میسی آنسوؤں کے ساتھ رخصت، ارجنٹینا کیلئے آخری میچ میں شاندار کارکردگی

لیونل میسی نے ارجنٹینا کی قومی ٹیم کیلئے اپنے 21 سالہ شاندار انٹرنیشنل کیریئر کا اختتام جذباتی انداز میں کیا۔ بینن کے خلاف اپنے آخری میچ میں میسی نے ایک گول اور دو اسسٹس کی مدد سے ارجنٹینا کو 3-0 سے کامیابی دلائی۔ بیونس آئرس کے مونومینٹل اسٹیڈیم میں 85 ہزار سے زائد شائقین نے میسی کو الوداع کہا۔ میچ سے قبل ٹیم بس کے راستے میں موجود مداحوں کو دیکھ کر میسی کی آنکھوں میں آنسو آگئے، جبکہ اسٹیڈیم میں بھی انہیں بھرپور خراجِ تحسین پیش کیا گیا۔ میچ کے پہلے ہاف میں کوئی گول نہ ہوسکا، تاہم دوسرے ہاف میں میسی نے نکولس اوتامندی کو پہلا گول کرنے کیلئے اسسٹ فراہم کی۔ اس کے بعد انہوں نے نوجوان کھلاڑی نیکو پاز کو دوسرا گول کرنے میں مدد دی، جبکہ 71ویں منٹ میں پنالٹی پر خود گول کرکے ارجنٹینا کی برتری 3-0 کردی۔ یہ ان کا قومی ٹیم کیلئے 126واں گول تھا۔ میسی نے میچ کے بعد جذباتی گفتگو میں کہا کہ ارجنٹینا کی جرسی پہننا ان کیلئے 20 سال سے زائد عرصے تک بہت بڑے فخر کی بات رہی اور قومی ٹیم کیلئے مزید نہ کھیلنا ان کیلئے تکلیف دہ ہوگا۔ میسی نے ارجنٹینا کی جانب سے 208 میچز کھیلے اور قومی ٹیم کے سب سے زیادہ میچ کھیلنے والے اور سب سے زیادہ گول کرنے والے کھلاڑی کے طور پر الوداع کہا۔ ان کے دور میں ارجنٹینا نے 2021 کوپا امریکا اور 2022 ورلڈ کپ سمیت اہم عالمی اعزازات اپنے نام کیے۔ میچ کے اختتام پر ڈرون شو، آتش بازی اور شائقین کی جانب سے بھرپور خراجِ تحسین کے ساتھ میسی کو رخصت کیا گیا، جبکہ ان کے ساتھی کھلاڑی اور مخالف ٹیم کے ارکان بھی ان کے گرد جمع ہوگئے۔