عالمی نمبر ایک ٹینس کھلاڑی آریانا سبالینکا کو یو ایس اوپن کے تیسرے راؤنڈ کے دوران اس وقت غیر معمولی صورتحال کا سامنا کرنا پڑا جب کورٹ پر چرس کی شدید بو پھیل گئی۔ بیلاروس کی کھلاڑی نے میچ عارضی طور پر روک کر چیئر امپائر سے اس معاملے کی شکایت کی۔
سبالینکا کامیلا راخیمووا کے خلاف لوئس آرمسٹرانگ اسٹیڈیم میں میچ کھیل رہی تھیں اور ابتدائی مرحلے میں 3-0 کی برتری حاصل کرچکی تھیں۔ دوسرے سروس گیم کے دوران انہوں نے اچانک کھیل روکا اور امپائر ایوا اسدراکی مور سے کہا کہ کسی کے چرس پینے کی وجہ سے بو بہت تیز ہے۔
سبالینکا نے بعد ازاں میڈیا سے گفتگو میں کہا کہ انہیں اس سے پہلے یو ایس اوپن میں چرس کی بو ضرور محسوس ہوئی تھی، لیکن اس مرتبہ بو غیر معمولی طور پر شدید تھی اور اس سے مقابلے کے دوران توجہ برقرار رکھنا مشکل ہوگیا۔ انہوں نے تماشائیوں سے اپیل کی کہ وہ ٹینس کورٹ کے قریب سگریٹ نوشی یا چرس استعمال کرنے سے گریز کریں۔
یو ایس اوپن انتظامیہ کے مطابق ٹینس سینٹر کے اندر کسی بھی قسم کی سگریٹ نوشی کی اجازت نہیں۔ تاہم نیویارک میں 21 سال سے زائد عمر کے افراد کے لیے تفریحی استعمال کی بھنگ قانونی ہے، جبکہ قریبی فلشنگ میڈوز-کورونا پارک سے آنے والا دھواں ہوا کے ذریعے اسٹیڈیم تک پہنچ سکتا ہے۔
انتظامیہ نے واقعے کے بعد تماشائیوں میں ممکنہ طور پر سگریٹ نوشی کرنے والے افراد کی تلاش بھی کی، تاہم کسی مخصوص شخص کی نشاندہی نہیں ہوسکی اور کسی تماشائی کو اس معاملے پر اسٹیڈیم سے باہر نہیں نکالا گیا۔
دلچسپ بات یہ ہے کہ غیر متوقع رکاوٹ کے باوجود سبالینکا نے میچ پر گرفت برقرار رکھی اور راخیمووا کو 6-3، 6-4 سے شکست دے کر یو ایس اوپن کے چوتھے راؤنڈ میں جگہ بنا لی۔ یہ نیویارک میں ان کی مسلسل 16ویں یو ایس اوپن فتح تھی۔
