لندن: (ڈیلی خبریں) برطانوی وزیر اعظم بورس جانسن ایک اور سکینڈل کی زد میں آگئے۔
برطانوی میڈیا کے مطابق گزشتہ سال جب پوری قوم کورونا ایس او پیز کے تحت تقریبات پر پابندیوں سے دوچار تھی تو ایسے میں ٹین ڈاؤننگ سٹریٹ میں آؤٹ ڈور پارٹی منعقد کی گئی جس کی سکاٹ لینڈ یارڈ مبینہ غیر قانونی تقریب کی تحقیقات کر سکتا ہے۔
برطانوی میڈیا پر ایک ای میل منظر عام پر آئی ہے جس کے مطابق گزشتہ سال مئی میں وزیر اعظم ہاؤس کے باغ میں پارٹی کا اہتمام کیا گیا ، پارٹی میں بورس جانسن ، ان کی اہلیہ اور 40 سے زائد دیگر افراد شریک ہوئے جبکہ اُس وقت برطانیہ میں 2 سے زیادہ افراد کے اجتماع پر پابندی عائد تھی ۔
یہ خبر سامنے آنے کے بعد برطانوی میڈیا میں ہلچل مچ گئی اورعوام پر عائد پابندیوں کی خود پیروی نہ کرنے پر برطانوی وزیر اعظم کو شدید تنقید کا نشانہ بنایا جارہا ہے جبکہ خبر رساں ایجنسی کے مطابق اسکاٹ لینڈ یارڈ مبینہ غیر قانونی پارٹی کی تحقیقات پر غور کر رہا ہے

واشنگٹن: (ڈیلی خبریں) امریکا نے رواں سال افغانستان کو 308 ملین ڈالر انسانی امداد دینے کا اعلان کردیا ہے ۔
خبر ایجنسی کے مطابق امریکی کی جانب سے افغانستان کو دی جانے والی امدادی رقم اشیائے خورونوش، صحت اور دیگر ضروریات مہیا کرنے کے لئے استعمال ہوگی ۔
واضح رہے کہ امریکا نے اقوام متحدہ کی اپیل کے بعد امدادی پیکج کا اعلان کیا ہے ۔

نیویارک: (ڈیلی خبریں) امریکا کی ایک رہائشی عمارت میں خوفناک آتشزدگی میں 9 بچوں سمیت 19 افراد ہلاک اور 63 سے زائد زخمی ہوئے تھے جن کے بارے مین اب انکشاف ہوا ہے کہ یہ زیادہ تر مسلم تارکین وطن تھے۔
عالمی خبر رساں ادارے کے مطابق نیویارک کے میئر ایرک ایڈمز نے بتایا کہ گزشتہ روز ہیٹر کے باعث عمارت میں لگنے والی خوفناک آگ سے جاں بحق ہونے والوں میں اکثریت گیمبیا سے تعلق رکھنے والے مسلمانوں کی تھی۔
نیویارک کے علاقے برونکس کے رہائشی اپارٹمنٹ میں آگ لگنے سے 9 بچوں سمیت 19 افراد کے زندگی کے چراغ گُل ہوگئے تھے جب کہ 63 سے زائد زخمی ہوئے تھے تاہم میئر ایرک ایڈمنز نے یہ نہیں بتایا کہ ان میں سے کتنے مسلمان تھے۔
دوسری جانب اسلامک سرکل آف نارتھ امریکا کے نمائندے کا دعویٰ ہے کہ تقریباً تمام ہی متاثرین مسلمان تھے اور شہر کے میئر کے ساتھ مل ان کے جنازے کے انتظامات کیے جا رہے ہیں۔
آتشزدگی میں زخمی ہونے یا زندہ بچ جانے والے حکومت سے امداد لینے سے گریز کر رہے ہیں کیوں نہ یہ سب تارکین وطن ہیں اور امداد لینے سے حکومت کی نظر میں آجانے سے ملک بدر کیے جانے کے خوف میں مبتلا ہوگئے ہیں۔
اس خوف کو مدنظر رکھتے ہوئے نیویارک کے میئر نے متاثرین کو یقین دلایا ہے کہ سرکاری مدد لینے والوں کے نام امیگریشن اینڈ کسٹمز انفورسمنٹ کو فراہم نہیں کیے جائیں گے اور نہ کسی بھی قانون نافذ کرنے والے ادارے کو دیں گے۔