عمان نے آبنائے ہرمز کے قریب حملے کا نشانہ بننے والے پاناما کے پرچم بردار آئل ٹینکر ’’آن پیس‘‘ (ON PEACE) کے 10 اہلکاروں کو طبی امداد کیلئے بحفاظت نکال لیا۔ عمانی حکام کے مطابق ٹینکر کو منگل کے روز مسندم گورنری کے علاقے لیما سے تقریباً 9 بحری میل شمال مشرق میں نشانہ بنایا گیا، جس کے نتیجے میں جہاز میں آگ بھڑک اٹھی۔ رائل عمان ایئر فورس نے متعلقہ اداروں کے تعاون سے 10 اہلکاروں کو فضائی راستے سے نکال کر خصب اسپتال منتقل کیا، جہاں انہیں طبی امداد فراہم کی گئی۔ بھارتی وزارت خارجہ کے مطابق ٹینکر پر مجموعی طور پر 19 افراد کا عملہ موجود تھا، جن میں 17 بھارتی شہری شامل تھے۔ ایک نامعلوم پروجیکٹائل کی زد میں آنے کے نتیجے میں 12 اہلکار زخمی ہوئے، جن میں 11 بھارتی شہری ہیں۔ حملے کی ذمہ داری تاحال کسی گروپ نے قبول نہیں کی۔ عمانی حکام نے حملے کی نوعیت، ذمہ دار فریق اور متاثرہ اہلکاروں کی حتمی حالت کے حوالے سے مزید تفصیلات فراہم نہیں کیں۔ یہ واقعہ ایسے وقت پیش آیا ہے جب آبنائے ہرمز میں تجارتی جہازوں کی سکیورٹی صورتحال مسلسل تشویش کا باعث بنی ہوئی ہے
آبنائے ہرمز کے قریب ٹینکر پر حملہ عمان نے 10 اہلکاروں کو ریسکیو کرلیا
