کراچی : (ویب ڈیسک) سابق وزیر داخلہ شیخ رشید نے رمضان المبارک کے مقدس مہینے میں عمرے کی سعادت حاصل کر لی۔ روضہ رسولﷺ پر حاضری کی تصویر بھی جاری کر دی گئی۔
عوامی مسلم لیگ کے سربراہ شیخ رشید کے ٹوئٹر اکاونٹ سے ان کی روضہ رسول ﷺ پر حاضری کی تصویر جاری کر دی گئی ہے ۔
سوشل میڈیا پلیٹ فارم پر جاری کی گئی اس تصویر کے ساتھ پیغام میں لکھا گیا ہے کہ شیخ رشید نے عمرہ کی ادائیگی کے بعد روضہ رسول ﷺپر حاضری دی۔
سابق وزیر داخلہ شیخ رشید گزشتہ اتوار کی شام جناح انٹرنیشنل ائیر پورٹ کراچی سے جدہ روانہ ہوئے تھے۔

لاہور (صدف نعیم)ڈپٹی سپیکر پنجاب اسمبلی دوست مزاری نے چینل فائیو سے گفتگو کرتے ہوئے کہا کہ 16 اپریل کو اسمبلی میں جو کچھ ہوا اس پر بہت افسوس ہے‘ ہمارے پارلیمنٹ کی بے تو قیری کی گئی ہے میں سمجھتا ہوں کہ اس کی انکوائری high level پر ہونی چاہئے جس میں تمام لوگوں کو درمیان میں بٹھایا جائے تاکہ ہر بات کا پتہ لگے قوم کو یہ بتانا بہت ضروری ہے حقیقت کیا تھی کس نے کیا کیا ۔میرے ساتھ جو کچھ بھی ہوا وہ سب پہلے سے پلان تھا۔ مجھے کسی چیز کا علم نہیں تھا میں سمجھ رہا تھا ہو سکتا ہے کچھ دائرے میں رہ کر میرے خلاف احتجاج ہو لیکن میرے ہی ساتھ بیٹھنے والوں نے تمام حدیں توڑ دیں۔

وزیراعظم شہباز شریف کی اتحادیوں پر مشتمل 34 رکنی وفاقی کابینہ نے حلف اٹھا لیا ہے۔

وفاقی کابینہ کی حلف برداری کی تقریب منگل کو ایوان صدر میں منعقد ہوئی جس میں قائم مقام صدر چیئرمین سینیٹ صادق سنجرانی نے نئی کابینہ کے اراکین سے حلف لیا۔

وفاقی کابینہ مجموعی طور پر 34 اراکین پر مشتمل ہے جس میں 30 وفاقی وزرا، چار وزرائے مملکت اور تین مشیر شامل ہیں۔

کابینہ میں شامل وفاقی وزرا میں خواجہ آصف، احسن اقبال، رانا ثنااللہ، ایاز صادق، مفتاح اسماعیل، میاں جاوید لطیف، ریاض حسین پیرزادہ، خرم دستگیر، رانا تنویر حسین، مریم اورنگزیب، خرم دستگیر، مرتضیٰ جاوید عباسی، خواجہ سعد رفیق شامل ہیں۔

اس کے علاوہ اعظم نذیر تارڑ، خورشید شاہ، نوید قمر، شیری رحمٰن، عبدالقادر پٹیل، شازیہ مری، سید مرتضیٰ محمود، ساجد حسین طوری، احسان الرحمٰن مزاری، عابد حسین بھایو بھی کابینہ کے وفاقی وزرا میں شامل ہیں۔

کابینہ میں شامل دیگر وفاقی وزرا میں اسعد محمود، سید عبدالواسع، مفتی عبدالشکور، محمد طلحہ محمود، سید امین الحق، فیصل سبزواری، اسرار ترین، شاہ زین بگٹی شامل ہیں۔

وزرائے مملکت میں مسلم لیگ(ن) کی عائشہ غوث پاشا اور عبدالرحمٰن کانجو، پیپلز پارٹی کی حنا ربانی کھر اور مصطفیٰ نواز کھوکھر شامل ہیں۔

مشیروں میں مسلم لیگ(ن) کے مفتاح اسماعیل، پیپلز پارٹی کے قمر امان کائزہ اور ترین گروپ کے عون چوہدری شامل ہیں۔

کابینہ کے ارکان کی حلف برداری کی تقریب پیر کو ہونی تھی تاہم صدر عارف علوی نے اراکین اسمبلی سے حلف لینے سے انکار کردیا تھا جس کے باعث حکومت کو تقریب منگل کی صبح 11 بجے تک ملتوی کرنی پڑی۔

حکومت کی ترجمان محترمہ مریم اورنگزیب نے پیر کو پریس کانفرنس میں کہا تھا کہ کابینہ کے ارکان کی فہرست کو حتمی شکل دینا ابھی باقی ہے اور عندیا دیا کہ حلف برداری کی تقریب سے قبل آخری لمحات میں تبدیلیاں کی جا سکتی ہیں۔

حکمران جماعت مسلم لیگ(ن) کے رہنما خواجہ آصف نے نجی ٹی وی کے پروگرام میں دعویٰ کیا تھا کہ اتحادی جماعتوں کے تمام تحفظات دور کر دیے گئے ہیں اور تقریب حلف برداری منگل کو ہو گی۔

انہوں نے نئی کابینہ میں وزارتیں حاصل کرنے والے مسلم لیگ(ن) کے کچھ رہنماؤں کے نام بھی افشا کیے تھے جن میں احسن اقبال کو پلاننگ اینڈ ڈیولپمنٹ، اعظم نذیر تارڑ قانون، شاہد خاقان عباسی کو توانائی، جبکہ ایاز صادق کو اقتصادی امور کی وزارت ملے گی۔

اس سے قبل حکمراں مسلم لیگ (ن) کے اندر مخالفت کے باوجود مریم اورنگزیب کو وزیر اطلاعات اور رانا ثنااللہ کو وزیر داخلہ کا قلمدان دینے کا غیر رسمی اعلان کیا گیا تھا اور کہا جاتا تھا کہ مفتاح اسماعیل کو وزیر خزانہ یا مشیر بنایا جائے گا۔

خواجہ آصف نے دعویٰ کیا کہ پیپلز پارٹی کے چیئرمین بلاول بھٹو زرداری کو وزارت خارجہ دی جائے گی تاہم پاکستان پیپلز پارٹی کے ایک رہنما نے ڈان کو بتایا کہ پارٹی چیئرمین منگل کو اعلان کیے جانے والی کابینہ کا پہلے مرحلے میں حصہ نہیں بن رہے اور وہ کچھ دنوں بعد وزارت کا انتخاب کر سکتے ہیں۔

پشاور: (ویب ڈیسک) خیبرپختونخوا کے قبائلی ضلع سنٹرل اورکزئی میں کوئلے کی کان میں پانی بھرنے سے تین مزدور جاں بحق جبکہ دو زخمی ہو گئے۔
اورکزئی انتظامیہ کے مطابق سنٹرل اورکزئی میں کوئلے کی کان میں پانی بھرنے سے 5 مزدور پھنس گئے، امدادی کارروائیوں کے دوران دو مزدوروں کو نکال لیا گیا جبکہ تین جاں بحق ہوگئے۔
انتظامیہ کے مطابق جاں بحق تینوں مزدورں کا تعلق شانگلہ سے ہے، زخمیوں کو قریبی ہسپتال منتقل کردیا گیا۔

اسلام آباد: (ویب ڈیسک) جہانگیر ترین گروپ کو مرکز میں اہم ذمہ داری دینے کا فیصلہ کر لیا گیا، مرکزی رہنما عون چودھری کو وزیراعظم کا مشیر بنانے کے اعلان کے بعد کابینہ ڈویژن نے سمری تیار کرلی۔
تحریک انصاف کی حکومت کے خاتمے میں اہم کردار ادا کرنے والے ترین گروپ کو وفاق حکومت میں اہم ذمہ داری دینے کا فیصلہ کیا ہے، اس ضمن میں ترین گروپ کے مرکزی رہنما عون چوہدری کو وزیراعظم کا مشیر بنانے کا فیصلہ کیا گیا ہے، اس ضمن میں کابینہ ڈویژن نے سمری تیار کرلی ہے۔
جہانگیر ترین کی جانب سے عون چوہدری نے وفاق اور پنجاب کے معاملات میں اہم کردار ادا کیا تھا، انہوں نے پنجاب میں بزدار سرکار کے خلاف حمزہ شہباز سے تعاون کے لئے اہم ملاقاتیں کیں اور ترین گروپ کی جانب سے تمام معاملات کو حتمی شکل دی تھی۔