دبئی(ویب ڈیسک) دبئی میں مقیم چند پاکستانیوں کی سڑک پر ہونے والی لڑائی نے تمام پاکستانی کمیونٹی کے سر شرم سے جھکا دیئے۔ تفصیلات کے مطابق دبئی کے علاقے المدرابہ کی ایک رہائشی عمارت میں مقیم پاکستانیوں میں کسی بات پر جھگڑا ہو گیا جس کے بعد 20 کے قریب پاکستانی افراد ایک دوسرے پر حملہ آور ہو گئے۔ سعودی ویب سائٹ المرصد اور خلیج ٹائمز کے مطابق اس لڑائی کے دوران دونوں جانب سے ایک دوسرے پر ڈنڈے سوٹوں اور لاتوں گھونسوں کا آزادانہ استعمال کیا گیا۔یہاں تک کہ ایک پاکستانی شخص نے اپنے مخالف کو لکڑی کا دروازہ اٹھا کر دے مارا۔ سڑک اور عمارت کی چھت پر ہونے والی اس خوفناک لڑائی نے وہاں سے گزرنے والے راہگیروں اور دیگر افراد کو بھی اپنی طرف متوجہ کر لیا۔ایک شخص نے اس واقعے کی ویڈیو بنا کر سوشل میڈیا پر پوسٹ کر دی۔پاکستانی صارفین نے اس واقعے کو امارات میں مقیم تمام پاکستانیوں کے لیے باعثِ شرمندگی قرار دیا۔آپسی جھگڑے کی یہ ویڈیو اتنی تیزی سے وائرل ہو گئی کہ پولیس کی جانب سے واقعے کے ایک گھنٹے کے اندر اندر فوری طور پر کارروائی کرتے ہوئے 6 افراد کو گرفتار کر لیا گیا۔ دبئی پولیس کے کریمنل انویسٹی گیشن ڈیپارٹمنٹ کے سربراہ بریگیڈیئر جمال سالم الجلاف نے بتایا کہ اس لڑائی جھگڑے کے دوران کئی افرادکو درمیانے درجے کی چوٹیں آئی ہیں۔ سوشل میڈیا پر ویڈیو وائرل ہونے کے چند منٹوں بعد ہی پولیس حرکت میں آ گئی اور جائے وقوعہ پر پہنچ کر 6 ملزمان کو فوری طور پر گرفتار کر لیا، پوچھ گچھ کے بعد مزید افراد کو گرفتار کیا جا سکتا ہے۔بریگیڈیئر الجلاف کا کہنا تھا کہ اماراتی مملکت کو اس وقت کورونا کی وبا کا سامنا ہے، ایسے حالات میں ان لوگوں کا یوں ایک دوسرے سے گتھم گتھا ہونا اور لڑائی کرنا بہت سنگین معاملہ ہے۔ جبکہ جائے وقوعہ پرجھگڑے کے وقت بہت سے لوگ بھی جمع ہو گئے تھے۔ ملزمان اور دیگر افراد کا یہ رویہ سماجی دوری کے ضابطے کی خلاف ورزی ہے۔ جس سے کورونا کے پھیلاوکا خدشہ بہت زیادہ بڑھ جاتا ہے۔
