میزائل تجربہ جنوبی کوریا کو ”سنجیدہ تنبیہ“ ہے، شمالی کوریا کی دھمکی

پیانگ یانگ(ویب ڈیسک) شمالی کوریا کے سربراہ کم جونگ اُن نے حالیہ میزائل تجربے کو جنوبی کوریا کے لیے ایک ’سنجیدہ وارننگ‘ قرار دیا ہے۔عالمی خبر رساں ادارے کے مطابق شمالی کوریا نے جدید اور خطرناک میزائل کا کامیاب تجربہ کیا ہے جس کی نگرانی مملکت کے سربراہ کم جونگ اُن نے خود کی اور جنوبی کوریا کو مخاطب کرتے ہوئے دھمکی دی کہ یہ میزائل تجربہ ایک سنجیدہ انتباہ ہے۔سربراہ شمالی کوریا نے مزید کہا کہ نیا میزائل تجربہ جنوبی کوریا کی بڑھتی ہوئی اسلحہ سازی اور امریکا کے ساتھ مشترکہ فوجی مشقوں کے تناظر میں کیا گیا ہے اور اسے جنگی عزائم سے باز رہنے کے لیے ایک تنبیہ بھی ہے۔دوسری جانب جنوبی کوریا نے اس حوالے سے کوئی ردعمل نہیں دیا تاہم اسلحے کی تیاری اور امریکا کے ساتھ فوجی مشقوں کو اپنا داخلی معاملہ قرار دیتے ہوئے کہا کہ جارحیت پسندوں سے دفاع کے لیے ایسا کرنا ملکی سلامتی کے لیے اشد ضروری ہے۔ادھر امریکی وزیر خارجہ مائیک پومپیو نے کم جونگ اُن کی دھمکی کو نظر انداز کرتے ہوئے ایک بار پھر امریکا اور شمالی کوریا کے درمیان مذاکرات کی بحالی کی امید ظاہر کی ہے جو کہ ویتنام میں دونوں ممالک کے سربراہان کی بے نتیجہ ملاقات کے بعد سے تعطل کا شکار ہیں۔