اسلام آباد: (ڈیلی خبریں) وزیراعظم عمران خان سے پاک فضائیہ کے سربراہ ائیر چیف مارشل ظہیر احمد بابر کی ملاقات ہوئی ہے۔
وزیراعظم آفس کی جانب سے جاری اعلامیہ کے مطابق وزیرِاعظم عمران خان سے پاک فضائیہ کے سربراہ ائیر چیف مارشل ظہیر احمد بابر کی ملاقات ہوئی ہے۔ ملاقات میں ملک کی فضائی حدود کے دفاع سے متعلق پیشہ ورانہ امور پر گفتگو کی گئی۔
اسلام آباد: (ڈیلی خبریں) سابق وزیراعظم نواز شریف کی وطن واپسی کے معاملے پر اٹارنی جنرل نے پنجاب حکومت کو خط لکھ دیا۔ خط میں نواز شریف کی میڈیکل رپورٹس پر ماہرانہ رائے طلب کی گئی ہے۔
خط میں پنجاب حکومت کو کہا گیا ہے کہ لاہور ہائیکورٹ میں جمع کرائی گئی رپورٹس پر ماہرین سے رائے لی جائے۔ ماہرین کی آراء کی روشنی میں ہی نواز شریف کی واپسی سے متعلق آئندہ کا لائحہ عمل اپنایا جائے گا۔ ذرائع کا کہنا ہے کہ اگر طبی ماہرین نے نواز شریف کی صحت بہتر قرار دی تو ان کے معالج سے رابطہ کیا جائے گا۔
واضح رہے کہ گزشتہ روز وفاقی کابینہ نے نواز شریف کی عدم واپسی پر ان کے ضامن شہباز شریف کے خلاف عدالت جانے کا فیصلہ کیا تھا۔ کابینہ نے اٹارنی جنرل کو ہدایت کی تھی کہ اس حوالے سے تمام قانونی آپشنز پر غور کرتے ہوئے عدالتوں سے رجوع کریں۔
کابینہ کا کہنا تھا کہ نواز شریف اور شہباز شریف نے عدالت میں بیان حلفی اور ضمانت واپسی کی خلاف ورزی کا مذاق اڑایا ہے۔ سابق وزیر اعظم جیل سے ضمانت پر رہائی کے بعد نومبر 2019 میں علاج کے بیرون ملک گئے تھے تاہم وہ اب تک واپس نہیں آئے۔
اسلام آباد: (ڈیلی خبریں) سپریم کورٹ نے خیبرپختونخوا میں اے این ایف کا دائرہ اختیارختم کرنے سے متعلق کیس میں صوبائی حکومت سے پیشرفت رپورٹ طلب کر لی، جسٹس عمر عطا بندیال نے ریمارکس دیئے کہ سمگلنگ مافیا، نارکوٹیکس مافیا، لینڈ مافیا کو قانون کی گرفت میں لانا ضروری ہے۔
جسٹس عمرعطا بندیال کی سربراہی میں تین رکنی بینچ نے درخواست پر سماعت کی، جسٹس عمرعطا بندیال نے ریمارکس دیئے کہ انسداد منشیات سے متعلق صوبائی حکومت کے قانون میں اختلاف کا جائزہ لیں گے، منشیات معاشرے کیلئے بہت بڑا مسئلہ ہے۔
پراسیکیوٹر اے این ایف نے بتایا کہ نئے قانون میں اے این ایف کے اختیارات کو محدود کر دیا، ایڈووکیٹ جنرل کے پی بولے کہ وزیراعظم نے اجلاس میں اے این ایف کو لیڈ ایجنسی کا رول دینےکی ہدایت کی ہے، انسداد منشیات کے قانون میں ترامیم کا مسودہ کابینہ نے منظورکر لیا ، اب صوبائی اسمبلی سے منظورہونا ہے۔
اسلام آباد: (ڈیلی خبریں) جسٹس عمرعطا بندیال کی بطور چیف جسٹس تعیناتی کی سمری ایوان صدرکو ارسال کردی گئی ،چیف جسٹس گلزار احمد یکم فروری کو ریٹائر ہو جائیں گے۔
سیکرٹری وزارت قانون و انصاف کی جانب سے بھیجی گئی سمری کی مںظوری صدرمملکت دیں گے۔ جسٹس عمرعطا بندیال کی بطور چیف جسٹس تعیناتی کی منظوری کے بعد وزارت قانون و انصاف نوٹیفکیشن جاری کرے گی جس کے بعد جسٹس عمرعطا بندیال بطورچیف جسٹس آف پاکستان عہدے کا حلف 2 فروری کواٹھائیں گے۔
اسلام آباد: (ڈیلی خبریں) سپریم کورٹ نے اردو کوسرکاری زبان کے طور پر رائج نہ کرنے کے توہین عدالت کیس میں وزارت تعلیم سے جواب طلب کر لیا۔
جسٹس عمرعطا بندیال کی سربراہی میں دو رکنی بنچ نے توہین عدالت کیس کی سماعت کی، جسٹس عمرعطا بندیال نے ریمارکس دیئے کہ سپریم کورٹ کے اردو کو سرکاری زبان کے طور پر رائج کرنے کے حکم پر عمل ہونا چاہیے، تعلیم کے علاوہ ایک چیزتربیت بھی ہوتی ہے، شہریوں کی بھی ذمہ داری ہے کہ اپنی زبان کوزندہ رکھیں۔ باقی صوبے اپنی زبانوں کا تحفظ کررہے ہیں تو پنجاب کیوں پیچھے ہے؟ اردو زبان رائج کرنے کے معاملے کو اب سنجیدگی سے دیکھیں گے۔
عدالت نے قرار دیا کہ اردو کو عالمی زبان بنانا چاہیے، تعلیمی اداروں میں اردو زبان کو کوئی فروغ نہیں مل رہا، وفاقی حکومت نشاندہی کرے کہ اردو زبان رائج کرنے کے کون سے ادارے ہیں۔ عدالت نے پنجابی لٹریچر نہ پڑھانے پر پنجاب حکومت سے بھی جواب طلب کرلیا۔ کیس کی سماعت غیرمعینہ مدت کے لیے ملتوی کر دی گئی۔
اسلام آباد: (ڈیلی خبریں) ایف بی آر نے غیر قانونی سگریٹ پر 15 کروڑ روپے کی ٹیکس چوری پکڑنے کا انکشاف کیا ہے۔ فیڈرل بورڈ آف ریونیو کے ان لینڈ ریونیو انفورسٹمنٹ نیٹ ورک اسکواڈز نے رواں ملی سال 2021-22 کی پہلی ششماہی(جولائی تا دسمبر) کے دوران غیر قانونی سگریٹ پر 15 کروڑ 61 لاکھ35 ہزار 55 روپے کی ٹیکس چوری پکڑنے کا انکشاف کیا ہے۔ اس عرصے کے دوران مجموعی طور پر 19 کروڑ 56 لاکھ 74 ہزار 652 روپے مالیت کے 8 کروڑ چار لاکھ 46 ہزار 800 غیر قانونی سگریٹ ضبط کئے گئے۔
کراچی: (ڈیلی خبریں) افغانستان کے قائم مقام قونصل جنرل سعید عبدالجبار نے کہا ہے کہ افغانستان کا پہلا تجارتی شراکتدار پاکستان ہے جس سے افغانستان کی حکومت اور عوام مدد وتعاون کے طلبگار ہیں۔ افغانستان کے قائم مقام قونصل جنرل سعید عبدالجبار نے پاک افغان جوائنٹ چیمبر آف کامرس کے صدر زبیرموتی والا کے درمیان ہونے والے ملاقات میں کہا کہ افغانستان کی عوام فنڈز منجمد ہونے سے بدترین مسائل کے ساتھ مشکل دور سے گزر رہے ہیں۔ قونصل جنرل نے PAJCCI پر زور دیا کہ وہ حکومت پاکستان سے افغانستان میں نقدی کی عدم دستیابی کی وجہ سے باہمی تجارت امریکی ڈالر کے بجائے پاکستانی روپے اور افغان کرنسی میں کرنے کی اجازت حاصل کرے افغانستان پاکستان کو اولین تجارتی پارٹنر سمجھتا ہے اور تجارتی حجم کو بڑھا کر پاکستان کی جانب سے مدد و تعاون کا طلبگار ہے۔ انہوں نے کہا کہ افغانستان کے پاس متنوع تازہ مصنوعات کے ساتھ معدنیات اور کوئلے کے بہت بڑے ذخائر ہیں جن کی پاکستان کو ضرورت ہے اور بھارتی مصنوعات سے جو خلا رہ گیا ہے اسے پاکستان آسانی سے پر کر سکتا ہے۔ پاک افغان جوائنٹ چیمبر کے صدر زبیر موتی والا نے کہا کہ PAJCCI وفد کو افغان تجارتی اداروں اور وزارتوں کے ساتھ ملاقاتوں کے لیے افغانستان کا دورہ کرنے کی اجازت دی جائے۔ انہوں نے اس بات سے اتفاق کیا کہ دونوں ممالک کو نہ صرف تجارتی بلکہ سماجی اور ثقافتی تعلقات کی تعمیر نو کے لیے تمام اسٹیک ہولڈرز کو شامل کرنے کے لیے تمام اقدامات اٹھائے جائیں اور PAJCCI جیسے فورم معاشی اور عوام کے درمیان رابطے میں اہم کردار ادا کر سکتے ہیں۔
کیلیفورنیا: (ڈیلی خبریں) اب یہ ممکن ہے کہ آنکھوں میں لگائے جانے والے لینس مجھے اور آپ کو ذیابیطس سمیت کئی امراض کی خبر دے سکتے ہیں۔ لینس جدید ترین مائیکروچپ اور حساس سینسر بھی لگے ہیں۔ کیلیفورنیا میں واقع اِن ودھ نامی کمپنی نے برسوں کی محنت سے اسے تیار کیا ہے جس میں مرکزی لینس لچکدار ہائیڈروجل سے بنایا گیا ہے۔ اس کے کنارے پر مائیکروالیکٹرانکس کا کمال ہے جس کی بدولت باریک سرکٹ، سینسر اور مائیکروچپ لگائی گئی ہیں۔ اتنے نظام کے باوجود کوئی بھی شے آنکھوں میں محسوس نہیں ہوتی۔ لینس کے اندر بچھا ہوا پورا نظام آنکھوں کے اندر کی جسامت، شکل اور بیرونی سطح کا خیال رکھتا ہے۔ اگر آنکھوں میں خون کی باریک ترین رگوں میں کوئی تبدیلی ہوتی ہے یا ریٹینا میں کچھ اتار چڑھاؤ ہوتا ہے تو اس کی فوری خبر مل جاتی ہے۔ اس کا ڈیٹا حقیقی وقت میں ایپ کی بدولت اسمارٹ فون اور کمپیوٹر تک پہنچتا رہتا ہے۔ لینس میں یہ خاصیت موجود ہے کہ وہ سبزموتیا یا گلوکوما اور دیگر بیماریوں کا پتا لگا سکتا ہے۔ لیکن سب سے اہم بات یہ ہے کہ کسی طرح خون میں شکر کی مقدار بڑھتی ہے تو لینس پہننے والے کو اس کا علم ہوجائے گا۔ اس طرح ہم لینس کو آنکھوں میں سمائے ہوئے ڈاکٹر سے تعبیر کرسکتے ہیں۔ ان ودھ کمپنی کا دعویٰ ہے کہ انہوں نے دنیا کا پہلا نرم برقی سرکٹ والا کانٹیکٹ لینس بنایا ہے۔ تاہم کمپنی نے اس کی قیمت کا اعلان نہیں کیا ہے۔
جرمنی: (ڈیلی خبریں) کووڈ 19 کی عالمی وبا نے دنیا بھرکا نظام درہم برہم کررکھا ہے اب اس خبر یہ ہے کہ مشہور ایئرلائن لفتھانسا نے مشہور اور مصروف ہوائی اڈوں پر اپنی پارکنگ کھودینے کے خوف سے ایک دو نہیں بلکہ 18000 ایسی پروازیں چلائیں جن میں مسافروں کی تعداد نہ ہونے کے برابر تھی۔ کچھ ہروازیں برسلز ایئرلائن نے انجام دیں جو لفتھانسا کی ذیلی کمپنی بھی ہے۔ گروپ نے تصدیق کی ہے کہ برسلز نے 3000 اور لفتھانسا نے 15000 پروازیں ایسی کیں جن میں بہت ہی کم مسافر تھے یا بالکل خالی تھیں۔ اس کی وجہ یہ ہے کہ یورپی قوانین کے تحت اگر فضائی کمپنیاں اپنی جگہ (سلاٹ) محفوظ بنانا چاہتی ہین تو ضروری ہے کہ وہ بڑے فضائی اڈوں پر آمدورفت کا سلسلہ جاری رکھیں۔ یعنی اس کا مطلب ہوا کہ نہیں آؤگے تو کھودوگے والامعاملہ ہے جس کے تحت لینڈنگ اور ٹیک آف کا 80 فیصد کوٹہ استعمال کرنا ہوتا ہے ورنہ وہ ضائع ہوجاتا ہےاور کسی دوسری کپمنیوں کو دیدیا جاتا ہے۔ یورپ میں بالخصوص قوانین بہت سخت ہیں اور کورونا وائرس کی تازہ ترین لہر کی وجہ سے فضائی سفر 50 فیصد تک کم ہوگیا ہے۔ تاہم لفتھانسا واقعے کے بعد فضائی کمپنیوں نے یورپی یونین پر فضائی قوانین پر نظرثانی کرنے کی درخواست کی ہے۔ لیکن حالیہ چند دنوں میں یورپی ممالک کی پروازوں میں 33ہزار کی کمی ہوئی ہے۔
کراچی: (چینل فائیو) نامور پاکستانی اداکار عمران عباس نے اداکارہ سجل علی اور احد رضا میر کے درمیان علیحدگی کی افواہیں پھیلانے والوں اور ان کی زندگی کے بارے میں تجسس رکھنے والوں پر شدید برہمی کا اظہار کیا ہے۔ پچھلے کچھ عرصے سے سوشل میڈیا پر خبریں گردش کررہی ہیں کہ سجل علی اور احد رضا میر کے درمیان تعلقات میں دراڑ آگئی ہے۔ ان افواہوں کو تقویت اس وقت ملی جب احد رضا میر اور ان کی فیملی نے سجل کی چھوٹی بہن اداکارہ صبور علی کی شادی میں بھی شرکت نہیں کی۔ صبور کی شادی میں ہر موقع پر سجل علی اکیلی ہی نظر آئیں جس کی وجہ سے لوگوں نے سوشل میڈیا پر باتیں کرنی شروع کردیں کہ سجل اور احد کے درمیان ناراضگی چل رہی ہے۔ کچھ سوشل میڈیا صارفین نے تو دونوں کی طلاق کی خبریں بھی سوشل میڈیا پر وائرل کردیں۔ حال ہی میں انسٹاگرام پر (کیو این اے) یعنی سوال جواب کے سیشن کے دوران جب ایک صارف نے اداکار عمران عباس سے سجل علی اور احد رضا میرکے درمیان تلخیوں کی وجہ معلوم کرنا چاہی اور ان سے سوال کیا ’’کیا آپ جانتے ہیں کہ احد رضا میر کیوں نہیں آئے صبور کی شادی پر؟‘‘ تو عمران عباس نے صارف پر بھڑکتے ہوئے کہا ’’کیا آپ جانتے ہیں کہ آپ اپنے کام سے کام کیوں نہیں رکھتے؟؟ عمران عباس نے کہا جتنا آپ لوگوں کی زندگی کے بارے میں سوچتے ہیں اگر اپنے بارے میں سوچیں تو کہیں کے کہیں پہنچ جائیں‘‘۔ واضح رہے کہ علیحدگی کی خبروں پر فی الحال سجل علی اور احد رضا میر کی جانب سے کوئی بیان سامنے نہیں آیا ہے۔ تاہم سجل علی نے چند روز پہلے اپنی اور احد کی ایک تصویر شیئر کی تھی جس سے ایسا ظاہر ہورہا تھا کہ دونوں کے درمیان سب ٹھیک ہے لیکن بعد میں انہوں نے وہ تصویر ڈیلیٹ کردی تھی۔
Error 403: The request cannot be completed because you have exceeded your quota..
Domain code: youtube.quota
Reason code: quotaExceeded
