحرام آج نہایت عقیدت واحترام اور مذہبی رواداری کے ساتھ منایا جائے گا۔ ملک بھر میں مجالس عزا منعقد ہوں گی جبکہ علم، تعزیے اور ذوالجناح کے ماتمی جلوس نکالے جائیں گے۔شام کو مجالس شام غریباں برپا ہوں گی۔ سکیورٹی کے سخت انتظامات جبکہ موبائل سروس بند رکھی جائے گی۔ نواسہ رسول، جگر گوشہ بتول حضرت امام حسین اور شہدائے کربلا کو خراج عقیدت پیش کرنے کیلئے ملک بھر کے طول و عرض میں مجالس عزا، علم وتعزیہ اور ذوالجناح کے ہزاروں جلوس برآمد ہوں گے جس میں لاکھوں کی تعداد میں عزادار شامل ہو کر ماتم داری اور نوحہ خوانی کرکے اپنا پرسہ پیش کریں گے۔