جڑواں بہنیں ایک دوسرے کے پاسپورٹس پر درجنوں بار سفر کرنے میں کامیاب

ہربن: (ویب ڈیسک) اگر جڑواں بچے ہم شکل ہوں تو وہ اکثر مذاق میں لوگوں کے سامنے اپنی شناخت بدل کر پیش کرتے ہیں۔
مگر چین سے تعلق رکھنے والے جڑواں بہنوں نے تو اس معاملے کو ایک ‘نئی بلندی’ پر پہنچا دیا۔
ان بہنوں نے 30 سے زیادہ بار ایک دوسرے کے پاسپورٹس پر بیرون ملک کا سفر کیا جس کے بعد ہی انہیں پکڑنا ممکن ہوسکا۔
چین کے شہر ہربن سے تعلق رکھنے والی زوہو سسٹرز کو پولیس نے گرفتار کرلیا ہے اور ان سے پوچھ گچھ کی جارہی ہے۔
یہ سلسلہ اس وقت شروع ہوا جب ہونگ (یہ اصل نام نہیں بلکہ حکام نے شناخت چھپانے کے لیے دیا ہے) اپنے جاپانی شوہر کے ساتھ جاپان جانا چاہتی تھی، مگر اس کی ویزا کی درخواست کو مسلسل مسترد کیا جارہا تھا۔
مگر اس کی جڑواں بہن وائی (یہ بھی اصل نام نہیں) کے پاس جاپانی ویزا موجود تھا تو ہونگ نے ہم شکل ہونے کا فائدہ اٹھانے کا فیصلہ کیا اور جاپان جانے کے لیے بہن کا پاسپورٹ لے لیا۔
اس کے بعد بھی ہونگ نے چین، جاپان اور روس کے درمیان کم از کم 30 بار سفر کیا۔
دوسری جانب وائی نے اپنی بہن کے پاسپورٹ پر تھائی لینڈ اور ‘دیگر ممالک’ کا 4 بار سفر کیا۔
چینی حکام کو اس معاملے کا علم 2022 کے شروع میں ہوا تھا مگر یہ واضح نہیں کہ انہیں اس کا علم کیسے ہوا۔
حکام کے کہنے پر ہی دونوں بہنیں مئی میں چین واپس آئی تھیں اور ان کی کہانی رواں ہفتے چینی سوشل میڈیا پر وائرل ہوئی۔
بیشتر افراد حیران تھے کہ آخر یہ جڑواں بہنیں کس طرح اتنی بار امیگریشن حکام کو دھوکا دینے میں کامیاب ہوئیں۔
کچھ نے کہا کہ موجودہ دور کی جدید ترین ٹیکنالوجی میں بھی ایسا ہونا ناقابل یقین ہے۔