لاہور (ویب ڈیسک)نوجوان ٹیسٹ کرکٹر فواد عالم ان بدقسمت کھلاڑیوں میں صف اول ہیں جنہیں گزشتہ کچھ سالوں میں تواتر کے ساتھ عمدہ کارکردگی دکھانے کے باوجود بھی قومی ٹیم کا حصہ نہیں بنایا گیا۔مستقل کارکردگی کے باوجود بائیں ہاتھ کے بلے باز کو ٹیم کا حصہ نہ بنانے پر کئی مواقعوں پر شائقین کرکٹ اور سابق کرکٹرز کی جانب سے انہیں ٹیم میں شامل کرنے کا مطالبہ کیا گیا لیکن تمام سلیکٹرز کی جانب سے انہیں نظرانداز کرنے کا سلسلہ جاری رکھا۔فواد عالم کو ٹیم سے مستقل نظر انداز کیے جانے پر سوشل میڈیا پر شائقین نے فواد عالم کے حق میں ٹوئٹ کرتے ہوئے فواد عالم ایکسپوزڈ(fawadalamexposed) کے نام سے ہیش ٹیگ بنایا۔ابتدائی طور پر ٹرینڈ کو دیکھ کر ایسا لگا کہ شاید فواد عالم کا بھی کوئی اسکینڈل منظر عام پر آ گیا ہے تاہم چند ٹوئٹس کے بعد ہی یہ بات واضح ہو گئی کہ ٹیسٹ کرکٹر کے مداحوں نے اپنے پسندیدہ کرکٹر کے ساتھ ہونے والی زیادتی کو اجاگر کرنے کے لیے اس طرح سے ٹرینڈ بنایا۔شائقین کرکٹ کا ماننا ہے کہ فواد عالم کو سیاست کی نذر کردیا گیا اور بہترین کارکردگی کے باوجود بھی انہیں مستقل نظرانداز کرتے ہوئے ٹیم کا حصہ نہیں بنایا گیا۔جہاں کچھ لوگوں نے فواد کو ٹیم میں شامل کرنے کا مطالبہ کیا تو وہیں چند نے ان کا چیف سلیکٹر انضمام الحق کے بھتیجے امام الحق سے موازنہ بھی کیا۔حمزہ خان نے لکھا کہ فواد عالم ایک بہترین کھلاڑی ہیں لیکن انہیں نظرانداز کیا گیا، وہ قومی ٹیم میں جگہ پانے کے مستحق ہیں۔کچھ ٹوئٹر صارفین نے فواد کے اعدادوشمار شیئر کیے تو چند نے دلچسپ تبصروں اور تصاویر کے ساتھ پاکستان کرکٹ بورڈ کو تنقید کا نشانہ بنایا۔علی اکبر نے لکھا کہ ٹیسٹ کرکٹ میں 41 اور ون ڈے میں 40 کی اوسط سے لیکن اس لڑکے کے پاس پرچی نہیں۔عامر بنگش نے تبصرہ کیا کہ اب تک فواد عالم فرسٹ کلاس کرکٹ میں 10ہزار 172 رنز بنا چکے ہیں لیکن حیران کن طور پر پی سی بی کے سینٹرل کنٹریکٹ کی کسی بھی کیٹیگری میں ان کی جگہ نہیں بنتی۔واضح رہے کہ اپنے ٹیسٹ ڈیبیو پر 168رنز کی شاندار اننگز کھیلنے والے فواد عالم کئی سالوں سے ڈومیسٹک کرکٹ میں تواتر سے رنز کرتے آ رہے ہیں لیکن اس کے باوجود سلیکٹرز کی جانب سے انہیں بغیر کسی وجہ کے نظرانداز کیے جانے کا سلسلہ جاری ہے۔اب چیف سلیکٹر انضمام الحق مزید یہ ذمے داری نبھانے سے معذوری ظاہر کر چکے ہیں تو امید ہے کہ نئے چیف سلیکٹر اس نوجوان کرکٹر کے زخموں کا مداوا کرتے ہوئے انہیں ٹیم کا حصہ بنائیں گے۔

لاہور (ویب ڈیسک)قومی کرکٹ ٹیم کے فاسٹ باﺅلر محمد عامر نے ٹیسٹ کرکٹ سے ریٹائرمنٹ کا اعلان کردیا تاہم وہ ایک روزہ اور ٹی ٹوئنٹی کرکٹ میں قومی ٹیم کی نمائندگی کرتے رہیں گے۔پاکستان کرکٹ بورڈ (پی سی بی) کی جانب سے جاری کیے گئے بیان میں محمد عامر نے کہا کہ ’کرکٹ کے روایتی فارمیٹ میں قومی ٹیم کی نمائندگی کرنا میرے لیے اعزاز تھا‘۔انہوں نے کہا کہ ’میں نے ٹیسٹ کرکٹ سے ریٹائرمنٹ کا فیصلہ کیا ہے تاکہ ون ڈے اور ٹی ٹوئنٹی کرکٹ پر توجہ مرکوز کرسکوں‘۔محمد عامر نے کہا کہ ’میرا اصل مقصد قومی ٹیم کی نمائندگی کرنا ہے اور مستقبل میں مختلف میچز اور آئندہ برس آئی سی سی ٹی 20 ورلڈ کپ میں اپنا بہترین کردار ادا کرنے کی کوشش کروں گا‘۔ان کا کہنا تھا کہ ’وہ کچھ عرصے سے ریٹائرمنٹ سے متعلق سوچ رہے تھے لیکن ٹیسٹ کرکٹ سے ریٹائرمنٹ کا فیصلہ آسان نہیں تھا‘۔محمد عامر نے کہا کہ ’آئی سی سی ورلڈ ٹیسٹ چیمپئن شپ قریب ہے اور پاکستان میں بہترین نوجوان فاسٹ باﺅلرز موجود ہیں اس لیے بہتر ہے کہ میں ریٹائر ہوجاو¿ں تاکہ سلیکٹرز انہیں قومی ٹیم میں جگہ دے سکیں‘۔انہوں نے ٹیسٹ کرکٹ میں اپنی ٹیم کے تمام ساتھی کھلاڑیوں اور مخالفین کا بھی شکریہ ادا کیا اور کہا کہ ان کے ساتھ ٹیسٹ کرکٹ کھیلنا ایک اعزاز تھا۔فاسٹ باﺅلر محمد عامر نے مزید کہا کہ میں امید کرتا ہوں کہ ہم اسی عزم اور حوصلے کے ساتھ محدود دورانیے کی کرکٹ بھی کھیلتے رہیں گے۔محمد عامر نے کہا کہ ’مجھے اپنے سینے پر گولڈن اسٹار لوگو لگانے کا موقع فراہم کرنے پر پاکستان کرکٹ بورڈ کا مشکور ہوں‘۔ان کا کہنا تھا کہ میں اپنے تمام کوچز کا بھی شکر گزار ہوں جنہوں نے میرے کیرئیر کے مختلف مراحل میں رہنمائی کی۔محمد عامر نے جولائی 2009 میں سری لنکا کے خلاف میچ سے اپنے ٹیسٹ کیرئیر کا آغاز کیا تھا، انہوں نے 36 ٹیسٹ میچز میں 30.47 اوسط سے 119 وکٹیں حاصل کیں۔انہوں نے اپریل 2017 میں کنگسٹن میں ویسٹ انڈیز کے خلاف 44 رنز کے عوض 6 وکٹیں حاصل کرکے بہترین پرفارمنس دکھائی تھی۔ٹیسٹ کرکٹ سے محمد عامر کی ریٹائرمنٹ کے فیصلے پر پی سی بی کے مینیجنگ ڈائریکٹر وسیم خان نے کہا کہ ’عامر کا شمار ٹیسٹ کرکٹ میں موجودہ دور کے بہترین فاسٹ باﺅرز میں ہوتا ہے‘۔انہوں نے کہا کہ ’بطور نوجوان کرکٹر محمد عامر نے مشکلات پر قابو پایا اور نہ صرف ایک کرکٹر بلکہ ایک بہتر انسان بھی بنے‘۔ایم ڈی پی سی بی نے کہا کہ۔قومی ٹیسٹ کرکٹ ٹیم میدان اور ڈریسنگ روم میں ان کی کمی محسوس کریں گے‘۔محمد وسیم نے کہا کہ ’ ہم محمد عامر کے فیصلے کا احترام کرتے ہیں اور امید ہے وہ کرکٹ کے دیگر فارمیٹ میں اپنا اہم کردار ادا کرتے رہیں گے‘۔