لیہ: (ویب ڈیسک) اداروں کے خلاف سوشل میڈیا پر منفی مہم چلانے والوں کے خلاف تحقیقاتی اداروں کی کارروائی جاری ہے۔
اداروں کے خلاف پی ٹی آئی کی مہم سے متاثرایک اور طالبعلم نے ندامت کا اظہار کیا ہے۔
لیہ سے تعلق رکھنے والے قانون کے طالبعلم مبین حیدر کا بیان حلفی اور ویڈیو پیغام سامنے آیا ہے جس میں انہوں نے اداروں کے خلاف پوسٹ کرنے کا اعتراف کیا اور معذرت بھی کی۔
طالب علم مبین حیدر کا کہنا تھاکہ میں نے سوشل میڈیا پر اداروں کے خلاف پوسٹیں شیئر کیں اور پی ٹی آئی کے ٹرینڈز اور لوگوں کو دیکھتے ہوئے مہم میں حصہ لیا۔
طالبعلم کا کہنا تھاکہ مہم میں حصہ بننے پر اداروں اور قوم سے معذرت خواہ ہوں۔
خیال رہے کہ لسبیلہ میں ہیلی کاپٹر حادثے کے بعد سوشل میڈیا پر شہدا کے خلاف منفی مہم چلائی گئی جس کے بعد حکومت نے ذمہ داروں کے خلاف کارروائی کا آغاز کر رکھا ہے اور اب تک کئی افراد معافی مانگ چکے ہیں۔
