لاہور: (ویب ڈیسک) قومی کرکٹ ٹیم کے سابق کپتان سلمان بٹ کا کہنا ہے کہ پاکستان سپر لیگ (پی ایس ایل) کو انڈین پریمئیر لیگ (آئی پی ایل) کی طرح بنانے کی خواہش ختم کرنے کی ضرورت ہے کیونکہ یہ بیکار بات ہے اور اسکے پیچھے کوئی منطق نہیں۔
یوٹیوب پر انٹرویو دیتے ہوئے قومی کرکٹ ٹیم کے سابق کپتان سلمان بٹ نے کہا کہ جب سے پاکستان کرکٹ بورڈ (پی سی بی) نے اپنی ٹی20 لیگ شروع کرنے کا فیصلہ کیا ہے، شائقین، سابق کرکٹرز اور ماہرین نے اس کا موازنہ بھارتی لیگ سے کررہے ہیں، جس کو ختم ہونا چاہیئے۔
سابق کرکٹر نے کہا کہ آئی پی ایل سے مقابلہ کرنے کے لیے اپنی فرنچائزز اور کھلاڑیوں کے ساتھ دشمنی کرنا بےمعنیٰ ہے اور اس کے پیچھے کوئی منطق نہیں، ہماری فرنچائزز محدود وسائل میں کھلاڑیوں کو زیادہ سے زیادہ اضافی رقم دینے کی کوشش کررہی ہیں جبکہ متعدد بار کھلاڑیوں کو اضافی رقم دی بھی گئی ہے۔
انہوں نے کہا کہ پی ایس ایل کی فرنچائز 70 فیصد ایڈوانس ادائیگی کرتی ہیں اور ہم صرف اتنا ہی خرچ کرسکتے ہیں، اس کا مسلسل موازنہ نہیں کرنا چاہیئے۔
