ملک میں سونے کی فی تولہ قیمت 4 ہزار 200 روپے اضافے کے بعد تاریخ کی بلند ترین سطح ایک لاکھ 32 ہزار روپے پر پہنچ گئی۔
تاجروں کا کہنا تھا کہ حالیہ چند سالوں میں سونے کی قیمت میں کمی ریکارڈ کی گئی تھی لیکن اس کے بعد سونا مسلسل تاریخ کی بلند ترین قیمت پر فروخت ہو رہا ہے۔
اگست 2020 میں سونے کی قیمت ایک لاکھ 32 ہزار روپے تک پہنچی تھی۔
تاہم اس کے بعد سونے کی قیمت میں بتدریج کمی دیکھی گئی تھی۔
گزشتہ ہفتے ایک تولہ سونے کی قیمت ایک لاکھ 22 ہزار 200 روپے تھی۔
تاجروں نے سونے کی قیمت میں اضافے کا ذمہ دار ڈالر کے مقابلے میں پاکستانی روپے کی قدر میں مسلسل کمی کو ٹھہرایا جبکہ اس دوران دنیا بھر میں سونے کی قیمت میں اضافہ دیکھا گیا ہے۔
نتیجتاً ملک میں صارفین سونے کی خریداری کے عوض بھاری رقم ادا کر رہے ہیں۔
تاجروں کا کہنا تھا کہ ’آپ اعداد و شمار سے اس صورتحال کو بہتر طریقے سے سمجھ سکتے ہیں کہ یکم اکتوبر 2021 سے اب تک سونے کی فی تولہ قیمت میں 18 ہزار 500 روپے اضافہ ہوچکا ہے’۔
انہوں نے کہا کہ اتنا بڑا اضافہ پاکستانی روپے کی قدر میں کمی اور عالمی سطح پر سونے کی قیمت میں اضافے کے باعث ہوا ہے۔
