نئی دہلی: (ویب ڈیسک) ہمارے باورچی خانے میں عام پائی جانے والی ہلدی سے مؤثر ایندھنی سیل اور بیٹریاں بنانے کی راہ ہموار ہوئی ہیں۔
بھارت میں سری ساتھیا سائی انسٹی ٹیوٹ آف ہائرلرننگ اور کلیمسن نینومٹیریئل انسٹی ٹیوٹ ( سی این آئی) نے ہلدی میں موجود ایک جزو کرکیومِن کو جب سونے کے نینوذرات سے ملایا تو انہیں نے اس سے ایک ایسا الیکٹروڈ بنایا جو ایتھانول کو بہت تیزی سے بجلی میں بدلتا ہے اور اس میں روایتی طریقوں سے 100 درجے کم توانائی لگتی ہے۔
اس اہم پیشرفت سے ہائیڈروجن فیول سیل کی منزل اور قریب آگئی ہے تاہم تجارتی پیمانے پر تیاری کے لئے مزید تحقیق کی ضرورت ہے۔ سی این آئی کے سربراہ ڈاکٹر اپارو راؤ نے کہا کہ الکحل کی آکسیڈیشن کے لیے جو عمل انگیز (کیٹے لسٹ) درکار ہوتے ہیں ان میں سے کرکیومن والے نینوذرات سب سے مؤثر ثابت ہوئے ہیں۔
ہم جانتے ہیں کہ ہائیڈروجن جیسے فیول سیل میں احتراق (کمبسشن) کی بجائے کیمیائی تعاملات سے بجلی بنائی جاتی ہے۔ اس سے بالخصوص کاریں، دیگر آلات اور بیک اپ پاور نظام بنایا جاتا ہے۔ اس فہرست میں ہائیڈروجن ایندھی (فیول) سیل کم خرچ اور ماحول دوست ثابت ہوئے ہیں۔
قدرتی طور پر ہائیڈروجن ایک مرکب کی صورت میں ملتا ہے اور اسی وجہ سے اسے قدرتی گیس اور ایندھن سے اخذ کیا جاتا ہے۔ اب روایتی طریقوں سے ہائیڈروجن بنانے کی قیمت ماحولیاتی اثرات کی صورت میں ادا کی جاتی ہے۔
پھر ہائیڈروجن کو سیلنڈر میں بھرکر رکھنا بھی کسی چیلنج سے کم نہیں۔ اس کے مقابلے میں مکئی، گنے اور دیگر اجناس سے الکحل کی ایک قسم ایتھانول سے ہائیڈروجن کشید کرنا قدرے آسان عمل ہے کیونکہ اس سے مائع ہائیڈروجن ملتی ہے۔ لیکن اس میں بھی ضروری ہے کہ ہمارے پاس الیکٹروڈ (برقیرے) بہت مؤثر ہوں اور اس میں ہلدی کا بہترین کردار سامنے آیا ہے۔ یہ الیکٹروڈ کم خرچ اور ماحول دوست ہیں۔
اس سے قبل برقیروں میں پلاٹینم بھی استعمال کیا گیا ہے لیکن وہ پورے عمل میں آکسیڈیشن کے دوران زہریلے مرکبات کی وجہ بنتا ہے اور ایک طرح سے کاربن مونوآکسائیڈ پیدا ہوتی ہے۔ اب سونے کے انتہائی باریک ذرات میں ہلدی کا کیمیکل کرکیومن ملایا گیا ہے اور وہ ایک بہترین الیکٹروڈ ثابت ہوا ہے۔ اس عمل میں نینوذرات سے ایک برقیرہ بنایا گیا اور اس پر کرکیومِن کی چادر چڑھائی گئی ہے۔
توقع ہے کہ اس کم خرچ عمل سے ماحول دوست اور ارزاں ایندھنی سیل بنائے جاسکیں گے۔ دوسری جانب ایندھنی سیل کے علاوہ بھی ان سے حساس سینسر بنائے جاسکتے ہیں جو طبی استعمال میں مددگار ہوسکتے ہیں۔ ایک تجربے میں اس سے دماغ میں ڈوپامائن کی کمی بیشی کو نوٹ کرنے کا کامیاب تجربہ بھی کیا گیا ہے۔

کیلفورنیا: (ویب ڈیسک) اسے غرور نہ سمجھیں کیونکہ اپنی عزت خود کرنے کے بہت سے نفسیاتی، سماجی یہاں تک کے عملی زندگی میں بھی بیش بہا فوائد حاصل ہوتے ہیں۔
اس ضمن میں سائنسدانوں نے پہلے سے موجود لٹریچر اور تحقیق کا جائزہ لے کر بتایا ہے کہ خود توقیری (سیلف اسٹیم) کے نفسیاتی، سماجی، اطلاقی اور عملی فوائد سامنے آئے ہیں۔ یہاں تک کہ آپ کی اطراف لوگوں پر بھی اس کے اثرات مرتب ہوتےہیں۔
امریکن سائیکولوجسٹ میں شائع تازہ تحقیق میں جامعہ کیلیفورنیا ڈیویس میں نفسیات کے پروفیسر رچرڈ رابنس اور ان کے ساتھیوں نے کہا ہے کہ خود کی عزت کرنا بہت ضروری ہے۔ اس سے تعلیم، تعلقات، کاروبار اور ملازمت میں بہت سے فوائد حاصل ہوتے ہیں۔ اس کے لیے سائنسدانوں نے ایک دو نہیں بلکہ سینکڑوں مطالعوں کا تجزیہ کیا ہے۔
خودتوقیری دماغی، نفسیاتی اور جسمانی صحت میں بھی اہم کردار ادا کرتی ہے اور زندگی میں کئی مقامات پر کامیابیاں دلاتی ہے۔ یہاں تک کہ اس کے طویل اثرات ساری عمربرقرار رہتے ہیں۔ اگرچہ دیگر عوامل بھی اپنی جگہ اہمیت رکھتے ہیں لیکن خودتوقیری کو نظرانداز نہیں کیا جاسکتا۔
اپنے بارے میں مثبت رائے اور اچھا رویہ بھی بہت اہم کردار کا حامل ہوتا ہے اور ایک سال بھی یہ رحجان مستقبل تک پر اثر ڈالتا ہے۔ اس ضمن میں پروفیسر رچرڈ نے خود کئی برس تک سیلف اسٹیم کا جائزہ لیا ہے۔ وہ کہتے ہیں کہ لوگ اس نرگسیت، خود پسندی اور غرور قرار دیتے ہیں جو کہ درست نہیں کیونکہ خود توقیری کا مطلب یہ ہے کہ آپ اپنی نظروں میں اپنی کتنی عزت کرتے ہیں۔ یہی وجہ ہے کہ اسے غرور اور خودپسندی قرار دینا درست نہیں۔
رچرڈ کہتے ہیں کہ زندگی کے مختلف ادوار میں اس کے فوائد ایک عشرے سےدوسری دہائی تک جاتے ہیں اور یہ سلسلہ جاری و ساری رہتا ہے۔ رچرڈ کہتے ہیں کہ خودتوقیری اور خود پسندی ایک دوسرے کی الٹ ہیں یہی وجہ ہے کہ خود توقیری کو برقرار رکھنا بہت ضروری ہے۔
تاہم پروفیسر رچرڈ نے اس پر مزید تحقیق پر زور دیا ہے۔