راولپنڈی: (ڈیلی خبریں) آرمی چیف جنرل قمر جاوید باجوہ کی زیرِ صدارت کور کمانڈرز کانفرنس میں داخلی سکیورٹی کی صورتِ حال اور بارڈر مینجمنٹ کے امور پر تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق آرمی چیف جنرل قمر جاوید باجوہ کی زیرِ صدارت 246ویں کور کمانڈرز کانفرنس جنرل ہیڈ کوارٹرز (جی ایچ کیو) میں منعقد ہوئی، ملکی داخلی سکیورٹی کی صورتحال اور بارڈر مینجمنٹ امور پر تفصیلی تبادلہ خیال کیا گیا۔
آئی ایس پی آر کے مطابق کانفرنس کے شرکاء کو آپریشن ردالفساد کی تازہ ترین پیش رفت اور کامیابیوں پر تفصیلی بریفنگ دی گئی۔
آرمی چیف جنرل قمر جاوید باجوہ نے مری کے برفانی طوفان اور بلوچستان میں شدید بارشوں سے پیدا ہونے والی سیلابی صورتحال کے متاثرین کو مدد کو سراہا۔
آئی ایس پی آر کے مطابق جنرل قمر جاوید باجوہ نے ان قدرتی آفات کے دوران ریلیف آپریشن میں شامل فارمیشن کی کوششوں کی تعریف کی۔
آرمی چیف نے فارمیشنز کی آپریشنل تیاریوں پر اطمینان کا اظہار کرتے ہوئے درپیش چیلنجز سے نمٹنے کے لیے تربیت اور جنگی تیاریاں جاری رکھنے پر زور دیا۔

اسلام آباد: (ڈیلی خبریں) قومی سلامتی پالیسی کے اہم نکات سامنے آ گئے ، سو سے زائد صفحات پر مشتمل پالیسی کا آدھا حصہ پبلک کرنے کا فیصلہ کیا گیا ہے۔
ذرائع کے مطابق 100سے زائد صفحات پر مشتمل پالیسی کا آدھا حصہ پبلک کرنے کا فیصلہ کیا گیا ہے، وزیر اعظم عمران خان جمعہ کو 50 صفحات پر مشتمل غیر خفیہ پالیسی کے نکات کا اجراء کرینگے، پالیسی اکانومی، ملٹری اور ہیومن سکیورٹی تین بنیادی نکات پر مشتمل ہے۔
ذرائع کے مطابق اکانومی سکیورٹی کو قومی سلامتی پالیسی میں مرکزی حیثیت دی گئی، پاکستان میں قومی سلامتی سے متعلق پہلی بار جامع پالیسی تیار کی گئی، سلامتی پالیسی پر سالانہ بنیادوں پر نظرثانی کی جائے گی، نئی حکومت کو پالیسی پر ردوبدل کا اختیار حاصل ہو گا، نیشنل سیکیورٹی کمیٹی پالیسی کی وارث ہو گی۔
ذرائع کے مطابق ہر مہینے حکومت نیشنل سکیورٹی کمیٹی کو عملدرآمد رپورٹ پیش کرنے کی پابند ہو گی، پالیسی میں دو سے زائد ایکشن وضع کئے گئے، پالیسی ایکشن کا حصہ کلاسیفائیڈ تصور ہو گا، خطے میں امن، رابطہ کاری اور ہمسایہ ممالک کے ساتھ تجارت پالیسی کا بینادی نقطہ ہو گا۔
ذرائع کے مطابق ہائبرڈ وار فیئر بھی قومی سلامتی کمیٹی کا حصہ ہو گا، ملکی وسائل کو بڑھانے کی حکمت عملی دی گئی ہے، کشمیر کو پاکستان کی سلامتی پالیسی میں اہم قرار دیا گیا، مسئلہ کشمیر کا حل پالیسی کی ترجیحات میں شامل ہے، پالیسی پر سیاسی فریقین کو اعتماد میں لینے کے لئے نیشنل سیکیورٹی ڈویژن آمادہ ہو گیا، بڑھتی آبادی کو ہیومن سکیورٹی کا بڑا چیلنج قرار دیا گیا۔ شہروں کی جانب ہجرت، صحت، پانی اور ماحولیات بھی پالیسی کا حصہ ہے۔
ذرائع کے مطابق فوڈ اور صنفی امتیاز ہیومن سیکیورٹی کے اہم عنصر ہے ایران پر پابندیاں ختم ہونے کے بعد حکومت کو معاملات آگے بڑھانے کا اختیار کی بھی تجویز ہے، گڈ گورننس، سیاسی استحکام ،فیڈریشن کی مضبوطی پالیسی کا حصہ ہے۔

اسلام آباد: (ڈیلی خبریں) وفاقی وزیر برائے منصوبہ بندی اسد عمر نے کہا ہے کہ ملک کو گرے لسٹ میں سابق حکومت نے ڈلوایا، فیٹف بل کی مسلم لیگ (ن) نے مخالفت کی تھی ، پاکستان معاشی ترقی کی جانب گامزن ہے۔
قومی اسمبلی میں اظہار خیال کرتے ہوئے وفاقی وزیر اسد عمر نے کہا کہ جب آپ لوگ سوال کرتے ہیں توجواب بھی سننے کے لیے تیارہوجائیں، گرے لسٹ نام مسلم لیگ کی حکومت میں ڈالا گیا ، فیٹف ٹھیک کرتے کرتے حماد اظہراچھا بھلا نوجوان تھا بوڑھا ہوگیا ہے، چیلنج کرتا ہوں فیٹیف بل کی مسلم لیگ(ن)نے مخالفت کی تھی، یہ لوگ جتنا مرضی شورکریں حق کی آوازدبائی نہیں جاسکتی، ہم ان کی آوازوں سے دبنے والے نہیں ۔
وفاقی وزیرنے مزید کہا کہ شہبازشریف اٹھ کرایوان سے چلے گئے ان میں سچ سننے کی ہمت نہیں ، آصف زرداری کوعلی بابا چالیس چورکہنے والا ہمیں درس دے رہا ہے اور کہتا تھا زرداری کا پیٹ پھاڑوں گا ، یہ لوگ اگروہ پیسہ لے آتے توشائد آئی ایم ایف نہ جانا پڑتا ۔
انہوں نے مزید کہا کہ ان کے ساتھ بیٹھنے کوتیارہیں ، اگران کے ساتھ بیٹھیں گے توکیا ٹی ٹیزلگانا سیکھیں گے؟ ان کے تنخواہ دارملازمین کے اکاؤنٹ میں اربوں جمع کرائے گئے ، مفتاح اسماعیل نے خود کہا معیشت تباہی کی طرف جارہی ہے، آج شہبازشریف کہہ رہے ہیں کہ معیشت کوتباہ کردیا گیا، اگریہ کہتے ہیں تو مفتاح اسماعیل کی ویڈیوبھی سنادوں گا۔
ان کا کہنا تھا کہ اپوزیشن لیڈرنے کہا چارٹرآف اکانومی سائن کرنا چاہیے، ان کے بڑے بھائی تین دفعہ وزیراعظم رہے کونسا اپوزیشن کے ساتھ چارٹرآف اکانومی سائن کیا تھا بتادیں؟ چاردفعہ (ن) لیگ،7 دفعہ پیپلزپارٹی آئی ایم ایف سے معاہدہ کرچکے ہیں اور آج یہ غیرت کا درس دے رہے ہیں، جب یہ حکومت چھوڑکرگئی تودودھ اورشہد کی ندیاں نہیں بہہ رہی تھیں۔
قومی اسمبلی میں خطاب کرتے ہوئے اسد عمر نے کہا کہ اپوزیشن لیڈرنے بڑا اچھا شعرسنایا، کاش ان کے معیشت دان بھی اتنے ہی اچھے ہوتے جتنا اچھا شعرسنایا ،ان کوتوڈینگی کے خلاف خود تعریفیں کرنا پڑتی تھیں، ہماری حکومت کی کورونا پالیسی کی آج پوری دنیا تعریف کررہی ہے،سابقہ حکومت میں کسان کوپوری قیمت نہیں ملتی تھی ، ہماری حکومت نے کسان کی آمدن میں اضافہ کیا تھا ، یہ خود مافیازکے ساتھ ملے ہوئے تھے اور آدھی شوگرملیں ان کی اپنی تھی ۔
وفاقی وزیر نے کہا کہ شہبازشریف نے کسان کے لیے اتنا رونا رویا ، میں سمجھا شائد کسان کے سب سے بڑے ہمدرد یہی ہیں ، مسلم لیگ کی پانچ سالہ حکومت میں جتنا کسان کی آمدن میں اضافہ ہوا وہ ہم ایک سال میں کرچکے ہیں ، یہ لوگ ایگریکلچرکا نام لیتے ہیں مگر انہوں نے زراعت کا بیڑہ غرق کردیا تھا ۔
اسد عمر کا کہنا تھا کہ آئی ٹی کی ایکسپورٹ میں پچھلے سال47 فیصد اضافہ ہوا،ترسیلات زرمیں ریکارڈ اضافہ ہوا ہے، یہ لوگ کہتے ہیں کہ معیشت تباہ ہوگئی ، پچھلے سال کورونا کے باوجود ہماری معیشت میں چارفیصد اضافہ ہوا ، جنوری کے ماہ میں چار فیصد گروتھ پانچ فیصد تک ہوجائے گی ، ان کا بھائی لندن،سمدھی ، بھتیجے سب لندن میں ہیں ، پیپلزپارٹی، (ن) لیگ کی دونوں حکومتوں سے ہماری ایکسپورٹ میں27 سے28 فیصد اضافہ ہونے جارہا ہے۔
انہوں نے کہا کہ ریکارڈ کی بات ہے 3 ہزار800 ارب (ن) لیگ نے ٹیکس اکٹھا کیا تھا ، ہم نے پچھلے سال 4 ہزار700 ارب ، اس سال 6 ہزاراکٹھا کریں گے ، لگ رہا ہے شہبازشریف کوجان بوجھ کریہ غلط اعدادوشماردیئے جاتے ہیں ۔

مری: (ڈیلی خبریں) 23 افراد کے جاں بحق ہونے کے بعد مری میں داخلے پر پابندی میں مزید چھ روز کی توسیع کر دی گئی۔
یاد رہے کہ مری میں شدید برف باری کے بعد کئی گھنٹوں تک ٹریفک میں پھنسے رہنے والی گاڑیوں میں بچوں اور خواتین سمیت 23 اموات ہوئی تھیں۔ ان اموات کے بعد پنجاب حکومت نے انکوائری کمیٹی تشکیل دی ہے جو مختلف پہلوؤں سے معاملے کا جائزہ لے کر تجاویز حکومت کو دے گی۔ انکوائری کمیٹی کو سات دن میں اپنی رپورٹ پیش کرنے کے لیے کہا گیا ہے۔
وزیراعلیٰ عثمان بزدار نے مری میں ہلاک ہونے والے افراد کے ورثا کے لیے ایک کروڑ 76 لاکھ روپے مالی امداد کااعلان بھی کیا اور مری کو ضلع بنانے کا اصولی فیصلہ کیا گیا جبکہ مری میں فوری طور پر ایس پی اور ایڈیشنل ڈپٹی کمشنر کے عہدوں کے افسروں کو تعینات کیا جائے گا۔
نیشنل ہائی ویز اینڈ موٹرویز اتھارٹی کے مطابق مری میں داخلے پر پابندی میں توسیع کر دی گئی ہے جس کے بعد 17 جنوری تک مری میں داخلے پر پابندی عائد کر دی گئی ہے۔
ہائی ویز اینڈ موٹرویز پولیس کے مطابق اس پابندی کا اطلاق محکمہ موسمیات کی پیش گوئی اور انتظامیہ کی ہدایات پر کیا گیا ہے۔
مری کا سفر کرنے والوں کو ہدایت کی گئی ہے کہ وہ تازہ ترین اپ ڈیٹس جاننے کے لیے نیشنل ہائی ویز اینڈ موٹرویز پولیس کی ہیلپ لائن 130 پر کال کریں۔
دوسری طرف چیف سیکریٹری پنجاب نے مری کا دورہ کیا اور حکام کو داخلی راستوں پر تین نئی چیک پوسٹیں قائم کرنے کی ہدایات جاری کی ہیں۔