لاہور (لیڈی رپورٹر) خبریں رضاکار ٹیم کی جانب سے عدنان شاہد فاﺅنڈیشن کے زیراہتمام صوبائی دارالحکومت میں آٹھویں روز بھی غریبوں‘ دیہاڑی دار اور محنت کش مزدوروں میں شہر کے مختلف علاقوں میں کھانا تقسیم کیا گیا۔ اس سلسلے میں مختلف شعبہ ہائے زندگی سے تعلق رکھنے والے افراد نے خبریں رضاکار ٹیم کو خراج تحسین پیش کیا۔ سابق وزیراعظم یوسف رضا گیلانی نے کہا کہ ہمیں خوشی ہے کہ خبریں گروپ نے غریب لوگوں کی مدد کیلئے کھانے کا اہتمام کیا ہے۔ ان کے نقش قدم پر چلتے ہوئے تمام مخیر حضرات کو بھی چاہئے کہ وہ اپنی حیثیت کے مطابق غریب لوگوں کی مدد کریں اور ان شاءاللہ ہم بھی اپنی حیثیت کے مطابق غریبوں کی مدد کریں گے۔ گلوکار فاخر محمود نے خبریں کو خراج تحسین پیش کرتے ہوئے کہا کہ خبریں غریبوں کی مدد کرکے بہت اچھا کام کررہا ہے۔ سابق کرکٹر سرفراز نواز نے کہا کہ عدنان فاﺅنڈیشن کے تحت جو خبریں رضاکار ٹیم دوسرے شہروں میں لوگوں کھانا تقسیم کررہے ہیں یہ ایک بڑا زبردست کام ہے۔ ایسے کام دوسرے لوگوں کو بھی کرنا چاہئیں۔ایڈمرل محمد آصف سندھیلہ نے کہا کہ خبریں اور چینل ۵ غریبوں میں راشن اور کھانا تقسیم کررہے ہیں اور ایک رضاکار ٹیم کے ذریعے ان کی مدد کررہے ہیں۔ میری دعا ہے کہ اللہ تعالیٰ انہیں کامیاب کرے۔ آسٹرولوجسٹ سعدیہ ارشد نے کہا کہ خبریں اخبار اور چینل ۵ کی جو کوشش ہے میں سمجھتی ہوں یہ ایک بہترین کوشش ہے۔خبریں اخبار کی ہمیشہ سے کسی بھی فلاحی کام میں بہت زبردست کوشش رہی ہے۔ یہ ایک فلاحی کام ہے جس میں انہوں نے بڑھ چڑھ کر حصہ لیا ہے۔ میں ان کو سیلوٹ پیش کرتی ہوں۔ خبریں زندہ باد۔
