چین کے مشرقی صوبے جیانگ شی میں شدید بارشوں کے باعث مٹی کا تودہ گرنے سے کم از کم ایک شخص ہلاک جبکہ 11 افراد لاپتا ہوگئے۔ یہ واقعہ ہفتے کی صبح جیانگ شی کے شہر جی آن کے سوئی چوان کاؤنٹی کے ایک گاؤں میں پیش آیا۔
حکام کے مطابق لینڈ سلائیڈنگ نے تقریباً 12 گھروں کو نقصان پہنچایا۔ ریسکیو ٹیموں نے ملبے سے تین افراد کو نکالا، جن میں سے ایک کو مردہ قرار دیا گیا جبکہ دو افراد کو زندہ اور مستحکم حالت میں بچا لیا گیا۔
چینی حکام کے مطابق علاقے میں کئی روز سے جاری شدید موسلا دھار بارشیں ٹائفون ’ساؤڈل‘ کے باعث ہوئیں، جس کے بعد لینڈ سلائیڈنگ کا واقعہ پیش آیا۔ ٹائفون نے چین کے دیگر جنوبی اور مشرقی علاقوں میں بھی شدید بارشوں اور سیلاب کی صورتحال پیدا کی ہے۔
حادثے کے فوراً بعد امدادی ٹیمیں جائے وقوعہ پر پہنچ گئیں اور لاپتا افراد کی تلاش کے لیے بڑے پیمانے پر ریسکیو اور سرچ آپریشن شروع کردیا گیا۔ متاثرہ علاقوں سے لوگوں کو محفوظ مقامات پر منتقل کیا جا رہا ہے جبکہ حکام مزید لینڈ سلائیڈنگ اور دیگر ممکنہ ثانوی آفات سے بچاؤ کے اقدامات بھی کر رہے ہیں۔
دوسری جانب ٹائفون ساؤڈل کے باعث چین کے صوبہ فوجیان میں بھی شدید بارشوں اور سیلاب سے بڑے پیمانے پر نقصان ہوا ہے۔ حکام کے مطابق فوجیان میں لاکھوں افراد کو خطرناک علاقوں سے منتقل کیا گیا، جبکہ بعض علاقوں میں مکانات منہدم اور سڑکیں زیر آب آگئیں۔
