ملاقات میں باہمی دلچسپی کےامور اورخطے کی سلامتی کی صورتحال پر تبادلہ خیال کیا گیا ، چینی سفیر نے خطے میں تنازعات کی روک تھام کیلئے پاکستان کے کردار کی تعریف کی ، آئی ایس پی آر
راولپنڈی (ویب ڈیسک ) پاکستان اور چین نے دوطرفہ تعلقات کو مزید وسعت دینے پر اتفاق کرلیا۔ پاک فوج کے شعہ تعلقات عامہ کی طرف سے بتایا گیا ہے کہ آرمی چیف جنرل قمر جاوید باجوہ سے چینی سفیرنونگ رونگ نے ملاقات کی ، جس میں ملاقات میں باہمی دلچسپی کےامور اورخطے کی سلامتی کی صورتحال پر تبادلہ خیال کیا گیا۔ آئی ایس پی آر کے مطابق ملاقات میں چینی سفیر نے خطے میں تنازعات کی روک تھام کیلئے پاکستان کے کردار کی تعریف کی ، جب کہ اس ملاقات میں اتفاق ہوا کہ پاکستان اور چین کے درمیان غیر معمولی لازوال دوستی کے تعلقات ہیں ، دونوں ممالک کے درمیان تعلقات کو مزید وسعت دی جائے گی۔خیال رہے کہ پاکستان میں تعینات نئے چینی سفیر نونگ رونگ نے چند روز قبل ہی اپنی ذمہ داریاں سنبھال ہیں ، نئے چینی سفیر نونگ رونگ نے اپنی ذمہ داریاں سنبھالنے پر کہا تھا کہ پاکستان میں بطور چینی سفیر خدمات سرانجام دینا میرے لیے باعث فخر ہے ، چینی سفیر نونگ رونگ نے تمام پاکستانیوں کا ٹویٹر پر سلام بھی پیش کیا۔
پاکستان میں چین کے نئے سفیر نونگ رونگ نے وزارتِ خارجہ میں وزیر خارجہ مخدوم شاہ محمود قریشی سے ملاقات کی جس میں دو طرفہ تعلقات ،کرونا عالمی وبائی صورتحال سمیت باہمی دلچسپی کے امور پر تبادلہ خیال کیا گیا ، شاہ محمود قریشی نے کہا کہ آپ کو پاکستان آمد اور بطور سفیر منصب سنبھالنے پر مبارکباد دیتا ہوں۔
انہوں نے کہاکہ آپ جیسے وسیع تجربے کی حامل شخصیت کی پاکستان میں تعیناتی سے اقتصادیات، انفراسٹرکچر سمیت کثیر جہتی شعبہ جات میں دو طرفہ تعاون کو مزید فروغ ملے گا ، پاکستان اور چین کے مابین مثالی برادرانہ تعلقات اور لازوال دوستی کو پوری دنیا جانتی ہے ، پاکستان اور چین نے ہر مشکل اور کٹھن وقت میں ایک دوسرے کی بھرپور معاونت کی ، کرونا عالمی وبائی چیلنج سے نمٹنے کیلئے چین کی جانب سے فراہم کی جانے والی بروقت معاونت قابل تحسین ہے جس پر میں آپ کے توسط سے چینی قیادت کا شکریہ ادا کرتا ہوں ۔حنان(چین) میں چینی وزیر خارجہ وانگ ڑی کے ساتھ ہونیوالی ملاقات کا حوالہ دیتے ہوئے وزیر خارجہ نے کہا کہ دونوں ممالک کی قیادت سی پیک سمیت باہمی دلچسپی کے منصوبوں کو جلد پایہ تکمیل تک پہنچانے کیلئے پرعزم ہے ، سی پیک کے دوسرے مرحلے کے تحت جاری تمام منصوبوں کی تیز تر تکمیل کو یقینی بنانے کے لئے اقدامات کیے جا رہے ہیں۔چینی سفیر نونگ رونگ نے وزیر خارجہ کا شکریہ ادا کرتے ہوئے، پاکستان اور چین کے مابین دوطرفہ تعلقات کو مزید مستحکم بنانے کیلئے اپنی تمام تر کاوشیں بروئے کار لانے کا یقین دلایا۔
