قومی احتساب بیورو ( نیب) نے صوبائی وزیر تیمور سلیم جھگڑا کے پرسنل اسسٹنٹ (پی اے) کے خلاف تحقیقات کا آغاز کر دیا۔
نیب کی جانب سے جاری بیان کے مطابق تیمور سلیم جھگڑا کے پی اے ارسلان انجم کے خلاف آمدن سے زائد اثاثوں کی مد میں تحقیقات جاری ہیں جس کے لیے سیکرٹری فنانس سے ارسلان انجم سے متعلق تمام ریکارڈ طلب کر لیے ہیں۔
نیب نے سیکرٹری فنانس کو ارسلان انجم کی دوران ملازمت حاصل کردہ دیگر مراعات کی مکمل تفصیلات بھی جمع کرنے کے احکامات جاری کیے ہیں۔
دوسری جانب نیب نے ارسلان انجم کے پی اے کے محکمے میں جمع کرائےگئےگوشوارے کی تفصیلات بھی مانگ لی ہے۔

وفاقی وزیر توانائی حماد اظہر نے کہا ہے کہ ریفائنریز کو فرنس آئل کی پیداوار سے شفٹ کرنے کے لئے نئی ریفائنری پالیسی کو حتمی شکل دی جارہی ہے۔
سماجی رابطے کی ویب سائٹ ٹوئٹر پر پیغام جاری کرتے ہوئے وفاقی وزیر حماد اظہر نے کہا کہ موسم گرما میں فرنس آئل کی قلت کا سامنا کرنا پڑا ،ڈیموں میں کم پانی کے باعث فرنس آئل والے پلانٹس زیادہ چلائے گئے ،موسم گرما میں گزشتہ سال کی نسبت فرنس آئل کی کھپت 116 فیصد زیادہ رہی جبکہ موسم سرما کےلئے دو لاکھ ٹن فرنس آئل درآمد کیا گیا ۔
حماد اظہر کا کہنا تھا کہ نومبراور دسمبر میں ایل این جی کارگوز آنے سے فرنس آئل پلانٹس نہیں چلائے گئے ،نہروں کی بندش کے باعث فرنس آئل والے پلانٹس چلائے جارہے ہیں ،آئندہ چند روز میں فرنس آئل کی کھپت تیرہ ہزار میٹرک ٹن یومیہ ہوجائے گی ۔
انہوں نے مزید کہا کہ مقامی ریفائنریاں اس مقدار کا آدھا فرنس آئل پیدا کررہی ہیں ،آئی پی پیز کے پاس فرنس آئل کا سٹاک ضرورت کے مقابلے میں کم ہے ،ایل این جی کارگو ڈیفالٹ کرنے سے ملک میں فرنس آئل کا سٹاک موجود ہے ،فرنس آئل کی یومیہ کھپت 6 ہزار میٹرک ہے

پاکستان مسلم لیگ (ن) پنجاب کے صدر رانا ثناء اللہ نے کہا ہے کہ نوازشریف ابھی آئے نہیں اورحکومت پہلے ہی بوکھلا گئی ہے، لیگی قائد کی واپسی کا خوف انہیں سونے نہیں دے رہا، جو کرنا ہے کرلیں، اب تو جانا ہی پڑے گا اور عوام جن کا پتہ کاٹ چکے وہ اپنے ٹکٹ کی فکر کریں۔
وزیر داخلہ شیخ رشید کے بیان پر ردعمل دیتے ہوئے سابق وزیر قانون پنجاب رانا ثنا اللہ نے کہا کہ آپ نے جو کرنا ہے کریں ، جو کہنا ہے کہیں جانا تو پڑے گا، نالائقی ، نااہلی اور کرپشن کا سونامی لانے والوں کی چیخیں نکل رہی ہیں ۔
رانا ثنا اللہ نے کہا کہ نیازی سمیت ہر وزیر اور ترجمان کا بیان اور پریس کانفرنس صرف نواز شریف، شہباز شریف تک محدود ہے،اس وقت پی ٹی آئی بطور جماعت قانوناً ختم ہو چکی ہے ، پوری قوم نواز شریف کا استقبال کرنے کے لئے چشم براہ ہے۔
انہوں نے مزید کہا کہ جن کا اپنا ٹکٹ عوام کاٹ چکے ہیں، وہ اپنے ٹکٹ کی فکر کریں ،نوازشریف اور شہباز شریف کے خلاف بس الزام ہی ہیں، ثبوت کوئی نہیں ،جب نواز شریف وزیراعظم بیں گے تو عمران نیازی ، شیخ رشید اور کرائے کے ترجمانوں کو چھپنے کی جگہ بھی نہیں ملے گی۔

پاکستانی نژاد امریکی خاتون وجیہہ سواتی کی لاش پوسٹ مارٹم مکمل ہونے پر سرد خانے منتقل کردی گئی،گرفتار ملزم، والد اور ملازم کو وی آئی پی پروٹوکول میں راولپنڈی کے علاقہ مجسٹریٹ کی عدالت میں پیش کر دیا گیا۔ پروٹوکول کی فوٹیج بنانے پر مقامی صحافی کو پولیس نے تشدد کا نشانہ بنایا۔
امریکی شہری خاتون وجیہہ سواتی کی دو ماہ پرانی تعفن زدہ لاش لکی مروت سے راولپنڈی پہنچنے پر ڈی ایچ کیو ہسپتال میں ڈاکٹروں نے پوسٹمارٹم مکمل کر لیا۔ لاش سے فرانزک ٹیسٹ کے نمونے بھی حاصل کر کے لاہور بجھوا دیئے گئے۔ لاش کو گزشتہ شب سخت سیکورٹی میں لکی مروت کے علاقہ پیزو سے راولپنڈی منتقل کیا گیا۔
چار روزہ جسمانی ریمانڈ مکمل ہونے پر پولیس نے ملزم رضوان حبیب،والد اور ملازم کو وی آئی پی پروٹوکول میں ڈیوٹی مجسٹریٹ کی عدالت میں پیش کیا۔ وی آئی پی پروٹوکول کی فوٹیج بنانے پر ڈی ایس پی سول لائنز کے کہنے پر پولیس اہلکاروں نے مقامی صحافی افتخار خٹک پر تشدد کیا، گالیاں دیں، موبائل فونز چھین کرملزمان سمیت ذاتی ویڈیوز ڈیلیٹ کر دیں، صحافی کو تھانہ سول لائنز لے جا کر تشدد کا نشانہ اور ایف آئی آر درج کرنے کی دھمکیاں بھی دیں۔
امریکی شہری وجیہہ سواتی کو سولہ اکتوبر کو پاکستان پہنچنے پر خاوند رضوان حبیب نے اغواء کرکے والد اور ملازم کی معاونت سے چھری کے وار سے قتل کر دیا تھا جس کی لاش راولپنڈی سے لکی مروت لے جا کر پیزو کے علاقہ میں تدفین کر دی گئی تھی، پولیس کی غفلت،لاپرواہی اور ناقص تفتیش کے باعث ملزم دو ماہ تک گرفتار نہ ہو سکا،بعد ازاں امریکی سفارت خانے کے دباؤ پر ملزم کو گرفتار کیا گیا تھا۔

گلوکار عاطف اسلم کراچی میں ٹریفک جام میں پھنس گئے، انہیں بائیک پر سوار ہو کر کنسرٹ میں پہنچنا پڑا۔ میڈیا رپورٹ کے مطابق عاطف اسلم جب گذشتہ رات کنسرٹ کیلئے نکلے تو ٹریفک جام دیکھ کر آو دیکھا نہ تاو موٹر سائیکل پر سوار ہوئے اور ٹھنڈی ہوا کو انجوائے کرتے ہوئے کنسرٹ کے مقام تک پہنچ گئے۔ گلوکار کو بائیک پر آتا دیکھ کر ان کے مداح خوش ہو گئے اور عاطف عاطف کے نعرے لگائے۔ عاطف نے بھی مداحو ں کو مایوس نہیں کیا اور اپنی پرفارمنس سے ان کے دل جیت لئے۔ پرفارمنس کے دوران عاطف نے اپنے مشہور گانوں سے شائقین کو خوب محظوظ کیا۔

وزیر اعظم عمران خان نے نیشنل سیکیورٹی کمیٹی کا اجلاس کل طلب کرلیا ہے۔

وزیراعظم کی زیر صدارت اجلاس میں افغان صورت حال اور قومی سلامتی کے دیگر معاملات زیر غور آئیں گے۔

قومی سلامتی کمیٹی کو تازہ ترین صورت حال پر بریفنگ دی جائے گی۔

اجلاس میں عسکری حکام اور سینیر وزراء شریک ہوں گے جبکہ وزیر داخلہ شیخ رشید  وزیر اطلاعات فواد چوہدری اور معید یوسف شرکت کریں گے۔

محبت اور خوشبوؤں کے رنگ بکھیرنے والی معروف شاعرہ پروین شاکر کی آج 27ویں برسی منائی جا رہی ہے۔ انسانی جذبات و احساسات کو لفظوں میں پرونے والی شاعرہ آج بھی اہل ذوق کے دلوں میں زندہ ہے۔ 24 نومبر 1954ء کو پاکستان کے شہر کراچی میں پیدا ہونے والی اس شاعرہ کے خاندان میں کئی نامور شعرا اور ادیب پیدا ہوئے۔ پروین شاکر کے والد کا نام سید شاکر حسن تھا، آپ کے نانا حسن عسکری نے انہیں ادبی دنیا میں روشناس کرانے میں اہم کردار ادا کیا۔ پروین شاکر تعلیمی دور سے ہی اردو مباحثوں اور مختلف علمی ادبی پروگراموں میں شرکت کرتی رہیں، تعلیم مکمل کرنے کے بعد نو برس شعبہ تدریس سے منسلک رہیں۔ شاعری کی دنیا میں انہیں احمد ندیم قاسم جیسے ادیب کی سرپرستی حاصل رہی، پروین شاکر کی معروف کتابوں میں خوشبو، صد برگ، خود کلامی، انکار اور ماہ تمام شامل ہیں۔ اپنی شاعری سے ادبی دنیا میں نام بنانے والی شاعرہ 26 دسمبر 1994 میں اسلام آباد میں ایک ٹریفک حادثے میں انتقال کر گئیں۔

شدید دھند کے باعث لاہور ایئرپورٹ پر فضائی آپریشن معطل ہوگیا ہے۔

تفصیلات کے مطابق موسم کی خرابی اور شدید ترین دھند کی وجہ سے علامہ اقبال انٹرنیشنل ایئرپورٹ پر فضائی آپریشن معطل ہونے سے 20 سے زائد پروازیں متاثر ہوگئی ہے۔سول ایوی ایشن حکام کا کہنا ہے کہ کچھ پروازوں کو اسلام آباد اور کراچی بھجوا دیا گیا ہے جبکہ موسم اور دھند ختم ہونے پر پروازوں کی بحالی کا کام شروع کر دیا جائے گا۔

واضح رہے کہ   لاہور ایئرپورٹ  پر حد نگاہ سو کے قریب ہوگئی ہے۔اسموگ،  فوگ یعنی دھند اوراسموگ یعنی دھویں سے ماخوذ ایک اصطلاح ہے۔ یہ ایک فضائی آلودگی ہے، جو انسان کی دیکھنے کی صلاحیت کو کم کردیتی ہے۔ماہرین کے مطابق موسم گرما جانے کے ساتھ ہی جب دھند بنتی ہے تو یہ فضا میں پہلے سے موجود آلودگی کے ساتھ مل کر اسموگ بنا دیتی ہے۔اس دھویں میں کاربن مونو آکسائیڈ، نائٹروجن آکسائیڈ، میتھین اور کاربن ڈائی آکسائیڈ جیسے زہریلے مواد شامل ہوتے ہیں۔ماہرین کا کہنا ہے جب ہوا نہیں چلتی اور درجہ حرارت میں کمی یا دیگر موسمی تبدیلی واقع ہوتی ہے توآلودگی فضاء میں اوپرنہیں جاتی بلکہ زمین کے قریب ہی ایک تہہ بن جاتی ہے اور  ان وجوہات کے نتیجے میں یہ غیر معمولی آلودگی کئی کئی دن تک شہرمیں برقرار رہ سکتی ہے۔دسمبر1952ء میں لندن میں فضائی آلودگی کی لہر کو’گریٹ اسموگ‘ کے نام سے یاد کیا جاتا ہے۔ لندن میں آلودہ دھند کی وجہ سے12ہزار سے زائد افراد اپنی زندگی کی بازی ہار گئے تھے۔