اسلام آباد: (ویب ڈیسک) توشہ خانہ کے تحائف سے متعلق مریم نواز کے ٹویٹ پر پی ٹی آئی رہنما فرخ حبیب کا ردعمل آگیا۔
مسلم لیگ ن کی مرکزی نائب صدر مریم نواز نے ٹویٹر پر عمران خان پر تنقید کرتے ہوئے لکھا تھا کہ میرے تحائف میرے مرضی نہیں، حساب تو دینا پڑے گا۔
مریم نواز نے لکھا تھا کہ تحفے بھی ریاست کے اور مرضی بھی ریاست کی چلے گی۔
لیگی نائب صدر نے مزید لکھا کہ آنکھیں کھول لو اب تمہاری دھونس نہیں چلے گی، تمہاری جعلی حکومت اور تمہارا مستقبل دونوں ختم ہوگئے اب حساب تو دینا پڑے گا۔
اب پی ٹی آئی رہنما نے ان کے بیان پر ردعمل دیتے ہوئے کہا ہے کہ بی ایم ڈبلیو گاڑی کا جواب دو، بی ایم ڈبلیو گاڑی توشہ خانہ سے معمولی قیمت پر لے گئے تھے۔
ان کا کہنا تھا کہ توشہ خانہ پر نوازشریف کا فرمان پڑھ لوجو فواد حسن فواد نےجاری کیا تھا جس میں لکھا تھا کہ توشہ خانہ پر انفارمیشن پبلک کرنے سےمیڈیا ہائپ بنے گی، لکھا گیا بیرون ممالک سے تعلقات خراب ہوسکتے اور ملک کا مفاد خراب ہوگا۔

سیالکوٹ: (ویب ڈیسک) انسداد دہشت گردی عدالت نے سیالکوٹ میں سری لنکن شہری پریانتھا کمارا قتل کیس کا فیصلہ سنادیا۔
انسداد دہشت گردی عدالت نے سری لنکن شہری پریانتھا کمارا قتل کیس میں 6 مجرموں کو سزائے موت سنادی۔
عدالت نے کیس کے 7 مجرموں کو عمر قید کی سزا سنائی ہے، جب کہ 76 مجرموں کو 2،2 سال قید کی سزا سنائی گئی ہے۔
انسداد دہشت گردی عدالت نے کیس کا ٹرائل کوٹ لکھپت جیل لاہور میں مکمل کیا۔
گذشتہ سال3 دسمبر کو سیالکوٹ میں اسپورٹس گارمنٹ کی فیکٹری کے غیر مسلم سری لنکن منیجر پریانتھا کمارا پر فیکٹری ورکرز نے مذہبی پوسٹر اتارنے کا الزام لگا کر حملہ کردیا تھا، پریانتھا کمارا جان بچانےکیلئے بالائی منزل پر بھاگے لیکن فیکٹری ورکرز نے پیچھا کیا اور چھت پر گھیر لیا۔
انسانیت سوز خونی کھیل کو فیکٹری گارڈز روکنے میں ناکام رہے، فیکٹری ورکرز نے منیجر کو اوپر سے نیچے پھینک دیا اور پھر لاش کو گھسیٹ کر فیکٹری سے باہر چوک پر لے گئے، ڈنڈے مارے، لاتیں ماریں اور پھر آگ لگا دی۔
کیس میں 100 سے زائد افراد کو گرفتار کیا گیا تھا جب کہ بعض افراد کو ابتدائی تفتیش کے بعد رہا کردیا گیا۔
قتل کیس میں ملوث افراد کا فارنزک ٹیسٹ اور فوٹو گرافک ٹیسٹ بھی کیا گیا اور سوشل میڈیا پر سامنے آنے والی ویڈیوز میں موجود افراد کے چہروں کا باریک بینی سے جائزہ لیا گیا۔
12 مارچ کو انسداد دہشت گردی کی عدالت نے سیالکوٹ میں سری لنکن شہری پریانتھا کمارا کے قتل کیس میں 89 ملزمان پر فرد جرم عائد کی تھی۔
گوجرانوالا کی انسداد دہشت گردی کی خصوصی عدالت کی جج نتاشہ نسیم نے سیالکوٹ میں سری لنکن شہری پریانتھا کمارا کے قتل کیس پر کوٹ لکھپت جیل لاہور میں سماعت کی تھی۔
پراسیکیوشن نے بالغ اور نابالغ ملزمان کےخلاف علیحدہ علیحدہ چالان جمع کرائے، پہلے چالان میں 80 بالغ ملزموں کو نامزد کیا گیا جبکہ دوسرا چالان 9 نابالغ ملزموں کا پیش کیا گیا ۔
پراسیکیوشن کی جانب سے 40 گواہوں، واقعےکی ویڈیوز، ڈیجیٹل شواہد، ڈی این اے شواہد اور فارنزک شواہد کو چالان کا حصہ بنایا گیا تھا، کیس میں گرفتار تمام ملزمان نے صحت جرم سے انکار کیا تھا۔