سلوواکیہ: (ویب ڈیسک) دنیا میں ایک فٹبال اسٹیڈیم ایسا بھی ہے جہاں باقاعدہ ریل کی پٹڑی بچھی ہے اور وہاں سے دخانی (اسٹیم) انجن والی ٹرین بھی گزرتی ہے۔
سلوویکیہ میں شوقیہ کھلاڑیوں کا ایک فٹبال کلب ٹی جے ٹیٹران سیئرنی بیلوگ کے نام سے قائم ہے۔ اس میدان میں تواتر سے فٹ بال مقابلے منعقد ہوتے رہتے ہیں۔ اگرچہ اس قصبے کی آبادی صرف 5100 ہے لیکن اکثریت فٹ بال کی شوقین ہیں۔
تاہم فٹ بال کلب اور اسٹیڈیم کی وجہ سے یہ علاقہ سیاحوں میں بھی مقبول ہے۔ 2015 میں یہاں کی ایک ویڈیو بنائی گئی تو وہ بہت مقبول ہوئی ہے۔ معلوم ہوا کہ یہ ایک دخانی ٹرین ہے جو موسمِ گرما میں سیاحوں کو لے کر عین اسٹیڈیم کے درمیان سے گزرتی ہے۔
1990 میں اس ریلوے پٹڑی کی مرمت کی گئی اور اسے دوبارہ کھولا گیا تھا جس کے بعد سے یہ ٹرین اسٹیڈیم کے ایک کنارے سے داخل ہوکر دوسرے کنارے سے باہر نکل جاتی ہے۔ یہ علاقہ خوبصورت سبزے سے بھرے پہاڑوں پر واقع ہے اور ٹرین سے ان کا خوبصورت نظارہ کیا جاسکتا ہے۔
ٹرین کا کل سفر 17 کلومیٹر طویل ہے اور کئی تفریحی مقامات سے گزرتی ہے۔ لیکن ریل گاڑی جب جب میدان سے گزرتی ہے اور تیز سیٹی بجاتی ہے تاہم اس دوران تمام کھلاڑی اپنی توجہ اپنے کھیل پر مرکوز رکھتے ہیں۔ تاہم تماشائی ٹرین کو دیکھ کر ہاتھ ہلاتے ہیں۔
فٹ بال اسٹیڈیم جہاں سے ریل گاڑی بھی گزرتی ہے
