لاہور(نیوز ایجنسیاں) وزیر اعلیٰ پنجاب مریم نوازشریف نے اپنے بیان میں کہا ہے کہ مولانا فضل
الرحمن جیسے سینئر سیاستدان، جو خود دہشت گردی کا شکار رہے ہیں، ان سے دہشت گردی کی پشت پناہی کرنے والوں کی حمایت کی توقع نہیں تھی۔ نااہلی، نالائقی اور کرپشن سے خیبر پختونخوا کی بربادی کے ذمہ داروں کو کٹہرے میں کھڑا کرنے کے بجائے ان کی حمایت میں بات کرنا نہایت افسوسناک ہے۔ وزیراعلیٰ مریم نوازشریف نے کہاکہ جن کی حمایت میں بیانات جاری ہو رہے ہیں، ان سے پوچھا جائے کہ کیا تیرہ سال میں وہ کسی ایک شہید کے جنازے میں بھی شریک ہوئے؟ الٹا دہشت گردوں کو پناہ دی، انہیں پالا پوسا اور پاکستان پر حملہ آور ہونے کے لیے وسائل، پناہ گاہیں اور اپنے صوبے کی زمین فراہم کی۔وزیراعلیٰ مریم نوازشریف نے کہاکہ یہ وہی لوگ ہیں جنہوں نے خیبر پختونخوا میں نااہلی کے انبار لگا دیے، وہاں کے عوام کی زندگیاں تباہ و برباد کر دیں اور انہیں دہشت گردی کی نذر کر دیا۔ صوبے کے قیمتی وسائل دھرنوں اور احتجاجوں پرخرچ کر دیے، اور تیرہ قیمتی سال کرپشن اور نالائقی کی نذر کر دئیے۔وزیراعلیٰ مریم نوازشریف نے کہاکہ جس سپہ سالار نے معرکہ حق میں ملک کو تاریخی فتح سے ہمکنار کیا اور جس کی قیادت میں پاکستان کو حرمین شریفین کے تحفظ کا اعزاز ملا، اس کے بارے میں مولانا صاحب کے الفاظ نے ہر محبِ وطن پاکستانی کا دل دکھایا ہے۔وزیراعلیٰ مریم نوازشریف نے کہاکہ پاک فوج کے افسر اور جوان آج بھی دہشت گردی کا ناسور ختم کرنے کے لیے سینوں پر گولیاں کھا رہے ہیں۔ ہر روز کسی ماں کا لختِ جگر، کسی بہن کا بھائی اور کسی کا شوہر سبز ہلالی پرچم میں لپٹ کر گھر آتا ہے۔ان شہیدوں کے لہو کو سلام پیش کرنے اور اپنی فوج کے ساتھ کھڑے ہونے کے بجائے دہشت گردی کے خاتمے کی راہ میں رکاوٹ بننے والوں کا ساتھ دینا آپ کے شایانِ شان نہیں۔وزیراعلیٰ مریم نوازشریف نے کہاکہ آپ کی جماعت نے خود دہشت گردی کے زخم سہے ہیں، آپ کے ساتھیوں نے شہادتیں دی ہیں اور جن کی حمایت میں آج آپ کھڑے ہیں، کل یہی آپ کے بارے میں انتہائی ناشائستہ زبان استعمال کرتے اور ذاتی حملے کرتے رہے ہیں۔ دہشت گردی کے متاثرین کا دہشت گردی کی پشت پناہی کرنے والوں کے ساتھ کھڑا ہونا کم از کم میری سمجھ سے باہر ہے۔دریں اثناء وزیراعلیٰ پنجاب مریم نواز شریف نے خوراک کے عالمی دن پردوسروں کی خوراک کے لئے محنت کرنے والوں کو سلام پیش کیا ہے۔ وزیراعلیٰ مریم نواز شریف نے اناج کی صورت میں خوراک اگانے والے کاشتکاروں اورکسان بھائیوں کو خراج تحسین پیش کیا ہے۔ عالمی یوم خوراک پراپنے پیغام میں وزیراعلیٰ مریم نوازشریف نے کہا کہ عالمی یوم خوراک کا مقصد غذائی تحفظ کیلئے مشترک کاوشوں کے عزم کا اعادہ کرنا ہے۔دنیا بھر میں ہر سطح پر غذائی تحفظ کی کاوشوں کو موسمیاتی تبدیلیوں سمیت بہت سے چیلنج کا سامنا ہے۔ غیر معمولی ماحولیاتی تبدیلیاں مناسب خوراک کی فراہمی کو متاثر کرنے کا سبب بن رہیں ہیں۔ ہر فرد کو متناسب خوراک کی فراہمی پائیدار ترقی کی علامت ہے۔وزیراعلیٰ مریم نواز شریف نے کہا کہ خوراک کی ضروریات کو پورا کرنے کیلئے زراعت میں جدت اور میکانائزیشن کو اپنانا ہوگا۔حکومت پنجاب صوبہ بھر میں اناج کی بہتر پیداوار کیلئے کاشتکاروں کی معاونت کررہی ہے۔ پنجاب میں کسان کارڈ، گرین ٹریکٹر سکیم،میکانائزیشن اور دیگر اقدامات سے پیداوار میں اضافہ یقینی بنایا جارہا ہے۔ ماڈل ایگری مال میں پنجاب کے کاشتکار کو تمام تر سہولیات ایک چھت تلے فراہم کی جارہی ہیں۔ انہوں نے کہا کہ پنجاب کے مختلف شہروں میں دس مزید ایگری مال قائم کریں گے۔ عالمی یوم خوراک پر موسم کی سختیوں سے نبردآزما کاشتکار کی محنت کو نہیں بھولنا چاہیے۔ پنجاب کے کاشتکار بھائی ملک بھر کے عوام کی ضروریات کو پورا کرنے کیلئے قابل قدرخدمات سرانجام دے رہے ہیں۔
مریم نواز
