پشاور: (ویب ڈیسک) پاکستان میں ماہ رمضان المبارک کا چاند دیکھنے کے لئے مرکزی رویت ہلال کمیٹی کا اجلاس 2 اپریل کو طلب کرلیا گیا، اجلاس کی صدارت چیئرمین مولانا عبدالخبیر آزاد کریں گے۔
تفصیلات کے مطابق رمضان المبارک کا چاند دیکھنے کیلئے مرکزی رویت ہلال کمیٹی کا اجلاس 2 اپریل کو پشاور میں ہوگا۔
وزارت مذہبی امور کا کہنا ہے کہ اجلاس محکمہ اوقاف پشاورکی عمارت میں ہو گا، چیئرمین کمیٹی مولانا عبدالخبیر آزاد اجلاس کی صدارت کریں گے۔
رویت ہلال کی ذونل کمیٹیوں کے اجلاس اپنے اپنے مقامات پر ہوں گے اور اسلام آباد میں ذونل کمیٹی کا اجلاس وزارت مذہبی امور میں ہوگا۔
یاد رہے محکمہ موسمیات نے ہفتہ 2 اپریل کو رمضان المبارک کا چاند نظر آنے کی پیش گوئی کرتے ہوئے کہا پہلا روزہ اتوار 3 اپریل کو ہوگا۔
محکمہ موسمیات کے مطابق رواں ماہ شعبان 29 روز کا ہوگا اور 29 شعبان بمطابق 2 اپریل کو رمضان المبارک کا چاند نظر آنے کے واضح امکانات ہیں، 2 اپریل کو ملک کے بیشتر حصوں میں مطلع صاف اور کہیں کہیں بادل چھائے رہنے کا امکان ہے۔
خیال رہے سعودی عرب میں سپریم کورٹ نے مملکت میں تمام افراد سے جمعہ یکم اپریل 29 شعبان 1443ھ کی شام رمضان کا چاند دیکھنے کی اپیل کی ہے۔
