لاہور: (ویب ڈیسک) مشیر اطلاعات حکومت پنجاب عمر سرفراز چیمہ نے کہا ہے کہ سسلین مافیا پنجاب حکومت جانے کے صدمے سے شدید پاگل پن کا شکار ہو چکا ہے، وفاقی حکومت عوامی خدمت کی بجائے ساری توجہ مخالفین کیخلاف پراپیگنڈے پر مرکوز کیے ہوئے ہے۔
عمرسرفراز چیمہ نے اپنے ردعمل میں کہا کہ فیصل آباد میں خاتون کو تشدد کا نشانہ بنانے والے ملزمان قانون کے شکنجے میں ہیں، عمران خان کے وژن کے مطابق پنجاب میں امیر اور غریب کی تفریق کے بغیر قانون کی عملداری جاری ہے، ملزم چاہے کتنا ہی با اثر کیوں نہ ہو اب قانون کی گرفت سے نہیں بچ سکے گا، ملزم کیخلاف قانون کے مطابق کارروائی کی جارہی ہے۔
عمر سرفراز چیمہ نے کہا کہ وفاقی حکومت کے ترجمان سارا دن عمران خان اور پنجاب حکومت کے خلاف بیہودہ اور سازشی بیانات دیتے ہیں، پی ٹی آئی اور مسلم لیگ ق میں ایک دوسرے پر پورا اعتماد اور عوامی خدمت کے لئے مکمل ہم آہنگی ہے، پنجاب کے سیلاب زدہ علاقوں میں بھرپور ریلیف اور ریسکیو آپریشن جاری ہے، سیلاب سے متاثرہ ایک ایک شخص تک امدادی سامان پہنچایا جا رہا ہے، سیلاب سے متاثرہ علاقوں میں پوری حکومتی مشینری حرکت میں ہے۔
