خضر کلاسرا
شکر ہے، وزیراعلی پنجاب اس وقت فائرنگ میں محفوظ رہے،جب ان کو کھوکھر برادران نامزد صوبائی وزیراسد کھوکھر کے بیٹے کے ولیمہ کے بعد ان کو رخصت کررہے تھے اور تاک میں بیٹھے مسلح سزایافتہ شخص نے اس وقت پنجاب پولیس سمیت سیکورٹی اداروں کے انتظامات کاپول کھول دیا، جب اس نے فائر کھول دیا،اور وہ اتنا قریب آچکاتھا کہ کھوکھربرادران میں سے ایک بھائی گولیوں کا نشانہ بن کر موقع پر ہی زندگی کی بازی ہارگیا۔ اس کریمنل مائنڈ شخص سے کسی بھی بڑی واردات کی توقع کی جاسکتی تھی؟ یہ تو شکرہے کہ قدرت کو کچھ اور منظور تھا یوں نامزد صوبائی وزیر اسد کھوکھر اور ان کا دوسرا بھائی اور بالخصوص وزیراعلیٰ پنجاب سردار عثمان بزدار اس فائرنگ کرتے ہوئے شخص کے حملہ میں محفوظ رہے۔تھوڑی دیر کیلئے اپنے آپ اس منظر میں لے جائیں، جب ایک مسلح شخص فائرنگ کرتا اور للکارتا ہوا۔اپنے مذموم مقصد کے حصول کیلئے بڑھا ہوگا اوروزیراعلیٰ پنجاب سردار عثمان بزدار سمیت کھوکھربردران کسی بھی ناگہانی صورتحال کیلئے ذرا برابر بھی تیار نہیں تھے۔ مسلح شخص کی گولیوں کی بوچھاڑ ایک ایسے سانحہ کو جنم دے سکتی تھی جس کا ازالہ کسی طورپر بھی نہیں کیاجاسکتاتھا۔میں ایک بار پھر کہوں گاکہ یہ قدرت کا پاکستان بالخصوص پنجاب پر کرم ہوا ہے کہ وزیراعلیٰ پنجاب عثمان بزدار اس سانحہ میں محفوظ رہے۔ ادھر نامزد صوبائی وزیراسد کھوکھر اور ان کے ایک بھائی قاتل کے وار سے بچ گئے۔دوسری طرف کھوکھر برادران کیلئے ایک بھائی کا خوشیوں میں بالخصوص ولیمہ کی تقریب میں یوں مارا جانا یقینا انتہائی تکلیف کا سبب ہے۔ پروردگار کھوکھر برادران کو حوصلہ دے اور مرحوم کے درجات بلند فرمائے، آمین۔
ادھر وزیراعلیٰ پنجاب سردار عثمان بزدار کی موجودگی میں ایک کریمنل کے ہاتھوں مارے جانیوالے کھوکھر بردران کے بھائی میزبان کی لاش گرنا بھی انتہائی تکلیف دہ ہے۔ وزیراعلیٰ پنجاب سردار عثمان بزدار پر بھی واقعہ کے تلخ اثرات پڑے ہونگے۔لیکن سوال یہاں پر یہی ابھرتاہے کہ آخر وزیراعلیٰ پنجاب عثمان بزدار سمیت اعلیٰ شخصیات کی موجودگی میں ایک مسلح شخص کو اتنی آزادی کیسے ملی کہ وہ وزیراعلیٰ کے سیکورٹی کے حصار کو توڑ کر اتنا قریب چلا گیا کہ اس نے فائر کھول دیا اور قتل کی سنگین واردات کرلی اور ابھی اس بارے میں بھی چہ میگوئیاں جاری ہیں کہ وہ کوئی بڑی واردات کیلئے ولیمہ میں مہمان بن کرآیا تھا؟ ا س سے زیادہ میں کیا عرض کروں؟ حالات وواقعات بھی اس بات کی چغلی کھارہے ہیں کہ قاتل صرف کھوکھر برادران تک کارروائی محدود رکھنے کا متمنی نہیں تھا لیکن پروردگار کا کرم ہوگیا وگرنہ کیا تلخ اور افسوس ناک صورتحال ہوتی،اس کا اندازہ لگانا مشکل نہیں ہے۔
یہاں اس بات پر بھی بحث ہورہی ہے کہ آخر ایک کریمنل بیک گراونڈ کے حامل شخص کویوں ولیمہ کے پنڈال میں داخل ہونے اورپھر اپنے مذموم مقصد کو حاصل کرنے کیلئے آخرکہیں سے تو سہولت کاری ملی ہے؟ کو ئی کاریگر تو اس کی پشت پر ہوگا؟ ادھر یہ بھی اطلاعات ہیں کہ وزیراعلی سردار عثمان بزدار کی سیکورٹی بلیو بک کے مطابق نہیں تھی، جوکہ اب کرنے کا فیصلہ گیا ہے؟ یہ بھی بہت سارے سوالات کو جنم دیتاہے کہ آخر پنجاب کے وزیراعلیٰ کو یوں ان حالات میں بلیوبک کی سیکورٹی کے بغیر لے کر جایاجاتارہاہے؟ مان لیا وزیراعلیٰ پنجاب سردارعثمان بزدار عاجزی اور انکساری سے کام لیتے ہیں لیکن ان کی سیکورٹی کو یقینی بنانا سیکورٹی اداروں کی پہلی اور آخری ذمہ داری بنتی ہے۔ یہاں یہ بھی عرض کرتاچلوں کہ اگر وزیراعلیٰ پنجاب عثمان بزدار کو اس بات پر مطمئن کیا جارہاہے کہ کھوکھر برادران کے ولیمہ میں وہ ہد ف نہیں تھے تو زیادتی ہے؟ اس لیے تحقیقات کو تمام پہلوؤں کو سامنے رکھ کر کیاجائے، بصورت دیگر قاتل کے سہولت کار باآسانی بچ جائینگے جوکہ اگلے خطرے کو جنم دیں گے۔جس کی متحمل یہ قوم نہیں ہوسکتی ہے۔
اورایک تکلیف دہ واقعہ مظفرگڑھ میں سابق رکن قومی اسمبلی جمشید دستی کے بڑے بھائی مشتاق دستی کے قتل کی صورتحال میں ہواہے۔جمشید دستی کے ساتھ بڑے بھائی کی تعزیت بھی کرتاہوں (ساتھ توقع کرتاہوں کہ جمشید دستی کے بھائی کے قاتل کے سہولت کار بھی پولیس ٹریس کرے گی)۔لیکن اس کے ساتھ مظفرگڑھ پر بھی بات کرنا چاہتاہوں۔ مظفرگڑھ پنجاب بالخصوص تھل کا ایک ایسا ضلع ہے جوکہ پسماندگی کی دلدل میں ایک مدت سے کھڑا ہے۔ اس بات کے باوجود کہ مشتاق گورمانی سے لے کر مصطفی کھر اور پھر نوابزادہ نصراللہ خان تک قومی سیاست میں طاقت ور رہے، اور حکمران بھی رہے۔اسی طرح مظفرگڑھ کے عوام نے اقتدار تک جتوئی،قریشی، دستی اور ہنجراسمیت وغیرہ وغیرہ کوبھی پہنچایا لیکن مظفرگڑھ کے لوگوں کی قسمت نہ بدلی تھی اور نہ بدلی ہے۔ مظفرگڑھ تو لاہور چھوڑیں، اپنے اردگرد کے اضلاع ملتان، بہاول پور اور ڈیرہ غازی خان سے بھی ترقی کے سفر میں کہیں پیچھے دور کھڑا ہے۔مطلب نواب مظفر خان کا مظفرگڑھ لاوارث کے طورپر دن پورے کررہاہے۔ مظفرگڑھ کیلئے تخت لاہور اور اسلام آباد کوئی بڑا پیکج دینے پر تیار نہیں ہے؟ مظفرگڑھ میں خوشحالی صرف ان خاندانوں کے گرد گھوم رہی ہے جوکہ اقتدار میں آجارہے ہیں۔ادھر مظفرگڑھ کے عوام کو اگر پنجاب کے دیگر اضلاع پر فوقیت ہے تو وہ تھانوں کی برسات ہے مطلب آپ کو یہ جان کر حیرت ہوگی کہ مظفرگڑھ میں اس وقت 22 پولیس اسٹیشن ہیں۔ادھر قومی اسمبلی کی 6 سیٹیں ہیں جبکہ صوبائی اسمبلی کی تعداد بارہ ہے۔اورتحصیلوں کی تعداد پانچ ہوچکی ہے لیکن اس کے ساتھ تخت لاہور اور تخت اسلام آباد کی محبتوں کا یہ عالم ہے کہ مظفرگڑھ میں قیام پاکستان کو 73سال ہونے کے باوجود ایک بھی یونیورسٹی نہیں ہے (اگر بن گئی ہے تو تاریخ بتادی جائے تاکہ سند رہے)اسی طرح مظفرگڑھ کے پاس ٹیچنگ ہسپتال سے لے کر میڈیکل کالج تک نہیں ہے،وویمن یونیورسٹی نہیں ہے۔سڑکوں کی حالات دیکھیں تو قیامت کا نظارہ ہوجاتاہے۔ مظفرگڑھ کی آبادی کے تناسب سے مظفرگڑھ میں نیا ضلع بنانے کی طرف بھی تخت لاہور کا دھیان نہیں ہے۔ حکومت کی پالیسی اس بات کی چغلی کرتی ہے کہ مظفرگڑھ کی عوام کو بھیڑ بکریوں کی طرح پانچ تحصیلوں میں جینے پر مجبور کیا گیا ہے۔ تحصیلوں کا اپنے ضلعی ہیڈکوارٹر سے فاصلہ گھنٹوں کا ہے۔ اور بنیادی سہولتیں تک نہیں ہیں۔ جیسے میں نے عرض کیا کہ مظفرگڑھ میں تھانوں کی تعداد 22 ہونے کی وجہ یقینا جرائم ہونگے۔ اورہمارے خیال میں بڑھتے ہوئے جرائم کو روکنے کیلئے صرف تھانے بنانا کافی نہیں ہیں۔ ہرسطح پر اقدامات کی ضرورت ہوگی۔ لوگ قانون کو ہاتھ میں کیوں لے رہے ہیں؟ اس کی وجہ کیا ہے؟اس بارے میں سوچنا ہوگا؟آخر پر کھوکھر برادران اور جمشید دستی سے جاں بحق ہونے والے بھائیوں کی وفات پر تعزت کرتا ہوں۔ پروردگار سے مرحومین کے درجات کی بلندی کیلئے دعاگو ہوں۔
(کالم نگاراسلام آباد کے صحافی اورتجزیہ کار ہیں)
٭……٭……٭

میڈیا کی بہت ساری خصوصیات میں سے ایک یہ ہے کہ جب کوئی پارٹی اپوزیشن میں ہو اسے یہ بہت پیارا لگتا ہے لیکن جونہی وہ پارٹی اقتدار میں آتی ہے تو اسے سب سے زیادہ جھنجھلاہٹ اور چڑ اسی میڈیا سے ہو جاتی ہے۔ وہ میڈیا جو تکلیف و آزمائش کے دنوں میں پیارا اور راج دلارا ہوتا ہے، طاقت اور اقتدار آتے ہی وہ غیر ذمہ دار اور قابل اصلاح سمجھا جانے لگتا ہے۔ پاکستان تحریک انصاف جو خود بھی اقرار کرتی ہے کہ اس کے برسر اقتدار آنے میں دیگر عوامل کے ساتھ ساتھ ایک بڑی وجہ میڈیا کا بھر پور ساتھ دینا تھا۔ لیکن کیا کیجئے کہ صرف 3 سال بعد ہی اسے اپنا مخالف سمجھنے لگی اور اس کی سمت درست کرنے کی باتیں ہی نہیں بلکہ عملی اقدامات ہو رہے ہیں۔پہلے پنجاب اسمبلی میں ارکان اسمبلی کا استحقاق بل لایا گیا جسے تمام حکومتی و اپوزیشن پارٹیوں نے اپنے تمام تر اختلافات بھلا کر منظور کر لیا۔ یہ واحد موقع تھا کہ جب حکومت کو کرپشن کے خلاف اپنا اصولی موقف یاد رہا نا پیپلزپارٹی کو جمہوریت یاد آئی۔ مسلم لیگ ن جو عمران خان پر نریندر مودی کو ترجیح دینے سے نہیں کتراتی ”ووٹ کو عزت دو“کا نعرہ بھی فراموش کرکے اسی حکومت کے ساتھ جا بیٹھی جسے آج تک وہ تسلیم نہیں کرتی۔ بقول علامہ اقبال میڈیا کے خلاف
ایک ہی صف میں کھڑے ہو گئے محمود و ایاز
نہ کوئی بندہ رہا اور نہ کوئی بندہ نواز
صحافیوں کے شور مچانے اور گورنر کے دستخط نا کرنے کے باوجود اس طفل تسلی کے ساتھ بل دوبارہ منظور کر لیا گیا کہ یہ قانون میڈیا کے خلاف استعمال نہیں ہوگا۔
ابھی پنجاب اسمبلی کا شور تھما نہیں تھا کہ وفاقی حکومت باقاعدہ پاکستان میڈیا ڈویلپمنٹ اتھارٹی آرڈیننس (پی ایم ڈی اے)کے نام سے نئی تلوار ہی نہیں پورا بم لے آئی ہے جسے پاکستان بھر کی تمام میڈیا تنظیموں نے بیک زبان مسترد کر دیا ہے۔ ویسے وفاقی وزیر اطلاعات فواد چودھری نے مروت میں اس کا نام پاکستان میڈیا ڈویلپمنٹ اتھارٹی رکھا ہے حالانکہ یہ سیدھی سادی پاکستان میڈیا کنٹرول اتھارٹی(پی ایم سی اے)ہے۔
اس سے پہلے کہ اس مجوزہ اتھارٹی بارے مزید کچھ کہا جائے صحافیوں کی اپنی اخلاقی حالت کا جائزہ لینے کی بھی ضرورت ہے۔ برصغیر میں پہلا اردو اخبار 1830 کے بعد سامنے آیا۔ اس طرح پرنٹ میڈیا کی 3 صدیاں مکمل ہونے کے قریب ہیں۔ پاکستان میں اگرچہ ٹیلی ویژن کا آغاز 26 نومبر 1964 سے ہوا تاہم گزشتہ صدی کے اختتام تک صرف سرکاری ٹی وی کا راج رہا۔ملک میں الیکٹرانک میڈیا کا اصل دور رواں صدی کے ساتھ شروع ہوا……اور افسوس کہ صرف ڈیڑھ عشرے میں عروج پا کر واپسی کا سفر بھی شروع ہو گیا۔ آج صرف 20 سال بعد الیکٹرانک میڈیا پر غلبہ ٹیلی ویژن کا نہیں بلکہ سوشل میڈیا کا ہے۔2021 میں اس وقت کے حاکم جنرل پرویز مشرف نے ٹی وی چینلز کو دھڑادھڑ لائسینس دینے شروع کئے تو سوال پیدا ہوا ٹیلی ویژن کے اس وسیع تر کردار کے بعد کیا اخبار زندہ رہے گا؟ آج ٹی وی کا سورج ڈھلنے پر بھی اخبار زندہ ہے لیکن سوشل میڈیا کی چکا چوند میں جکڑے ٹی وی بارے سوال اٹھایا جا رہا ہے کہ کیا ٹی وی زندہ رہے گا؟ میرے خیال میں اخبار ختم ہوا نہ ٹی وی کہیں جا رہا ہے البتہ فطرتی ارتقائی عمل کے تحت انداز ضرور تبدیل ہو رہے ہیں۔بقول اقبال
زمانے کے انداز بدلے گئے
نیا راگ ہے ساز بدلے گئے
ٹی وی اور اخبار نے جس قدر جلد اور جتنے بہتر انداز میں خود کو نئی ضروریات کے مطابق ڈھال لیا، اسی قدر مقبولیت اور آب و تاب کے ساتھ یہ میڈم زندہ و جاوید رہیں گے۔
پاکستان میں جب ٹی وی چینلز کو عروج ملا تو اخبارات سے صحافی جوق در جوق ٹی وی کی طرف ہجرت کرنے لگے۔ اخبارات میں جو تنخواہیں ہزاروں میں لیتے تھے وہ ٹی وی میں لاکھوں روپے لینے لگے۔ ایک وقت ایسا آیا کہ یہ تاثر ابھارا گیا کہ ملک کے بڑے صحافی جس کی چاہیں حکومت گرا سکتے ہیں اور جسے چاہیں حکومت میں لا سکتے ہیں۔ لیکن افسوس کہ یہ عروج مختصر ہی رہا۔ بقول اختر ضیائی
اس کو منزل ملی نہ گھر ہی رہا
تم سے بچھڑا تو دربدر ہی رہا
زیست صد جشن آرزو ہی رہی
یہ فسانہ بھی مختصر ہی رہا
قومی اسمبلی میں قائد حزب اختلاف شہباز شریف جب بار بار یہ کہتے ہیں کہ اس حکومت کو جتنی سازگار فضا دی گئی تاریخ میں کسی کو نہیں ملی تو ان کا اشارہ مخصوص سمت کے ساتھ ساتھ میڈیا کی طرف بھی ہوتا ہے کیونکہ پاکستان میں میڈیا کبھی اتنا کم خطرناک نہیں رہا جتنا آج ہے۔ بڑے بڑے صحافی اور اینکر پرسن اپنی پسندیدہ سیاسی جماعتوں اور مکاتب فکر کو پیارے ہو چکے۔ مخالف صحافی دن رات حکومت کے لتے لینے میں لگے ہیں جبکہ حکومت کے پیارے حکمرانوں کی شان میں زمین آسمان کے قلابے ملانے میں مصروف ہیں لیکن عوام پر ان کا کوئی اثر نہیں ہو رہا۔ بقول میر تقی میر
پھرتے ہیں میر خوار کوئی پوچھتا نہیں
اس عاشقی میں عزت سادات بھی گئی
اس بے توقیری میں حادثات زمانہ کے ساتھ ساتھ صحافیوں کا اپنا رویہ بھی شامل ہے۔ ضروری تھا کہ وکلا اور ججز کے احتساب کیلئے بنائے گئے اداروں کی طرز پر صحافیوں اور میڈیا کے بھی ادارے موجود ہوتے جن کی باگ ڈور حکومت کے بجائے صحافیوں کے اپنے ہاتھوں میں ہوتی۔ کالی بھیڑوں کے گرد خود شکنجہ سخت کیا جاتا، اس طرح صحافیوں کو اپنی مونچھیں کسی اور کے ہاتھ میں دینے کی نوبت ہی نہ آتی۔ لیکن ابھی تک ایسا نہیں ہو سکا۔اب عالم یہ ہے کہ صحافت کے وہ بڑے بڑے نام جو میر تقی میر کے انداز میں کہا کرتے تھے
سارے عالم پر ہوں میں چھا یا ہوا
مستند ہے میرا فرمایا ہوا
وہ جغادری جن کی ٹی وی چینلز پر مراعات ملینز روپے ماہانہ ہوتی تھیں بیروزگاری سے تنگ آکر سوشل میڈیا میں پناہ ڈھونڈ رہے ہیں۔ یو ٹیوب، فیس بک پر اپنی اپنی ڈیڑھ انچ کی دکانیں بنا کر سنسنی خیزی، غلط بیانی، فریب، جھوٹ، بہتان تراشی سمیت ہر وہ چیز بیچ رہے ہیں جن کے خریدار ان کو میسر ہیں۔خود احتسابی کے فقدان کے باعث سچ اور جھوٹ میں تمیز کرنا مشکل ہو گیا ہے۔ بڑی ڈھٹائی سے پیاروں کے کرتوتوں پر پردے ڈالے جبکہ مخالفین کے کھاتوں میں ناکردہ گناہ بھی لکھے جا رہے ہیں۔ ایسے میں نہیں لگتا سوشل میڈیا اپنے عروج کا ایک عشرہ ہی پورا کر سکے۔آج ضروری ہو گیا ہے کہ اہل صحافت اپنے طرز عمل کا خود جائزہ لیں تاکہ ریاست کے اس اہم ستون کی ساکھ برباد ہونے سے بچائی جا سکے۔ دوسری طرف حکومت بھی میڈیا کو اپنے زیر نگیں لانے کی خواہش ترک کر دیااور صحافت کی تطہیر کا عمل اپنے ارتقا کی طرف جانے دے نہ یہ صرف ملک اور جمہوریت ہی نہیں بلکہ حکومت کے لئے بھی بہتر ہوگا۔
(کالم نگار قومی و سیاسی امور پر لکھتے ہیں)
٭……٭……٭

سلمیٰ اعوان
یہ اگست 2021ہے اور پاکستان نے اپنی چوہترویں سالگرہ منائی۔ اللہ اِسے سدا آباد و شاد رکھے۔ اس کے چہرے سے وہ سیاہی اُتار دے جس نے اسے گہنا دیا ہے۔ یہ دراصل میری عمر کے لوگوں کا وطن ہے جن کا جنم ضرور ہندوستان میں ہوا تھا مگر جنہوں نے ہوش اِس آزاد سرزمین میں آکر سنبھالا۔یہ ہماری ماؤں کا کسی حد تک مگر ہماری نانیوں اوردادیوں کا وطن نہیں تھا کہ ایک آہ ان کے کلیجے سے نکلتی اور تان ہمارے دیس ہندوستان پر ٹوٹتی تھی۔کچھ ان کا بھی دوش نہ تھا۔ وہ جڑی ہوئی تھیں اُس مٹی سے جہاں سے انہیں آنا پڑا تھا اور جس کے بارے انہیں امید تھی کہ یہ رولا غولا تو فقط چند دنوں کا ہی ہے۔جونہی یہ ختم ہوا وہ اپنے گھروں کو لوٹ جائیں گی۔
آزادی کا جشن یہ ملک کیسے مناتا تھا اس کی ہر تصویر میری آنکھوں میں رقصاں ہے۔ایک مدّت تک چودہ اگست میں نے اپنی دادی کے پاس ضلع فیصل آباد کی تحصیل سمندری میں منایا۔گلی گلی کوچہ کوچہ جھنڈیوں سے سج جاتا اور شام کو پورے قصبے میں ملٹری بینڈ کے سپاہی موسیقی کی دھنوں پر مارچ پاسٹ کرتے، کرتب دکھاتے، ٹرمپٹ ز کے لشکارے آنکھوں میں کُھبے جاتے۔بگل کی سنسنی رگ وپے میں دوڑتی چلی جاتی۔اُن کی کلف لگی وردیاں، گردن سے بندھی پشت پر لٹکتی سرخ روپہلی چادریں،کلارنٹ اور بین نما آلہ بجاتے سپاہی اُف کتنے حسین لگتے۔ساری شام ان کے ساتھ گشت کرتے، پاکستان زندہ باد کے نعرے لگاتے۔ننگے پاؤں کو نہ دھول مٹی کی پرواہ ہوتی اور نہ وہ روڑے کنکر چبھنے سے خائف ہوتے۔نہ اگست کی گرمی اور حبس ہمیں کچھ کہتا۔
کھیلوں میں حصّہ لینا بے حد ضروری ہوتا۔سکول لیول پر پاکستان ڈے پر پریڈ ہوتی۔ہمارے سکول میں گراؤنڈ نہیں تھی مگر سامنے بوائز کی بڑی گراؤنڈ کو استعمال کیا جاتا۔اچھے بچوں کا چناؤ ہوتا اور وہ ڈسٹرکٹ لیول پر کھیلنے جاتے۔وہاں سے پھر آگے ٹیمیں ڈویژنل لیول پر کھیلتیں۔لفظوں میں بیان کرنا چاہوں تو لفظ تھوڑے پڑ جائیں گے جو ہمارے جوش و خروش اور ہمارے احساس و جذبات کی نمائندگی کرسکیں کہ جب دوسرے شہروں میں جانے کے لیے بسوں میں بیٹھتے۔
بصارتوں میں وسیع و عریض میدان نظر آتے ہیں۔تاحد نظر سفید لقی کبوتریاں مختلف رنگوں کی پٹیاں پہنے بھاگتی پھر رہی ہیں۔ان کے چمکتے چہرے عزم و حوصلہ کے رنگوں سے دمک رہے ہیں۔مہمان خصوصی کی آمد کا اعلان ہورہا ہے۔کِس تمکنت سے بیگم منظور قادر سلامی کے چبوترے پر چڑھتی ہیں۔ یہ وہی منظور قادر ہیں جو کبھی پاکستان کے وزیر خاجہ بھی رہے۔ دو دن کے اِس ٹرپ میں مختلف ضلعوں سے آنے والی لڑکیوں سے ملاقاتیں،دوستیاں، خط لکھنے کے وعدے۔کیسے وہ دن تھے جو جانے کہاں کھو گئے۔
ایک دن جب ملک کے نامور صحافی جناب محمود شام کی ہدایت پر عمل کرتے ہوئے میں نے بڑے اونچے سکولوں میں پڑھنے والے اپنے بچوں کے بچوں کو یہ سب سنایا۔ان کی آنکھوں میں حیرت تھی کہ اِس طرح کی سرگرمیو ں سے وہ کب آشنا تھے؟ اُن کی سکولوں کی عمارتوں میں کھیل کے میدان اتنے بڑے تھے ہی نہیں اور نہ ہی اِن دیسی قسم کی کھیلوں سے انہیں کوئی رغبت تھی۔
میرے موبائل کی سکرین پر ایک منظر جھلملایا تھا۔یہ مری کے سبزہ زاروں پر گرل گائیڈ لڑکیوں کی ایک تصویر تھی۔گائیڈنگ کے مخصوص یونیفارم میں لڑکیوں کا لہک لہک کر وطن کے گیت گانے کو میں نے حیرت اور مسرت سے دیکھا تھا۔ ارے یہ بھولا بھٹکا منظر کہاں سے میری بصارتوں سے آٹکرایا ہے۔بیگم جی اے خان یاد آئی تھیں۔ ذمہ دار اور فرض شناس سربراہ جس کی ہر سوچ اور عمل کا منتہائے مقصود اس ملک کی بچیوں کو صحت مند سرگرمیوں کے ساتھ پروان چڑھانا تھا۔پورے پاکستان میں نوجوان نسل کے لیے گرل گائیڈنگ اور بوائے سکاؤٹنگ جیسی سرگرمیاں لازم تھیں۔
آج اگر اِن جذبات و احساسات کا تجزیہ کروں کہ جب ہم جیسے غریب گھروں کی بچیاں گھروں سے کیمپنگ کے لیے نکلتی تھیں تو خوشی و مسرت اور تھرل کِس انتہا پر ہوتا تھا۔ ایک جوش، ایک عزم کچھ دیکھنے،کچھ دریافت کرنے،کچھ جاننے خود کو منوانے کا۔
ہم نے ٹاٹوں پر بیٹھ کر پڑھا۔چھٹی جماعت سے انگریزی شروع ہوئی۔اماں ابّا دونوں ان پڑھ۔چھٹی میں داخلہ لیٹ ہوا۔اے بی سی سیکھنے کا وقت نکل گیا۔لکھنا نہیں آتا تھا۔روز مارپڑتی۔پھر تفریح کے پریڈ میں کتاب کو دیکھ دیکھ کر کاپی پر لکھتی جاتی۔مار سے بچنے کے لیے۔ بس یوں لکھنا آگیا۔ نہ ہمیں ایگو ہرٹ ہونے کا پتہ تھا۔ نہ ہمارے ماں باپ کو ہماری شخصیت کے مجروح ہونے کا کوئی ڈر تھا۔کہاں گئیں وہ سب صحت مند باتیں اور سرگرمیاں۔
ادارے کیسے تباہیوں کے کنارے پہنچ گئے ہیں۔حرص و ہوس نے لوٹ کھسوٹ مچارکھی ہے۔پورے ملک میں گرلز گائیڈ ز کے لیے مختص وسیع و عریض جگہوں پر لینڈ مافیا قبضہ کرکے بیٹھ گیا ہے۔بلوچستان کی پردہ گروپ ایلیٹ عورتوں نے کیمپ کی جگہ پر اپنا کلب بنا لیا ہے۔پنڈی اسلام آباد والی جگہیں بھی بڑے لوگوں کے قبضوں میں ہیں۔کچھ ایسا ہی حال باقی شہروں کا بھی ہے۔
مجھے یاد ہے ایک بارمیں نے اپنی نانی سے کہا تھا۔ ماں جی آپ ساڈا دیس والا نغمہ جو اٹھتے بیٹھتے آپ کے لبوں سے آہوں کی صورت نکلتا ہے۔ ہمیں سنانابند کردیں۔ یہ میرا ملک اگر نہ بنتا تو آج میں اتنی پڑھی لکھی اور اعتماد سے بھری ہوئی ہوتی جیسی اب ہوں۔آپ کے دیس جالندھر کے اس سمی پور گاؤں میں گائے بھینسوں کے گوبر تھاپ رہی ہوتی یا پانچ چھ جماعتیں پڑھ کر چولہے چوکوں کی لپائیاں کررہی ہوتی۔یہ ہمارا دیس ہے۔اِس کی خیر اور سلامتی مانگا کریں۔پر میرے دیس کا حشر نشر کردیا ہے خود غرضیوں نے۔پروردگار مجھے گلہ ہے تجھ سے۔کیا تھا چند مخلص اور قابل بندے دان کردیتا ہمیں بھی۔
(کالم نگار معروف سفرنگار اورناول نگار ہیں)
٭……٭……٭