صدر آزاد جموں و کشمیر نے قانون ساز اسمبلی کے قائد کے انتخاب کے لیے اجلاس 18 اپریل کو صبح ساڑھے 10 بجے طلب کر لیا ہے۔

ذرائع کے مطابق اسپیکر قانون ساز اسمبلی چوہدری انوار الحق وزارت عظمیٰ کا انتخابی عمل مکمل کرائیں گے۔

آزاد جموں و کشمیر قانون ساز اسمبلی میں وزیر اعظم کے انتخاب میں 53 اراکین اسمبلی ووٹ ڈالیں گے جبکہ کامیابی کے لیے 27 ووٹ درکار ہیں۔

آزاد کشمیر اسمبلی میں پی ٹی آئی کے 32، پپیپلز پارٹی کے 12، مسلم لیگ 7، جے کے پی پی اور مسلم کانفرنس کا ایک ایک ووٹ ہے۔

ذرائع کے مطابق چیئرمین تحریک انصاف عمران خان نے سردار تنویر الیاس کو وزارت عظمیٰ کا امیدوار نامزد کر دیا ہے جبکہ پیپلزپارٹی آزاد کشمیر اور مسلم لیگ ن کے مشترکہ امیدوار چوہدری یاسین ہوں گے۔

آزاد کشمیر کے آئین کے مطابق وزارت عظمیٰ کا انتخاب شو آف ہینڈ کے ذریعے ہو گا جبکہ وزارت عظمیٰ کی کامیابی کے لیے دونوں اطراف سےکامیابی کے دعوے کیے جا رہے ہیں۔

‏وزیراعظم شہبازشریف کا دیامیر بھاشا ڈیم کی تعمیراتی سائیٹ کا دورہ۔چلاس کے شہریوں کے لئے معیاری علاج اور دوائی کی فراہمی کے لئے ہسپتال کی تعمیر کی ہدایت تاکہ علاقے کے عوام کو علاج کے لئے اسلام آباد کا دور دراز سفر نہ کرنا پڑے دروازے کی دہلیز پر علاج کی بہترین سہولیات میسر آئیں
‏تمام سال ٹریفک کو رواں رکھنے کے لئے بابوسر ٹاپ ٹنل کے لئے احکامات جاری۔ اسی ہفتے میں فیزیبیلیٹی تیار کرنے کی ہدایت .دیامیر بھاشا ڈیم منصوبے کو 2029 کے بجائے 3 سال پہلے 2026 میں مکمل کرنے کی ہدایت –

اسلام آباد: (ویب ڈیسک) تحریک انصاف کے رہنما فواد چودھری کا کہنا ہے کہ امپورٹڈ حکومت کے خاتمے کی کال آنے والی ہے۔
فواد چودھری نے پشاور اورکراچی میں پی ٹی آئی کے کامیاب جلسے کے بعد سوشل میڈیا پلیٹ فارم ٹوئٹر پر پیغام میں کہا ہے کہ پشاور اور کراچی نے بتا دیا ہے کہ ملک نرم انقلاب کیلئے تیار ہے۔
انہوں نے اپنی ٹویٹ میں لکھا ہے کہ پاکستان کا ہر شہر تحریر اسکوائر بنے گا۔امپورٹڈ حکومت کے خاتمے کی کال آنے والی ہے تیار رہو۔عمران خان کے اعلان کا انتظار کرو۔

لاہور: (ویب ڈیسک) نومنتخب وزیراعلیٰ پنجاب کی حلف برداری آج ہو گی، حمزہ شہباز گورنر ہاؤس میں حلف اٹھائیں گے۔ تقریب میں وزیراعظم شہباز شریف اور مریم نواز کی شرکت بھی متوقع ہے۔
حلف برداری کی تقریب رات آٹھ بجے گورنر ہاوس میں ہو گی۔ تاحال واضح نہیں ہو سکا کہ سپیکر یا گورنر میں سے حلف کون لے گا،گورنر پنجاب عمر سرفراز چیمہ نے تاحال حلف لینے یا نہ لینے کا فیصلہ نہیں کیا۔ ڈپٹی سپیکر پنجاب اسمبلی نے متعلقہ اداروں کو انتخابی نتائج سے متعلق مراسلہ جاری کر دیا ہے۔ گورنر ہاؤس کو بھی وزیراعلیٰ کے انتخابی نتائج سے آگاہ کر دیا گیا ۔
یاد رہے کہ پنجاب اسمبلی میں گذشتہ روز وزیراعلی پنجاب کے الیکشن کے دوران شدید ہنگامہ آرائی ہوئی اورچودھری پرویز الٰہی زخمی ہوگئے تھے۔

لاہور: (ویب ڈیسک) گورنر پنجاب عمر سرفراز چیمہ نے کہا ہے کہ پنجاب اسمبلی میں وزیراعلی کے الیکشن کے دوران ہنگامہ آرائی کی سخت مذمت کرتے ہیں، انہوں نے سیکرٹری پنجاب اسمبلی سے الیکشن کارروائی کی رپورٹ طلب کر لی۔
گورنر پنجاب عمر سرفراز چیمہ کا کہنا تھا کہ ‏پارلیمان کا تقدس اور آئین کا تحفظ اسمبلی ممبران کی ذمہ داری ہے‏۔ یاد رہے کہ پنجاب اسمبلی میں گذشتہ روز ہنگامہ آرائی کے دوران چودھری پرویز الٰہی زخمی ہوگئے تھے۔
چودھری پرویز الٰہی نے کہا کہ میری طبیعت بہت خراب ہے، مجھے مارنے کی کوشش کی گئی، یہ مجھے اپنی طرف سے ختم کرکے گئے ، شہباز شریف کے فون پر یہ کارروائی ہوئی، میں ابھی بھی سپیکر ہوں، یہ سپیکر کے ساتھ ہو رہا ہے، میرا بازو توڑ دیا ہے، یہ شریفوں کی جمہوریت ہے۔

لاہور: (ویب ڈیسک) حمزہ شہباز کی بطور وزیراعلیٰ پنجاب کامیابی کا مراسلہ جاری کر دیا گیا، نوٹیفکیشن گورنر ہاؤس کو موصول ہو گیا ہے۔
ڈپٹی سپیکر پنجاب اسمبلی نے متعلقہ اداروں کو انتخابی نتائج سے متعلق مراسلہ جاری کر دیا۔ گورنر ہاؤس کو بھی وزیراعلیٰ کے انتخابی نتائج سے آگاہ کر دیا گیا ہے۔ وزیراعلیٰ پنجاب حمزہ شہباز کی حلف برداری آج ہو گی۔ نو منتخب وزیراعلیٰ حمزہ شہباز گورنرہاؤس میں حلف اٹھائیں گے۔ حلف برداری کی تقریب رات آٹھ بجے گورنر ہاؤس میں ہو گی۔
حلف کون لے گا، سپیکر یا گورنر تاحال فیصلہ نہ ہو سکا، گورنر پنجاب عمر سرفراز چیمہ نے تاحال حلف لینے یا نہ لینے کا فیصلہ نہیں کیا۔