پاکستان کی سابق کپتان اور لیجنڈری کرکٹر سنا میر کیلئے بڑا اعزاز سامنے آیا ہے، کینیڈا سپر 60 ویمنز ٹورنامنٹ کی ٹرافی ان کے نام سے منسوب کردی گئی ہے۔
کینیڈا سپر 60 کے 2026 ایڈیشن میں ویمنز ٹرافی کا نام سنا میر ٹرافی رکھا گیا، جو پاکستان کی سابق کپتان کی عالمی کرکٹ میں خدمات اور خواتین کرکٹ کے فروغ کیلئے ان کی کاوشوں کا اعتراف ہے۔ سنا میر پاکستان کی پہلی خاتون کرکٹر ہیں جنہیں آئی سی سی ہال آف فیم میں شامل کیا گیا۔
ٹورنامنٹ کے فائنل مرحلے میں ٹورنٹو سکسز نے وینکوور واریئرز کو شکست دے کر ویمنز ٹائٹل اپنے نام کیا اور فاتح ٹیم کو سنا میر ٹرافی پیش کی گئی۔
سنا میر نے پاکستان کیلئے 15 سالہ شاندار بین الاقوامی کیریئر گزارا۔ انہوں نے 121 ون ڈے میچز میں 150 وکٹیں جبکہ 106 ٹی20 انٹرنیشنل میچز میں 89 وکٹیں حاصل کیں۔ وہ 2018 میں آئی سی سی ون ڈے ویمنز بولنگ رینکنگ میں پہلی پوزیشن بھی حاصل کرچکی ہیں۔
