کراچی: (ویب ڈیسک) کراچی کے علاقے کورنگی زمان آباد میں سٹریٹ کرائم کی وارداتیں کم نہ ہوسکیں۔ ایک ہی علاقے سے مسلح ڈاکو دو مختلف وارداتوں میں شہریوں سے موٹرسائکل، نقدی اور موبائل لے اڑے۔
کراچی کے ضلع کورنگی میں سٹریٹ کرمنلز شہریوں کے پیچھے پڑ گئے، زمان آباد کے علاقے میں سٹریٹ کرائم کی وارداتیں عروج پر ہونے لگیں۔ ایک ہی دن، چند گھنٹوں اور ایک ہی علاقے میں دو وارداتیں ہو گئیں۔ پہلی واردات صبح کے اوقات میں ہوئی جس کے دوران موٹرسائیکل سوار دو ڈاکو گن پوائنٹ پر شہری کی موٹرسائکل لیکر فرار ہوگئے۔
دوسری واردات موٹر سائیکل پر سوارمسلح ملزمان نے سیلزمین کو اسلحہ کے زور پر لوٹ لیا۔ ڈکیتوں نے سیلزمین سے 20 ہزار روپے اور موبائل فون چھین لئے۔ گزشتہ روز ہونے والی دونوں وارداتوں کی سی سی ٹی وی فوٹیج دنیا نیوز کو موصول ہوئی۔ مکین کہتے ہیں زمان آباد میں ڈکیتیاں اور چوریاں معمول بن چکی ہیں۔ پولیس کی جانب سے کوئی کارروائی نہیں کی جا رہی۔ واقعے کا مقدمہ درج ہونے کے باوجود پولیس ملزمان کو گرفتار کرنے میں ناکام ہے۔
