کراچی: (ویب ڈیسک) وفاقی وزیر فیصل سبزواری کا کہنا ہے کہ عمران خان نے خود اسمبلی توڑ کر امریکی سازش کو کامیاب بنایا، ہمیں کسی امریکی سفیر نے نہیں کہا کہ ہم سازش کر رہے ہیں، آپ عمران خان کے خلاف ووٹ دیں۔
ایم کیو ایم پاکستان نارتھ ناظم آباد ٹاؤن کے زیر اہتمام دعوت افطار کے موقع پر منعقدہ تقریب سے خطاب کرتے ہوئے ایم کیو ایم پاکستان رابطہ کمیٹی کے رکن و وفاقی وزیر برائے بحری امور فیصل سبزواری نے سابقہ حکمران جماعت پی ٹی آئی پر تنقید کرتے ہوئے کہا کہ عمران خان صاحب نے کہا کہ ہم اٹھارویں ترمیم کی وجہ سے سندھ میں کام نہ کرسکے، ملک کا وزیر اعظم اور صدر مملکت سمیت پوری وفاقی کابینہ ہونے کے باوجود اگر عمران خان شہر کے لئے کچھ نہ کر پائے تو اس پر انہیں سلام پیش کرتے ہیں۔
فیصل سبزواری نے کہا کہ امپورٹڈ حکومت کا تو نہیں معلوم لیکن امپورٹڈ قیادت شہر کے مسائل حل نہیں کرسکتی، شہر کے مقامی لوگ ہی مقامی لوگوں کے مسائل حل کر سکتے ہیں۔ انہوں نے عمران خان کو مخاطب کرتے ہوئے کہا کہ آپ نے آئین توڑا تھا، اس لئے رات بارہ بجے عدالت کی بتی جلی، ہمارے بد ترین مخالف بھی کہہ رہے ہیں کہ اس پورے سیاسی عمل میں سب سے زیادہ بردباری کا مظاہرہ ایم کیو ایم نے کیا، ہمیں اس شہر میں نفرت کی سیاست کو ختم کرنا ہے، ہم نے اپنی غلطیوں سے سبق سیکھنے کی کوشش کی ہے، 30 برسوں بعد بیلنس شیٹ بنانے کی ضرورت ہے تاکہ غلطیوں کو محاسبہ کیا جاسکے۔
ایک سوال کے جواب میں فیصل سبزواری کا کہنا تھا کہ ویگو چھوڑیں ان میں سے بہت سارے لوگ ویسپا کی بھی مار نہیں ہیں۔

اسلام آباد: (ویب ڈیسک) وفاقی وزیر منصوبہ بندی احسن اقبال نے احتساب عدالت سے بیرون ملک سفر کی اجازت مانگ لی۔
ذوالفقار عباس نقوی ایڈووکیٹ کے ذریعے دائر درخواست میں کہا گیا کہ نارووال سپورٹس سٹی ریفرنس کی سماعت 26 اپریل کو مقرر ہے، رمضان کے آخری عشرے میں عمرہ کی ادائیگی کیلئے سعودی عرب جانا چاہتا ہوں،ایک بار سفر کی اجازت دی جائے، ایک ہفتے میں واپس آ جاؤں گا۔
درخواست میں مزید کہا گیا ہے کہ سعودی عرب سے وطن واپسی پر عدالت کے سامنے پیش ہونے کی یقین دہانی کراتا ہوں۔

کوئٹہ: (ویب ڈیسک) بلوچستان میں آواران کے قریب کاہان میں سکیورٹی فورسز اور دہشتگردوں میں جھڑپ کے دوران میجر شاہد بشیر بہادری سے لڑتے ہوئے شہید جبکہ ایک سپاہی زخمی ہوگیا۔
آئی ایس پی آر کے مطابق دہشتگردوں نے سکیورٹی فورسز کی چوکی کو نشانہ بنایا، سکیورٹی فورسز کی بروقت کارروائی سے دہشتگرد پسپا ہوکر فرار ہوگئے۔ دہشتگردوں اور سکیورٹی فورسز میں شدید فائرنگ کا تبادلہ ہوا، سکیورٹی فورسز قوم کے تعاون سے بلوچستان کا امن و استحکام سبوتاژ کرنے کی کوشش ناکام بنانے کیلئے پر عزم ہے۔

کراچی: (ویب ڈیسک) کراچی کے ضلع ملیر تعلقہ گڈاپ میں سرکاری زمینوں پر قبضہ کر کے غیرقانونی گوٹھ بنانے کا انکشاف ہوا ہے، ضلع ملیر انتظامیہ نے تعلقہ گڈاپ کے 14 گوٹھ غیر قانونی قرار دے کر عوام کو پلاٹس کی خریداری سے روک دیا۔
کراچی کے ضلع ملیر میں سرکاری زمینوں پر قبضہ کر کے جعلی گوٹھ آباد سکیم کے نام پر پلاٹس فروخت کرنے کا انکشاف ہوا ہے، ضلعی ڈپٹی کمشنر عرفان سلام کے مطابق نان کلاس سرکاری زمینوں پر جعلی کھاتے ظاہر کر کے جعلی گوٹھ آباد سکیم نام پر سادہ لوح شہریوں کو لوٹا جارہا ہے، انتظامیہ نے گڈاپ کی حدود میں واقعہ چودہ گوٹھوں کو جعلی قرار دے دیا ہے۔
ڈپٹی کمشنر ملیر عرفان سلام میروانی کا کہنا ہے شہری ان سکیموں میں زمین کی خریدوفروخت نہ کریں، زمین غیرقانونی طور پر حاصل کی گئی ہے۔
انتظامیہ کے مطابق صالح جمانی، سلطان جوکھیو، داﺅد خاصخیلی گوٹھ ، لعل محمد، دریا خان گبول، امام بخش، علی داد، حنا کوآپریٹو سوسائٹی، عمرگبول، خیرمحمد، مری گوٹھ اور دیپار گوندل گوٹھ کو غیر قانونی قرار دیا گیا ہے۔

لاہور: (ویب ڈیسک) پنجاب میں بلدیاتی انتخابات کے پہلے مرحلے کا نوٹیفکیشن لاہور ہائیکورٹ میں چیلنج کر دیا گیا۔
چیف جسٹس نے بلدیاتی انتخابات کیخلاف درخواست پر دو رکنی بنچ تشکیل دے دیا۔ جسٹس شجاعت علی خان اور جسٹس شاہد جمیل پر مشتمل بنچ 25 اپریل کو سماعت کرے گا۔ صدر لاہور ہائیکورٹ بار نے بلدیاتی انتخابات کے شیڈول کا نوٹیفکیشن چیلنج کیا۔

اسلام آباد: (ویب ڈیسک) فواد چودھری نے بلاول اور نواز شریف کی ملاقات پر ردعمل دیتے ہوئے کہا کہ دونوں کی سیاسی مقبولیت کا عالم یہ ہے کہ پاکستان تو بھول جائیں لندن میں بھی گارڈز کے بغیر باہر نہیں نکل سکتے۔
پاکستان تحریک انصاف کے رہنما فواد چودھری نے سماجی رابطے کی ویب سائٹ پر ٹویٹ کرتے ہوئے کہا کہ ریسٹورینٹس ٹیبلز پر گارڈ بٹھانے پڑتے ہیں کہ کوئی پاکستانی ہوا تو وہ جوتا نہ مار دے اور یہ لندن میں پاکستان کا اگلا سیٹ آپ ڈسکس کر رہے ہیں۔
فواد چودھری کا کہنا تھا کہ چوں چوں کا مربع حکومت نے عمران خان پر سب سے بڑے دو الزام عائد کئے ہیں، انھوں نے گھڑی خریدی اسے بیچ کر بنی گالہ کی سڑک بنوائی اور دوسرا ہیلی کاپٹر سے روز دفتر آتے تھے، ان دو الزامات سے اندازہ لگا لیں عمران خان نے کس قدر شفاف اور جوابدہ حکومت کی بنیاد رکھی۔
پی ٹی آئی رہنما نے مزید کہا کہ الزام لگانے والوں میں ذرا سی بھی شرم ہوتی وہ ایسی باتیں نہ کرتے، بہرحال اب عمران آپ کے گٹے گوڈوں میں بیٹھ گیا ہے الیکش کراؤ اور گھر جاؤ۔