بیجنگ/ووہان /واشنگٹن /نئی دہلی /تہران/ سڈنی (نیٹ نیوز)چین کے شہر ووہان سے جنم لے کر دنیا کے 200 سے زائد ممالک اور خطوں تک پھیلنے والی خطرناک نوول کرونا وائرس وباءکے باعث دنیا بھر میں متاثر افراد کی تعداد ساڑھے گیارہ لاکھ کے قریب اور ہلاکتیں 60ہزار سے زائد ہوگئیں،امریکہ میں مریضوں کی تعداد تین لاکھ کے قریب پہنچ گئی جبکہ فرانس میں متاثرہ افراد کی تعداد چین سے زیادہ ہوگئی ، ایران نے ہلاکتوں میں چین کو پیچھے چھوڑ دیا ، بھارت میںکروناوائرس سے اموات کی تعدادبڑھ کر 68 اورمجموعی تصدیق شدہ مریضوں کی تعداد 2ہزار 902 تک پہنچ گئی ،آسڑیلین ائیر لائن قنتاس اور جیٹ سٹار کے پائلٹس سمیت عملے کے 50 ارکان کرونا وائرس کا شکار ہوگئے ،امریکی ریاست نیویارک میں وینٹی لیٹر ، ذاتی حفاظتی سامان اور طبی نگہداشت کے اہلکاروں کی اشد ضرورت پڑ گئی جبکہ صدر ڈونلڈ ٹرمپ نے کہا ہے کہ سی ڈی سی نے شہریوں کو کروناوائرس کیخلاف تحفظ کےلئے کپڑے سے بنے ماسک استعمال کرنے کا مشورہ دیا ہے ،چین نے امریکہ میں موجود چینی طلبا کو چہرے کے ماسکز اور جراثیم کش سپلائی سمیت ہیلتھ کٹس فراہم کرنے کا اعلان کردیا، جرمنی کے سب سے بڑے بوروشیا ڈورٹمنڈز اسٹیڈیم میں نوول کروناوائرس کا تشخیصی مرکز قائم کردیا گیا ،بلغاریہ میں ہنگامی صورتحال کے نفاذ میں 13 مئی تک توسیع کی منظوری دیدی گئی ، ترقی پذیرممالک کے اتحاد گروپ77 اور چین نے نوول کروناوائرس کی عالمی وبا کے اثرات کو کم کرنے کے لئے جدوجہد کرنے والے متاثرہ ممالک سے اظہار یکجہتی کیا ہے۔ جانز ہاپکنز یونیورسٹی کے ہفتے کے روز کے تازہ ترین اعدادوشمار کے مطابق دنیا بھر میں نوول کروناوائرس کے تصدیق شدہ مریضوں کی تعداد 11 لاکھ سے بڑھ چکی ہے۔یونیورسٹی کے سنٹر فار سسٹم سائنس اینڈ انجینئرنگ کے تازہ اعداد وشمار سے پتا چلتا ہے کہ دنیا بھر میں کل 11 لاکھ 18 ہزار 921 افراد میں نوول کروناوائرس کی تشخیص ہوئی ،جن میں مرنیوالوں کی تعداد 58 ہزار 937 ہے جبکہ 2 لاکھ 26 ہزار سے زیادہ مریض صحت یاب ہوچکے ہیں۔ ویتنام کی وزارت صحت نے ہفتے کی صبح ملک میں نوول کروناوائرس کے 2 نئے کیس سامنے آنے کی تصدیق کی ہے جس کے بعد ملک میں تصدیق شدہ کیس کی کل تعداد 239 ہو گئی ہے۔ویتنام نیوز ایجنسی نے رپورٹ کیا ہے کہ نئے مریض جو دونوں ویتنامی شہری ہیں میں سے ایک خاتون ہے جو حال ہی میں تھائی لینڈ سے آئی ہے اور پہلے سے تصدیق شدہ مریض سے رابطے میں تھی اور دوسرا ایک مرد ہے جو علاج کےلئے ہنوئی کے باچ مائی ہسپتال گیا تھا جہاں سے متعدد تصدیق شدہ مریض سامنے آ چکے ہیں ۔ افغانستان کی وزارت صحت عامہ نے کہا ہے کہ ہفتے کے روز نوول کروناوائرس کے 25 نئے مریض رپورٹ ہوئے ہیں جس سے ملک میں مریضوں کی مجموعی تعداد 299 ہو گئی ہے۔ترجمان وحیداللہ مائر نے ایک بیان میں کہا کہ دارالحکومت کابل اور مغربی صوبہ ہرات کی لیبارٹریوں میں نوول کروناوائرس سے متاثرہ 153 مشتبہ افراد کے ٹیسٹ کیئے گئے ہیں ۔افغانستان کی وزارت صحت عامہ نے ہفتے کو ملک میں نوول کروناوائرس کے باعث 1 نئی ہلاکت کی اطلاع دی ہے جس کے بعد فروری کے وسط میں عالمی وبا کے پھیلا کے بعد سے اب تک اموات کی مجموعی تعداد 7 ہوگئی ہے۔وزارت کے ترجمان وحید اللہ مائر نے نامہ نگاروں کو بتایا کہ جمعہ کو کابل میں ایک 73 سالہ معمر مریض نوول کروناوائرس کی وجہ سے پیدا ہونیوالی پیچیدگیوں کے باعث فوت ہو گیا ، ملک میں معتدی بیماری سے مرنیوالوں کی تعداد اب 7 ہو گئی ہے۔پاکستان کی وزارت صحت کے جمعہ کو رات گئے تازہ اعداد وشمار کے مطابق ملک میں نوول کروناوائرس کے تصدیق شدہ کیسز کی تعداد 2 ہزار 547 ہو گئی ہے ، ہلاکتوں کی تعداد 37 ہے۔ڈیٹا کے مطابق سب سے گنجان آباد مشرقی صوبہ پنجاب 977 مریضوں کے ساتھ سب سے زیادہ متاثرہ علاقہ ہے اس کے بعد جنوبی صوبہ سندھ سے 783 مریض سامنے آئے ہیں۔بھارت کی وفاقی وزارت صحت نے ہفتے کی صبح کہا ہے کہ بھارت میں نوول کروناوائرس سے اموات کی تعدادبڑھ کر 68 ہو گئی ہے جبکہ ملک میں مجموعی تصدیق شدہ مریضوں کی تعداد 2ہزار 902 تک پہنچ گئی ہے۔وزارت کی جانب سے جاری معلومات میں کہا گیا ہے کہ مقامی وقت کے مطابق صبح 9 بجے تک ملک میں نوول کروناوائرس سے متعلق 68 اموات ریکارڈ ہوئی ہیں۔ فجی میں ہفتے کے روز نوول کروناوائرس کے 5 مزید تصدیق شدہ مریض سامنے آئے ہیں جس کے بعد مریضوں کی کل تعداد 12 ہو گئی ہے۔ہفتے کی سہ پہر ٹیلی ویژن پر خطاب کرتے ہوئے فجی کے وزیراعظم وورقی بیناماراما نے کہا کہ حالیہ کیسز میں سے 2 کا تعلق فجی کے دوسرے سب سے بڑے جزیرے وانوالیوو کے شہر لباسا سے ہے جبکہ دارالحکومت سووا، تیسرے بڑے شہر نادی اور دوسرے بڑے شہر لاوتوکا سے ایک ایک مریض سامنے آیا ہے۔ ترقی پذیرممالک کے اتحاد گروپ77 اور چین نے نوول کروناوائرس کی عالمی وبا کے اثرات کو کم کرنے کے لئے جدوجہد کرنے والے متاثرہ ممالک سے اظہار یکجہتی کیا ہے۔ ایک بیان میں گروپ نے بیماری کیخلاف جنگ کی پہلی صفوں میں فرائض سرانجام دینے والے طبی محققین اور طبی نگہداشت سے منسلک افراد کی حمایت اور داد و تحسین کا اظہار کیا۔ادھرامریکی حکام نے کہا ہے کہ آنیوالے دنوں میں نوول کروناوائرس کے مریضوں کی تعداد میں اضافہ کی توقع کی وجہ سے امریکی ریاست نیویارک کو وینٹی لیٹر ، ذاتی حفاظتی سامان اور طبی نگہداشت کے اہلکاروں کی اشد ضرورت ہے ۔ امریکہ میں چینی سفارتخانہ اور قونصل خانہ نے امریکہ میں نوول کروناوائرس کے کیسز 2 لاکھ 77 ہزار سے تجاوز کرنے پرکہا ہے کہ امریکہ میں موجود چینی طلبا کو چہرے کے ماسکز اور جراثیم کش سپلائی سمیت ہیلتھ کٹس فراہم کی جائیں گی۔ جرمنی کے سب سے بڑے بوروشیا ڈورٹمنڈز اسٹیڈیم میں نوول کروناوائرس کا تشخیصی مرکز قائم کردیا گیا ہے ۔ویسٹ فیلسٹن اسٹیڈن کے شمالی اسٹینڈ میں کمروں کو نوول کروناوائرس کے مرض میں مبتلا ہونے کے مشتبہ افراد کو رکھنے کے لئے تیار کیا گیا ہے۔حکام کو امید ہے کہ یہ مرکز ڈورٹمنڈ شہر میں طبی مراکز پر دبا کو دور کرے گا۔ امریکی صدر ڈونلڈ ٹرمپ نے کہا ہے کہ بیماریوں کی روک تھام اور انسداد کے مرکز(سی ڈی سی)نے سفارش کی ہے کہ امریکی شہری نوول کروناوائرس کیخلاف تحفظ کےلئے کپڑے سے بنے ماسک سے چہرے کو ڈھانپیں۔ بلغاریہ کی قومی اسمبلی نے نوول کروناوائرس کی وبا سے پیدا ہونیوالی بیماری کو روکنے کے لئے ملک بھر میں ہنگامی صورتحال کے نفاذ میں 13 مئی تک توسیع کی منظوری دے دی ہے۔چینی محکمہ صحت نے کہا ہے کہ چینی مین لینڈ پرجمعہ کے روز نوول کرونا وائرس کے 19 نئے تصدیق شدہ کیسز کی اطلاعات موصول ہوئی ہیں جن میں سے 18 کا تعلق بیرون ملک سے آنے والے افراد سے تھا۔ہفتے کے روز قومی صحت کمیشن نے بتایا کہ کے ملکی کیسز صوبہ ہوبے سے رپورٹ ہوئے۔ جمعہ کے روز ہونے والی چاروں اموات بھی صوبہ ہوبے میں ہوئیں اور مین لینڈ پر رپورٹ ہونے والے11 نئے مشتبہ کیسز کا تعلق بیرون ملک سے تھا۔ کمیشن کے مطابق 180 افراد کو صحت یاب ہونے کے بعد اسپتالوں سے فارغ کیاگیا جبکہ سنگین نوعیت کے کیسز کی تعداد 48 کم ہو کر 331 ہوگئی۔کمیشن نے بتایا کہ جمعہ تک مین لینڈ میں بیرون ملک سے آنے والے مجموعی طور پر 888 کیسز رپورٹ ہوئے جن میں سے 190 مریضوں کو صحت یابی کے بعد اسپتالوں سے فارغ کردیا گیا جبکہ 698 افراد زیر علاج ہیں جن میں سے 17 کی حالت تشویشناک ہے۔چینی مین لینڈ پر مجموعی طور پر تصدیق شدہ کیسز کی تعداد جمعہ تک 81 ہزار639 تک پہنچ چکی تھی جن میں 1ہزار562 مریض تاحال زیر علاج ہیں۔ صحت یابی کے بعد اسپتالوں سےفارغ ہونے والوں کی تعداد 76 ہزار751 جبکہ اس وبا سے مرنے والوں کی تعداد 3ہزار326 ہوگئی ہے۔ دوسری جانب آسڑیلین ایئر لائن قنتاس اور جیٹ سٹار کے پائلٹس اور کیبن کریو سمیت عملے کے تقریبا 50 ارکان میں نوول کرونا وائرس کے ٹیسٹ مثبت آئے ہیں۔یہ بات مقامی میڈیا نے بتائی ہے۔ہفتہ کو کمپنی کے میڈیکل آفیسر رسل بران کے حوالے سے بتایا گیا کہ 8 پائلٹ اور کریو عملے کے 19 ارکان میں تازہ ترین کیسز سامنے آئے ہیں۔دوسری جانب یورپی یونین(ای یو) نے نوول کروناوائرس کیخلاف جنگ میں مدد کےلئے غیر یورپی ممالک سے طبی سامان اور حفاظتی آلات کی درآمد پر کسٹم ڈیوٹیاں اور ویلیو ایڈڈ ٹیکس(وی اے ٹی)کو عارضی طور پر معاف کرنے کا اعلان کیا ہے۔رکن ممالک اور برطانیہ کی جانب سے درخواستوں کی منظوری کا فیصلہ شدید ضرورت والے طبی آلات کے حصول کو مالی طور پر آسان بنانے کےلئے کیا گیا۔دنیا بھر میں کرونا وائرس کے باعث ہلاکتوں کی تعداد 59 ہزار 172 ہوگئی، 10 لاکھ 98 ہزار 762افراد عالمی وبا کا شکار ہوگئے، چین میں کرونا سے ہلاک افراد کی یاد میں ایک دن کا سوگ منایا گیا ۔اٹلی میں کرونا سے مرنے والوں کی تعداد 14 ہزار 681 ہوگئی۔ ایک لاکھ 19 ہزار 827افراد عالمی وبا کی لپیٹ میں ہیں۔ سپین میں کرونا سے 11 ہزار 198 افراد موت کے منہ میں چلے گئے۔ فرانس میں اب تک 6 ہزار 507 افراد کرونا سے ہلاک ہوچکے ہیں۔برطانیہ میں 3 ہزار 605 افراد جان سے گئے۔ جرمنی میں 1275، چین میں 3 ہزار 326، ایران میں 3 ہزار 294 افراد ہلاک ہوچکے ہیں، بھارت میں مرنے والوں کی تعداد 72 ہوگئی۔امریکا میں کرونا وائرس سے قیامت کا منظر ہے، جہاں گزشتہ 24 گھنٹوں میں اس وائرس نے 1480 افراد کی جان لے لی، یہ ایک ہی دن میں کرونا سے ریکارڈ ہلاکتیں ہیں۔ غیرملکی خبررساں ادارے کے مطابق کرونا وائرس سے صرف نیویارک میں 680 افراد ہلاک ہوئے جس کے بعد ریاست میں ہلاک افرادکی تعداد 3 ہزار 218 ہوگئی۔امریکا میں مسلسل تیسرے روز ایک ہزار سے زائدا موات کے بعد بڑا فیصلہ کرلیا گیا، ملک بھر میں گھروں سے نکلنے والوں کے لیے لازمی ماسک پہننے کی ہدایت کردی گئی۔ منہ کو کور کرنے کے لیے لوگوں کو کپڑے کا ماسک استعمال کرنے کی ہدایت کی گئی ہے۔ امریکی صدر ڈونلڈ ٹرمپ نے وائٹ ہاوس میں میڈیا سے بات کرتے ہوئے کہا کہ سینٹر فار ڈیزیز کنٹرول اینڈ پریوینشن نے اس بات پر زور دیا ہے کہ تمام لوگ اپنے منہ کو کور کریں۔انہوں نے مزید کہا کہ عوام کے لیے ماسک پہننا لازم نہیں ہے تاہم جو لوگ پہننا چاہیں انہیں اس بات کی اجازت ہو گی۔صدر ٹرمپ نے کہا کہ وہ ماسک نہیں پہنیں گے، انہوں نے یہ بھی واضح کیا کہ صدارتی الیکشن رواں برس نومبر ہی میں ہو گا۔اٹلی، اسپین اور امریکا کے بعد فرانس اور برطانیہ میں بھی کرونا وائرس کے زبردست حملے جاری ہیں اور برطانیہ میں بھی اموات چین سے زیادہ ہو گئی ہیں۔میڈیارپورٹس کے مطابق فرانس میں ایک ہی روز میں 1120 اموات کے بعد ہلاکتوں کی تعداد ساڑھے 6 ہزار سے بڑھ گئی ہے جب کہ برطانیہ میں بھی کرونا نے 684 افراد کو ابدی نیند سلا دیا جس کے بعد وہاں اموات کی تعداد چین سے بھی زیادہ ہو گئی ہے۔چین میں اب تک کرونا وائرس کے باعث 3 ہزار 326 افراد ہلاک ہو چکے ہیں جب کہ برطانیہ میں یہ تعداد 3 ہزار 605 تک پہنچ گئی ہے۔امریکا میں ایک ہی روز میں 1480 افراد کی ہلاکت کے بعد وہاں ہلاکتوں کی تعداد ساڑھے 7 ہزار تک پہنچ گئی ہے جب کہ اٹلی میں ہلاک ہونے والے افراد کی تعداد 14 ہزار 680 ہوگئی ہے۔دنیا بھر میں کرونا وائرس سے سب سے زیادہ اموات اٹلی میں 14ہزار 681، اس کے بعد 11ہزار 198 اسپین میں ہوچکی ہیں۔امریکا میں 7 ہزار 402، فرانس میں 6 ہزار 507 اور برطانیہ میں 3 ہزار 605 افراد کرونا وائرس کا شکار ہو کر موت کی آغوش میں جا چکے ہیں۔سب سے پہلے چین میں تباہی مچانے والے کرونا وائرس پر اب وہاں قابو پا لیا گیا ہے اور لگ بھگ 3 ہفتے سے چین میں کرونا وائرس کے بہت کم کیسز سامنے آ رہے ہیں۔چین میں متاثرہ مریضوں کا گراف 81 ہزار سے زائد پر رکا ہوا ہے جبکہ اموات 3 ہزار 326 ہو چکی ہیں۔کرونا وائرس سے خوفناک صورتِ حال کا شکار رہنے والے چین کے شہر ووہان میں معمولاتِ زندگی بحال ہو چکے ہیں، اس کے برعکس کرونا وائرس کے خوف سے لگ بھگ پوری دنیا ہی لاک ڈاون کا شکار ہو چکی ہے۔پاکستان میں کرونا وائرس سے اب تک 40 اموات ہوچکی ہیں جن کے ساتھ متاثرہ مریضوں کی تعداد 2689 ہے، جبکہ ملک بھر میں 126 مریض صحت مند ہو چکے ہیں۔
