سائبر سکیورٹی اب ہر شہری کے تحفظ کا معاملہ ہے: شزہ فاطمہ

اسلام آباد (این این آئی)وفاقی وزیر برائے آئی ٹی و ٹیلی کمیونیکیشن شزہ فاطمہ خواجہ نے کہا ہے کہ جدید سائبر فراڈ اور ڈیجیٹل اسکیمز سے معاشرے کا کوئی بھی طبقہ محفوظ نہیں رہا، حتیٰ کہ ان کے اپنے والد کو بھی مصنوعی ذہانت (اے آئی) کے ذریعے کزن کی وائس کلوننگ اور اغوا کے جھوٹے ڈرامے کے تحت تاوان کی کال موصول ہوئی۔جمعرات کو یہاں پی ٹی اے اور یو این ڈی پی کے زیرِ اہتمام منعقدہ تقریب سے خطاب میں وفاقی وزیر نے اپنا ذاتی واقعہ بیان کرتے ہوئے کہا کہ چند روز قبل ان کے والد کو ایک شدید پریشان کن کال آئی جس میں کال کرنے والے نے ان کے کزن احمد کی آواز بنا کر بات کروائی۔ کال پر دعویٰ کیا گیا کہ احمد کو حراست میں لیا گیا ہے اور ایف آئی آر سے بچنے کے لیے فوری طور پر رقم ٹرانسفر کی جائے۔انہوں نے بتایا کہ اس جعلی کال میں جعل سازوں کے پاس ان کے خاندان کے بارے میں تمام حساس معلومات موجود تھیں، انہیں معلوم تھا کہ احمد کون ہے، وہ ان کے والد کو کس نام سے پکارتا ہے، اس کے کتنے بہن بھائی ہیں اور اس کی روزمرہ کی نقل و حرکت کیا ہے۔ وفاقی وزیر نے کہا کہ خوش قسمتی سے وہ اس نوعیت کے دیگر واقعات سے پہلے ہی باخبر تھیں جس پر انہوں نے فوری طور پر کزن سے رابطہ کر کے اس کی خیریت دریافت کی اور فراڈ ناکام بنا دیا لیکن جعل سازوں کی معلومات اتنی مکمل تھیں کہ ایک عام انسان آسانی سے دھوکہ کھا سکتا ہے۔