پاکستان کرکٹ ٹیم کے سابق کپتان شاہد خان آفریدی نے انکشاف کیا ہے کہ محمد حفیظ ریٹائرمنٹ لینے کے موڈ میں نہیں تھے۔
نجی ٹ وی کے پروگرام میں بات کرتے ہوئے پاکستان کے اسٹار آل راؤنڈر شاہد آفریدی نے کہا میں نے ہمیشہ کرکٹ بورڈ اور کھلاڑیوں کے درمیان موجود فاصلے کی بات کی ہے اور محمد حفیظ کے کیس میں بھی مجھے ایسا ہی دکھائی دے رہا ہے۔
سابق کپتان کا کہنا تھا کہ پریس کانفرنس کے دوران محمد حفیظ کے رویے سے واضح طور پر دکھائی دے رہا تھا کہ وہ ریٹائرمنٹ کے موڈ میں نہیں تھے اور مزید پاکستان کی نمائندگی کرنا چاہتے تھے۔
شاہد آفریدی نے کہا میں محمد حفیظ کو شاندار کیریئر پر مبارکباد دیتا ہوں اور مجھے اس بات کی بھی خوشی ہے کہ انہوں نے خوشدلی سے ریٹائرمنٹ لینے کا فیصلہ لے کر کسی بڑے تنازع کو دعوت نہیں دی۔
خیال رہے قومی ٹیم کے آل راؤنڈر اور سابق کپتان محمد حفیظ نے گزشتہ روز انٹرنیشنل کرکٹ سے ریٹائرمنٹ کا اعلان کرتے ہوئے کہا تھا کہ 18 سال قبل جو سفر شروع کیا آج اس سے ریٹائر ہورہا ہوں لیکن جب تک فٹ ہوں اور پرفارم کررہا ہوں لیگ کھیلتا رہوں گا۔
سابق کپتان نے 392 میچوں میں پاکستان کی نمائندگی کرتے ہوئے 12 ہزار 789 رنز بنائے اور اپنے ملک کے لیے 21 سنچریاں اور 64 نصف سنچریاں اسکور کیں۔ اس دوران انہوں نے 253 وکٹیں بھی حاصل کیں۔
دوسری جانب قومی ٹیم کے کپتان بابراعظم سمیت دیگر کھلاڑیوں نے محمد حفیظ کو شاندار کریئر پر خراج تحسین پیش کیا۔
