القائم مل کے قریب تیز رفتار ہائی ایس اور کیری وین میں تصادم

تلہ گنگ(نمائندہ خبریں )تلہ گنگ چکوال روڈ القائم مل کے قریب تیز رفتار ہائی ایس اور کیری وین میں تصادم، 7 افراد زخمی، ریسکیو 1122 کا بروقت رسپانس تلہ گنگ سے چکوال روڈ پر القائم مل کے قریب تیز رفتار ہائی ایس اور کیری وین کے درمیان تصادم ہو گیا ہے، جس کے نتیجے میں متعدد افراد زخمی ہو گئے ہیں جبکہ ایک شخص کیری وین میں پھنس گیا  ہے۔اطلاع موصول ہوتے ہی ریسکیو 1122 نے فوری کارروائی کرتے ہوئے قریبی پوائنٹ تلہ گنگ سے دو ایمبولینسز جبکہ سینٹرل اسٹیشن چکوال سے ریسکیو وہیکل جائے حادثہ کی جانب روانہ کر دی۔ ریسکیو ٹیموں نے موقع پر پہنچ کر امدادی کارروائیاں شروع کیں اور کیری وین میں پھنسے ہوئے شخص کو بحفاظت نکال لیا، جس کے بعد ریسکیو وہیکل کو واپس بلا لیا گیا۔ابتدائی اطلاعات کے مطابق حادثہ تیز رفتاری کے باعث پیش آیا۔ ہائی ایس تلہ گنگ سے راولپنڈی جا رہی تھی جبکہ کیری وین چکوال سے تلہ گنگ کی جانب رواں دواں تھی۔ حادثے کے نتیجے میں مجموعی طور پر 7 افراد زخمی ہوئے۔ریسکیو 1122 کی جانب سے زخمیوں کو طبی امداد فراہم کرنے کے بعد سٹی ہسپتال تلہ گنگ منتقل کر دیا گیا ہے