لاہور(ویب ڈیسک)رواں برس پاکستانی فلموں کے حوالے سے بہت اچھا رہا ہے کیوں کہ اب تک سینما گھروں میں گیارہ فلمیں ریلیز ہوچکی ہیں۔اور اس سے بھی اچھی بات یہ ہے کہ ان میں سے نصف کو کامیابی نصیب ہوئی۔پاکستانی سینما گھروں میں بھارتی فلموں پر لگی پابندی کے باوجود پاکستانی فلمیں شائقین کو سینما گھروں تک لانے میں کامیاب رہی ہیں جو کہ ایک خوش آئندہ بات ہے۔ماہ جولائی میں بھی چار پاکستانی فلمیں ریلیز کے لئے پیش کی جارہی ہیں، ذیل میں ان کا تعارف موجود ہے:
ریڈی اسٹیڈی نو
انیس جولائی کو پاکستان بھر میں ریلیز کی جانے والی ریڈی اسٹیڈی نو ایک رومانوی کامیڈی فلم ہے۔فلم کی کاسٹ میں آمنہ الیاس فیصل سیف، سلمان شاہد نمایاں ہیں۔ فلم کے لکھاری و ہدایت کار ہشام بن منور ہیں۔ریڈی اسٹیڈی نو کا بجٹ پانچ کروڑ بتایا جارہا ہے۔
تم ہی تو ہو
نامور ہدایت کارہ سنگیتا کی فلم تم ہی تو ہو کو دسمبر 2016 میں ریلیز ہونا تھا مگر چند وجوہات کی بنا پر یہ فلم تاخیر کا شکار ہوئی اور اب اس فلم کو 19 جولائی کو پیش کیا جارہا ہے۔فلم کی نمایاں کاسٹ میں دانش تیمور، قرت العین اور متھیرا ہیں۔ فلم پر کل چھ کروڑ روپے لاگت آئی ہے۔
تیور
لکھاری و ہدایت کار ابوعلیحہ کی ریونج تھرلر فلم عارفہ کے نام سے 2017 میں ریلیز ہونا تھی جسے اب تیور نام سے بدل دیا گیا۔فلم اب 26 جولائی کو ریلیز ہوگی۔یاد رہے کہ ابوعلیحہ نے رواں برس ماہ جون میں کتاکشا جیسی ہٹ فلم سے فلمی دنیا میں قدم رکھا۔تیور کی نمایاں کاسٹ میں سکینہ خان، تقی احمد اور متھیرا شامل ہیں۔ فلم کا بجٹ محض 75 لاکھ ہے۔ یاد رہے کہ ابوعلیحہ کی ہارر فلم کتاکشا کا بجٹ بھی 95 لاکھ تھا جس نے باکس آفس پر دوکروڑ سے زائد کا بزنس کیا۔
راﺅنڈ اباوٹ
اداکار و ہدایت کار ارباز خان کی ایکشن فلم راﺅنڈ اباوٹ بھی 26 جولائی کو پاکستان بھر میں ریلیز ہورہی ہے۔فلم کی نمایاں کاسٹ میں ارباز خان کے علاوہ ماہی خان اور افتخار ٹھاکر شامل ہیں۔ فلم کا کل بجٹ سوا دو کروڑ روپے بتایا جارہا ہے۔فلم کی کہانی رومانوی ہے تاہم اس میں ایکشن بھی خوب دکھایا جائے گا۔
