ٹوکیو: (ویب ڈیسک) دنیا کا سب سے مہنگا ترین تربون جاپان میں پایا جاتا ہے جس کی قیمت 10 لاکھ روپے سے زائد ہے۔
غیر ملکی خبر رساں ایجنسی کے مطابق دنیا بھر میں تربوز کی لگ بھگ 1200 اقسام ہیں لیکن ڈینسیوک تربوز دنیا کا سب سے مہنگا ترین تربوز ہے جو جاپان میں پایا جاتا ہے۔
تربوز کے نایاب ہونے کی کئی وجوہات ہیں۔ اول یہ بالکل گول اور سیاہ ہوتا ہے۔ اندر سے گودا قدرے سرخ اور مزیدار ہوتا ہے۔ یہ تربوز جتنا میٹھا ہوگا اس کی قیمت بھی اتنی ہی ہوگی۔ دوسری وجہ یہ ہے کہ یہ بہت کم تعداد میں پیدا ہوتا ہے اور مشکل سے ایک سال میں 100 پھل ہی اگائے جاتے ہیں جو اسے دنیا کا نایاب ترین تربوز بناتے ہیں۔
جاپان میں بعض اشیا کو امرا کی مرغوب غذا کا درجہ حاصل ہے جن میں وھیل کا گوشت، سوشی اور دیگر اقسام کے پھل انتہائی مہنگے ہیں اور ہر غذا ایک نیا ریکارڈ بناتی ہے۔ ان میں ڈینسیوک تربوز بھی شامل ہے جس کی قیمت 5 سے 6 ہزار ڈالر تک ہے۔
پوری دنیا میں یہ جاپان کے ایک چھوٹے سے جزیرے ہوکائیڈو میں کاشت کیا جاتا ہے۔ اسے بہت احتیاط سے پیک کرکے مرکزی بازار میں پہنچایا جاتا ہے اور وہاں اس کی بولی لگائی جاتی ہے۔ سینکڑوں ڈالر سے شروع ہونے والی بولی ہزاروں ڈالر تک جاپہنچتی ہے۔
مہنگا ترین تربوز، قیمت 10 لاکھ روپے
