لاہور (مانیٹرنگ ڈیسک) کالم نگار اعجازحفیظ نے کہا کہ مودی نے بھارت کو آتش فشاں کے دہانے پر کھڑا کر دیا خود بھارت میں احتجاج ہو رہا ہے۔ پوری دنیا میں بھارت تنہائی کا شکار ہو گیا ہے ۔ہونا تو یہ چاہئے بھارت پر فوری پابندیاں لگائیں جائیں۔ چینل فائیو کے روگرام کالم نگار میں گفتگو کرتے ہوئے انہوں نے کہا کہ بھارت بہت جلد کشمیریوں پر ظلم کے نتائج بھگتے گا ۔کشمیر اور پاکستان کبھی بھی الگ الگ نہیں رہ سکتے ۔لداخ پر چین بھی سٹیک ہولڈر ہے اب یہ آگ جنگل کی آگ بن گئی ہے بھارت اس میں جلے گا اور سنبھل نہیں پائے گا۔انہوں نے کہا مفتاح اسماعیل کی گرفتاری مثبت اقدام ہے۔ کالم نگارناصر اقبال بھارت نے ہمیشہ حماقتیں کر کے بکھرے پاکستانیوں کو یکجا کیا مقبوضہ کشمیر میں ظالمانہ بھارتی اقدام کے بعد پاکستان کی بڑی سیاسی جماعتیں یکجا ہو گئیں ہیں پھر پوری دنیا بھارتی اقدام پر حیران ہے کیونکہ بھارت نے کھلم کھلا اقوام متحدہ کی قراردادوں کی خلاف ورزی کی ہے۔ظلم جب بھی حد سے بڑھتا ہے ختم ہو جاتا ہے بھارت کی طرف سے کشمیر میں ظلم و جبر بڑھتا جا رہا ہے جسے پوری دنیا دیکھ رہی ہے۔اب ہمیں اندرونی خلفشار ختم کرنا ہو گی تاکہ دشمن کو حوصلہ شکن جواب جائے۔مفتاح اسماعیل کی گرفتاری سے ثابت ہو گیا پاکستان قانون کی حکمرانی کی طرف بڑھ رہا ہے۔مریم نواز سمیت کوئی بھی احتساب سے ماورا نہیں۔ کالم نگارراجہ وحید نے کہا کہ تاریخ اٹھا لیں جتنی قربانیاں کشمیریوں نے دی ہیں دنیا میں کسی نے نہیں دیں۔قومی سلامتی کمیٹی کا اعلانیہ پاکستانیوں اور کشمیریوں کے دل کی آواز تھی ۔بھارت سے فوری تجارت ختم کرنی چاہئے اس سے پاکستان کو نقصان نہیں ہو گا۔مودی غلط شاٹ کھیل گیا ہے جس کا خمیازہ بھارت کو بھگتنا پڑے گا۔ بھارت نے پاکستان کی شہ رگ پر حملہ کیا ہے ،میرے خیال میں اپوزیشن اور حکومت کشمیر ایشو پر یکجا ہو کر اقدامات کریں رنجشیں بھلا دیں تاکہ پوری دنیا کو پاکستان کی طرف سے مثبت پیغام جائے اور بھارتی مکروہ چہرہ مزید عیاں ہو اب ہمیں خاموشی توڑ کر بھارتی لابی کو ناکام بنانے کی ضرورت ہے۔ہمیں پوری دنیا میں بہترین سفارتکاری کی ضرورت ہے۔ انہوں نے کہا کہ پاکستان میں احتساب کا سلسلہ رکنا نہیں چاہئے۔ کالم نگارمیاں حبیب نے کہا کہ قومی سلامتی کمیٹی کے اجلاس میں انتہائی اہم فیصلے کئے گئے ہیں۔کشمیری بھی بھارتی اقدام پر سراپا احتجاج ہیں۔میرے خیال میں بھارتی اقدام کے نتیجے میں پاکستان کے اقدامات بھی درست ہیں قومی سلامتی کمیٹی کے اجلاس میں جو کہا گیا اس پر فوری عمل ہوناچاہئے۔خوش آئند بات یہ ہے قوم اس ساری صورتحال میں متحد ہے ۔وزیراعظم عمران خان نے اپنی تقریر میں بڑی مدلل باتیں کیں اور دشمن کو واضح پیغا م دیا۔

لاہور (مانیٹرنگ ڈیسک) چینل ۵ کے تجزیوں اور تبصروں پر مشتمل پروگرام ”ضیا شاہد کے ساتھ“ میں گفتگو کرتے ہوئے کہنہ مشق صحافی ضیا شاہد نے کہا ہے کہ اپوزیشن کا توکام ہی حکومت پر تنقید کرنا ہوتا ہے۔ آصف زرداری ہو یا شہباز شریف حکومت کے خلاف باتیں تو انہوں نے کرنا ہی تھیں۔ موجودہ صورتحال میں بھارت کے مذموم اقدامات کے بعد امریکہ اگر پاکستان کے حق میں کوئی عملی قدم اٹھاتا ہے تو یہ سمجھا جائے گا کہ وزیراعظم کا دورہ امریکہ کامیاب رہا اور توقعات درست ثابت ہوئیں اگر ایسا نہیں ہوتا تو پھر اپوزیشن کے موقف کو ٹھیک سمجھا جائے گا۔ پاکستان نے بھارت کے خلاف بالکل درست ردعمل دیا ہے حکومت تمام مسلم ممالک سے بھی مطالبہ کرے کہ بھارت کے ساتھ سفارتی تعلقات کو محدود کریں اگر ایسا ہو جائے تو اس کا بڑا اثر پڑے گا۔ مسلم بلاک دنیا میں بہت بڑا ہے بھارت کبھی اس سے لڑائی مول نہیں لے سکتا۔ یہ واضح کرنے کی ضرورت ہے کہ بھارت اگر فیصلے واپس نہیں لیتا تو مسلمان ملک اس کے خلاف صف آرا ہوں گے۔ بدقسمتی ہے کہ عالم اسلام کی ایک ہی لیڈر شپ ایسی نہیں جو بھارت کو کچھ کہہ سکے اوآئی سی بھی عملاً عضو معطل ہی ہے اس کے باوجود ہم توقع کرتے ہیں کہ خون مسلم اپنا رنگ دکھائے گا اور آہستہ آہستہ تمام مسلم ممالک کے ساتھ ساتھ انسانی حقوق پر یقین رکھنے والے ممالک بھی اٹھ کھرے ہوں گے اور کشمیر میں جاری ظلم کیخلاف بات کریں گے۔ بی جے پی کے ایک ایم ایل اے کچھ عرصہ قبل کشمیری خواتین کے حوالے سے بڑے بیہودہ اور فضول بیانات دیتے تھے اب اسی طرح کے عناصر کو مزید چھوٹ مل گئی ہے۔ بھارتی نواز محبوبہ مفتی کو بھی بالآخر کہنا پڑا کہ دو قومی نطریہ درست تھا ان کا بیان ظاہر کرتا ہے کہ اب وادی میں بڑے پیمانے پر ردعمل آئے گا اس طرح بھارت میں بھی بڑا ردعمل سامنے آئے گا، ہندو انتہا پسندوں کی خرافات سامنے آئیں گی اور پھر ان پر ردعمل بھی سامنے آئے گا۔ بھارت میں ہندوﺅں نے پیسے دے کر کسی مولوی سے فتویٰ جاری کرایا ہے کہ عید کے اجتماعات برے پیمانے پر کسی کھلی جگہ کرنا ضروری نہیں ہے حالانکہ یہ بالکل غلط ہے۔ کیونکہ نبی پاک کی زندگی سے لے کر آج تک عید کے اجتماعات ہمیشہ شہروں سے باہر بڑے پیمانے پر کئے جاتے رہے۔ اسی طرح کے جعلی فتوﺅں کی کوئی اہمیت نہیں ہے۔ بھارت کی کوشش ہے کہ جموں کشمیر میں مسلمانوں اور ہندوﺅں کی آبادی کا تناسب بدل دیا جائے۔ جموں میں ہندوﺅں کی کافی تعداد ہے وہاں مزید بسائے جائیں گے۔ اسی طرح کشمیر میں جہاں مسلمانوں کی بڑی اکثریت ہے وہاں بھی ہندو لا کر بسانے کا پروگرام ہے۔ ہندوﺅں کو زمین جائیداد مکان خریدنے کی اجازت اور کاروبار میں سہولتیں دی جائیں گی۔