لاہور: (ویب ڈیسک) وزیراعلیٰ چوہدری پرویز الٰہی کی ہدایت پر سیلاب زدہ علاقوں میں امدادی کارروائیاں جاری ہیں۔
تفصیلات کے مطابق وزیراعلیٰ چوہدری پرویز الٰہی کی ہدایت پر سیلاب زدہ علاقوں میں امدادی کارروائیاں جاری .ہیں، سیلاب زدہ علاقوں کا آبیانہ، زرعی انکم ٹیکس سمیت سرکاری واجبات اور قرض معاف کرنے کی سفارش کی گئی ہے۔
ڈپٹی کمشنر راجن پور جمیل احمد جمیل نے سیلاب زدہ علاقوں کو آفت زدہ قرار دینے کی سفارشات ارسال کردیں، راجن پور کے سیلاب زدہ علاقوں میں فیلڈ ٹیمیں امدادی کارروائیوں میں مصروف ہیں۔
وزیراعلیٰ پنجاب چودھری پرویز الٰہی نے راجن پور، روجھان اور تونسہ میں امدادی سرگرمیاں تیز کرنے کی ہدایت کرتے ہوئے کہا ہے کہ ریلیف کی فراہمی اولین ترجیح ہونی چاہیے، مشکل وقت میں متاثرین کو تنہا نہیں چھوڑیں گے۔
ڈی سی کے مطابق راجن پور میں رود کوہیوں کے سیلاب زدہ علاقوں میں آٹھ سے زائد ریلیف کیمپس فنکشنل ہیں، سیلاب زدہ علاقوں میں 11 ہزار متاثرین کو تین وقت کا کھانا دیا جارہا ہے۔
جمیل احمد جمیل کا کہناہے کہ دو ہفتے سے جاری بارشوں سے 27860 ایکٹر پر کاشت فصلیں متاثر ہوئیں، رود کوہیوں کے سیلابی پانی سے ابتک 1076 گھر بھی متاثر ہوئے ہیں۔
