اسلام آباد ( ملک منظور احمد ) پاکستان میں سائبر کرائم کی شرح میں تشوش ناک حد تک اضافہ ہو گیا ،سرکاری اعداد و شمار کے مطابق سال 2021میں رجسڑڈ ہونے والے سائبر کرائم کی تعداد 1لاکھ سے تجاوز کر گئیں ہیں ۔ذمہ دا ر ذرائع کے مطابق ملک میں سمارٹ فونز اور ٹیکنالوجی کے استعمال کے ساتھ ساتھ سائبر کرائم کی شرح میں کئی گنا تک اضافہ ہو چکا ہے ۔ایف آئی اے ذرائع کا اس حوالے سے کہنا ہے کہ ایف آئی اے نے ادارے پر عوام کے اعتماد کے لیے متعدد اقدامات اٹھائے ہیں اس حوالے سے آگاہی مہم چلائی گئی ہے اسی لیے عوام کی بڑی تعداد نے اس حوالے سے ایف آئی اے میں اپنی شکایات کا اندراج کروایا ہے ،لیکن خبریں نے جب اس حوالے سے سائبر کرائم کے ماہرین سے رابطہ کیا تو ان کا کہنا تھا کہ اس بات میں کوئی شک نہیں ہے کہ ایف آئی اے نے گزشتہ دو برس کے دوران عوام کو سائبر کرائم کے حوالے سے آگاہی دینے اور عوام کی رسائی آسان بنانے کے لئے کام کیا ہے لیکن اتنی بڑی تعداد میں شکایات کا رجسٹرڈ ہونا بڑھتی ہو ئی عوامی آگاہی کا اثر ہے ۔ایف آئی اے میں ہر شکایت پر فوجداری کاروائی نہیں کی جاتی ہے پہلے شکایت کی جانچ پڑتال کی جاتی ہے اور اس کے بعد اگر کوئی جرم ہوا ہے تو پھر اس پر فوجداری کاروائی عمل میں لائی جاتی ہے ۔گزشتہ سال رجسٹر ہونے والی 1لاکھ سے زائد شکایات میں سے 80ہزار کے خلاف انکوائری کروائی گئیں اور ان میں سے بھی 1200کے خلاف کیس درج کیے گئے ہیں ۔1300کی تعداد میں گرفتاریاں بھی عمل میں لا ئیں گئیں ہیں ۔اعداد و شمار کے مطابق گزشتہ سال رجسٹر ہونے والی شکایات میں سے 25فیصد طلباءکی شکایات تھیں جبکہ 25فیصد مالی معاملات کے حوالے سے شکایات کا اندراج کیا گیا ۔فراڈ اور دھوکہ بازی کے کیسز میں 427ایف آئی آر رجسرڈ کی گئیں اور 300سے زائد گرفتاریاں بھی عمل میں آئیں ہیں ۔اس کے بعد بلیک میلنگ اور بھتہ خوری کے کیسز تھے جن میں 185گرفتاریاں عمل میں آئیں ۔ریپ کے 199،سائبر دہشت گردی کے 76 جبکہ چائلڈ پو رنوگرافی کے بھی 49کیس سامنے آ ئے ہیں ۔ذرائع کے مطا بق ملک میں ماہانہ بنیادوں پر سامنے آنے والے کیسز کی تعداد میں گزشتہ دو سال میں دگنا اضا فہ ہو چکا ہے ۔2018ءمیں ماہانہ بنیادوں پر کیسز کی تعداد 4ہزار ماہانہ کے قریب تھی جبکہ اب یہ تعداد بڑھ کر 8ہزار ماہانہ سے زائد ہو چکی ہے ۔ذرائع کے مطابق کرونا کی صورتحال میں کیسز میں اضافے کا باعث بنی ہے ۔اس حوالے سے ایف آئی اے کے ذمہ دار ذرائع کا کہنا تھا کہ محدود وسائل کے با وجود عوام کو ریلیف مہیا کرنے کی بھرپور کو شش کی جا رہی ہے ،عام آدمی ہماری پالیسیوں کا محور ہے اور ہم نے عام آدمی کے فائدے کے لیے ای تحقیقات کا سلسلہ بھی شروع کیا ہے ۔سائبر ونگ کے بجٹ میں اضافی کیا جا رہا ہے ،نئی بھرتیاں کی جا رہی ہے اور ہر ضلع میں ایف آئی اے کا سینٹر کھولا جا رہا ہے ۔انٹر پول کے ذریعے سوشل میڈیا ویب سائٹس تک رسائی حاصل کی جاتی ہے اور اس حوالے سے ہمیں مثبت نتائج مل رہے ہیں ۔عوام کی آسانی کے لیے ویب سائٹ nr3c.gov.pkاور ای میل helpdesk@nr3c.gov.pkکا اجرا کیا گیا ہے جس پر شہری اپنی شکایات کا اندراج کر سکتے ہیں ۔

وزیراعظم  عمران خان نے کہا ہے کہ ہمیں اپنی آنے والی نسلوں کیلئے گلوبل وارمنگ کو روکنے کی ضرورت ہے۔

وزارت موسمیاتی تبدیلی اور عالمی بینک میں معاہدے پر دستخط کی تقریب سے خطاب کرتے ہوئے  وزیراعظم نے کہا کہ بدقسمتی سے پاکستان ان ممالک میں شامل ہے جہاں  ماحولیات کا مسئلہ ہے۔

انہوں نے کہا کہ ہمیں اپنی آنے والی نسلوں  کیلئے گلوبل وارمنگ کو روکنے کی ضرورت ہے، گلوبل وارمنگ روکنے کیلئے بہت سے اقدامات کرنے کی ضرورت ہے۔

وزیراعظم نے کہا کہ ڈی آئی خان جیسے علاقوں میں بارشیں کم ہونا شروع ہوگئی ہیں، درجہ حرارت بڑھنے کی وجہ سے جنگلوں میں آگ لگنا شروع ہوگئی ہے۔

انہوں نے کہا کہ اگر اس کو کنٹرول نہ کیا تو یہ  بہت خطرناک ثابت ہوگا، 10ارب بلین ٹری سونامی ہمارے لیے بہت ضروری ہے۔

عمران خان نے کہا کہ ہمیں اپنے جنگلات کو بچانا ہے، ہمیں نیشنل پارکس کو بچانا ہے، ہم نے اب تک 15نئے نیشنل پارک ڈکلیئر کیے۔

ان کا کہنا تھا کہ ڈی آئی خان کے بنجر علاقوں میں درخت لگائے جس سے وہاں وائلڈ لائف آگئی۔

عمران خان نے کہا کہ ہم نے اپنے نیشنل پارکس اور جنگلات کی حفاظت کرنی ہے، شہر پھیلتے  جارہے ہیں، اسلام آباد میں نیشنل پارکس میں انکروچمنٹ شروع ہوگئی ہے۔

وزیراعظم نے کہا کہ لاہور میں درخت کاٹنے کی و جہ سے  آلودگی بہت زیادہ ہوگئی ہے، مختلف ممالک نے ماحولیاتی آلودگی کو تاخیر سے سنجیدہ لیا۔

تہران کے ذریعے استبول اور اسلام آباد کے درمیان ایک دہائی بعد چلنے والی ٹرین لاہور، تفتان، اور زاہدان سے ہوتی ہوئی انقرہ پہنچ گئی، مال بردار ٹرین نے اپنے 17 روز کا سفر 13 روز میں مکمل کیا جبکہ دوسری ٹرین بھی ترکی کے راستے پر رواں ہیں۔

 پاکستان ریلوے ڈائریکٹر (آپریشنز) امتیاز احمد نے ڈان کو بتایا کہ ’21 دسمبر کو اسلام آباد سے پہلے مال بردار ٹرین روانہ ہوئی، جو پیر کی شام انقرہ (ترکی) پہنچی، جس میں دیگر سازو سامان کے ساتھ بڑی تعداد میں پنک نمک بھی بڑی تعداد میں موجود تھا۔

انہوں نے بتایا کہ منزل پر پہنچنے سے قبل ٹرین میں موجود سامان کو ایرانی، ترک ریل گیج سسٹم کے ذریعے دوسری بوگیوں میں منتقل کیا گیا۔

ان کا مزید کہنا تھا کہ ٹرین 8 ویگنز پر مشتمل ہے جس میں 150 ٹنز پنک نمک موجود ہے۔

امتیاز احمد نے مزید بتایا کہ دوسری ٹرین 28 دسمبر کو بندرگاہ پہنچی جس میں 525 ٹن صابن کے پتھر موجود تھے، یہ ٹرین ایران میں داخل ہوچکی ہے اور جلد ہی زاہدان پہنچ جائے گی، جہاں ترسیل سے متعلق دیگر کام مکمل کیا جائےگا۔

ایک سوال کے جواب میں استنبول، تہران، اسلام آباد (آئی ٹی آئی) کے ترجمان امتیاز احمد نے بتایا کہ پاکستان ریلوے نے پہلی ٹرین سے 8 لاکھ اور دوسری ٹرین سے 22 لاکھ روپے کمائے ہیں۔

ایک اور سوال کے جواب میں انہوں نے کہا کہ ایران صرف راستہ فراہم کرنے والے ملک کےطور پر استعمال ہوگا اور پاکستان سےلوڈ کیے جانے والے تمام سازو سامان کی ترسیل ترکی میں ہی کی جائے گی۔

پنک سالٹ سرگودھا سے ٹرک میں لوڈ کرکے اسلام آباد میں آئی ٹی آئی ٹرین تک منتقل کیا گیا جبکہ صابن کے پتھر جلال آباد (افغانستان)سے خریدے گئے اور فریٹ بھیجنے والوں نے اسے خریداروں کےمطالبے کے مطابق آئی ٹی آئی پر بُک کیا۔

امتیاز احمد نے مزید کہا کہ تیسری ٹرین بھی جلد ہی ترکی کے لیے روانہ ہوگی، اسے مال بردار ٹرین بھیجنے والوں کی جانب سے لوڈ کیا جارہا ہے۔