لاہور، کراچی : ( نمائندگان خبریں) پاکستان مسلم لیگ ن کے صدر و قائد حزب اختلاف میاں محمد شہباز شریف نے کہا پڑھے لکھے لوگوں پر لاٹھیاں برسا کر حکومت جہالت کا مظاہرہ کررہی ہے ،مسئلہ سننے ، سمجھنے اور خوش اسلوبی سے حل کرنے کی بجائے لاٹھی اور آنسو گیس استعمال کرنا افسوسناک ہے۔
مفت دوائی ختم کرنے اور قیمت میں 500 فیصد اضافے کے بعد اب ڈاکٹرز پر لاٹھیاں برسائی جارہی ہیں،تین سال سے اساتذہ، طالب علم، مزدور، خواتین، پنشنرز ، ظلم پر آواز اٹھانے والا ہر شہری حکومت سے لاٹھیاں کھارہا ہے ،پولیس گردی کا شکار ہونے والے ڈاکٹرز سے ہمدردی ہے ، ان کے ساتھ یک جہتی کرتے ہیں۔
مرکزی ترجمان مسلم لیگ ن مریم اورنگزیب نے کہاہے کہ مہنگائی کے جہنم کو عمران خاں اپنی جعلسازی اور جھوٹ سے جنت ثابت نہیں کرسکتے ، مہنگائی نے ریکارڈ توڑ دیئے لیکن مافیا ز،اے ٹی ایمز، آٹا چینی بجلی گیس دوائی ، ایل این جی چوروں کے ساتھ کپتان ڈٹ کر کھڑا ہے ۔ عمران کا مینڈیٹ جھوٹ، دعوے جھوٹ، کارکردگی جھوٹ، معاشی اعدادوشماربھی جھوٹ ہے ، تین سال میں مہنگائی کی شرح3 فیصد سے بڑھ کر 17 فیصد ہوگئی ،35 روپے کلو والا آٹا 100 روپے ہوگیا ،52 روپے کلو چینی تین سال میں 120 روپے ہوگئی ،بجلی کی فی یونٹ قیمت 11 روپے سے 22 روپے ہوگئی ، گیس کی قیمت میں 146 فیصد اضافہ ہو گیا ۔
