اسلام آباد: (ویب ڈیسک) وزیراعظم محمد شہبازشریف نے انڈونیشیا کے صدر جوکو ویدودو کو ٹیلی فون کیا اور ان سے مغربی جاوا میں زلزلے سے جانی و مالی نقصان پر تعزیت کا اظہار کیا۔
وزیراعظم نے گذشتہ ہفتے مغربی جاوا میں زلزلے سے جانی و مالی نقصان پر انڈونیشیا کے صدر سے تعزیت کی۔
انہوں نے کہا کہ پاکستانی عوام اپنے انڈونیشین بھائیوں اور بہنوں کے غم کو محسوس کر سکتے ہیں جنہیں حال ہی میں زلزلے جیسی قدرتی آفت سے بے پناہ نقصان اٹھانا پڑا ہے۔
پاکستان میں سیلاب متاثرین کے لئے انڈونیشیا کی حکومت کی طرف سے فراہم کی جانے والی امداد پر انڈونیشیا کے صدر کا شکریہ ادا کرتے ہوئے وزیر اعظم نے انڈونیشیا میں جاری امدادی سرگرمیوں کے لئے پاکستان کی طرف سے مدد کی پیشکش کی۔
