لاہور: (ویب ڈیسک) پنجاب کے مختلف علاقوں میں شدید دھند کے باعث اہم موٹرویز کو متعدد مقامات سے ٹریفک کے لئے بند کر دیا گیا۔
ترجمان موٹر وے پولیس سید عمران احمد کے مطابق موٹر وے ایم ٹو لاہور سے ہرن مینار تک، لاہور ملتان موٹروے فیض پور سے ننکانہ جبکہ لاہور سیالکوٹ موٹروے ایم 11 شدید دھند کی وجہ سے بند کر دی گئی ہے۔
سید عمران احمد کا کہنا ہے کہ موٹرویز کو عوام کی حفاظت اور محفوظ سفر ہقینی بنانے کے لیے بند کیا جاتا ہے، روڈ یوزرز گاڑی کے آگے اور پیچھے دھند والی لائٹس کا استعمال کریں۔
ترجمان موٹروے پولیس کا کہنا ہے کہ روڈ یوزرز غیر ضروری سفر سے گریز ، تیز رفتاری سے پرہیز کریں اور اگلی گاڑی سے مناسب فاصلہ رکھیں، روڈ یوزرز معلومات اور مدد کے لیے ہیلپ لائن 130 سے رابطہ کر سکتے ہیں، موٹروے پولیس ہمسفر ایپ سے بھی معلومات لی جا سکتی ہیں۔

اسلام آباد: (ویب ڈیسک) صدر مملکت ڈاکٹر عارف علوی نے کہا ہے کہ قوم دہشت گردی کے مکمل خاتمے کیلئے اپنی سکیورٹی فورسز کے ساتھ کھڑی ہے، دہشت گردی کو جڑ سے اکھاڑنے تک اپنے مشن سے پیچھے نہیں ہٹیں گے۔
صدر مملکت نے 20 دسمبر کو بنوں میں دہشت گرد حملے میں شہید ہونے والے اہلکاروں کے ورثاء سے رابطہ کیا، صدر نے سپاہی بابر ایوب اور لانس نائیک حلیم کے ورثاء سے فون پر دونوں کی بہادری، فرض شناسی اور قوم کیلئے قربانی پر خراج تحسین پیش کیا۔ اس موقع پر صدر نے کہا کہ دہشت گردی کے خلاف جان کا نذرانہ پیش کرنے والے شہداء کی قربانیاں رائیگاں نہیں جائیں گی۔
اس کے علاوہ اپنے ایک ٹویٹ میں صدر مملکت نے کہا کہ خواتین کو وراثت سے محروم رکھنے والے غلط روایتی ظلم کا خاتمہ ہونا چاہئے، اس مقصد کیلئے تمام شراکت داروں کو مل کر کام کرنا ہے، ہمیں اس بات کو یقینی بنانا ہے کہ کوئی اسلامی قوانین وراثت کی خلاف ورزی نہ کرے جیسا کہ قرآن و سنت اور ہمارے آئین میں درج ہے۔

اسلام آباد: (ویب ڈیسک) وزیر اعظم شہباز شریف کے زیر صدارت وفاقی کابینہ کا اجلاس کل وزیر اعظم ہاؤس میں ہو گا۔
ذرائع کے مطابق وفاقی کابینہ کا اجلاس کل صبح 11 بجے ہو گا، اجلاس میں وزارت صنعت و پیداوار الیکٹرک بائیکس پر بریفنگ دے گی، توانائی بچت اقدامات پر عملدرآمد پلان کی پیشرفت سے آگاہ کیا جائے گا۔
وفاقی کابینہ کے اجلاس میں ون سٹاپ سروس ایکٹ کی منظوری دی جائے گی اور کابینہ ای سی سی کے 21 دسمبر کے فیصلوں کی توثیق کرے گی، کابینہ میں نجکاری کمیٹی کے 26 دسمبر کے فیصلوں کی بھی توثیق ہو گی۔

اسلام آباد: (ویب ڈیسک) وزارت اطلاعات و نشریات اور پریس انفارمیشن ڈیپارٹمنٹ (پی آئی ڈی) نے پاکستان انفارمیشن سینٹرز کے زیر اہتمام کراچی سے گلگت بلتستان تک ملک بھر کے صحافیوں کے لئے تربیتی ورکشاپس کا آغاز کر دیا ہے۔
پروگرام کے مطابق وفاقی دارالحکومت اسلام آباد، لاہور، کوئٹہ، پشاور، کراچی ، مظفر آباد اور گلگت بلتستان میں 20 سے زائد تربیتی ورکشاپس منعقد کی جا رہی ہیں جن میں 1500 کے قریب پرنٹ، الیکٹرانک اور سوشل میڈیا سے وابستہ نو آموز اور مڈ کیریئر صحافی حضرات کو صحافت میں جدید رحجانات اور درپیش چیلنجز کے حوالے سے مختلف موضوعات پر تربیت فراہم کی جا رہی ہے۔
ان تربیتی ورکشاپس کے انعقاد کا سلسلہ نہ صرف صوبائی دارالحکومتوں بلکہ ملک کے دیگر علاقوں باالخصوص اندرون بلوچستان، سندھ، خیبر پختونخوا اور پنجاب کے دور دراز علاقوں تک پھیلایا جا رہا ہے تاکہ ان علاقوں میں مقیم صحافیوں کو بھی تربیتی ورکشاپس سے مستفید ہونے کا موقع میسر آ سکے، پاکستان انفارمیشن سینٹر کی جانب سے اگلے چند دنوں میں انویسٹی گیٹو جرنلزم، ڈیجیٹل میڈیا ایتھینٹی سٹی، فیک نیوز اور ڈاکومنٹری میکنگ جیسے اہم موضوعات پر تربیتی ورکشاپس کا انعقاد کیا جا رہا ہے۔
تربیتی ورکشاپس میں سینئر جرنلسٹس، میڈیا امور سے متعلق ماہرین، ماس کمیونیکیشن ڈیپارٹمنٹس کے فیکلٹی ممبران سے استفادہ کیا جا رہا ہے اور انہیں بطور ٹرینر ان ورکشاپس میں مدعو کیا جا رہا ہے، اس حوالے سے اسلام آباد میں انفارمیشن سروس اکیڈمی میں خبروں کی صداقت، جعلی خبروں اور ریاست مخالف پروپیگنڈے کے تدارک کے عنوان سے مورخہ 28 اور 29 دسمبر کو دو روزہ تربیتی ورکشاپ کا اہتمام کیا جا رہا ہے۔

کراچی:(ویب ڈیسک) سابق صدر آصف علی زرداری نے کہا ہےکہ جمہوریت کا تسلسل بے نظیر کا خواب تھا، الحمدللہ ہم نے اس خواب کی تکمیل کردی ہے۔
آصف زرداری نے کہا کہ موجودہ اسمبلیاں اپنی مدت پوری کریں گی، اداروں کا سیاست سے لاتعلقی اور آئین پر عمل کرنے کا اعلان بی بی شہید کے خواب کی تعبیر ہے۔

کوئٹہ: (ویب ڈیسک) وزیر اعلیٰ بلوچستان عبدالقدوس بزنجو نے حکومت سے مطالبہ کیا ہے کہ خیبر پختونخوا کی طرح بلوچستان کو بھی این ایف سی ایوارڈ سے سکیورٹی اخراجات کی مد میں حصہ دیا جائے۔
کوئٹہ میں صوبائی کابینہ نے وفاقی حکومت سے بلوچستان کو این ایف سی ایوارڈ سے سیکورٹی اخراجات کی مد میں ایک فیصد حصہ دینے کا مطالبہ کر دیا، وزیر اعلیٰ عبدالقدوس بزنجو کا کہنا تھا کہ بلوچستان پاکستان کا نصف رقبہ پر مشتمل صوبہ ہے جس کے طویل بارڈر دو ممالک سے ملتے ہیں۔
وزیراعلیٰ نے کہا کہ بلوچستان غیر ملکی مداخلت کی وجہ سے دہشت گردی کا شکار ہے، بلوچستان ملک بھر کی سکبورٹی میں فرنٹ لائن صوبے کی ذمہ داری ادا کر رہا ہے، بلوچستان سکیورٹی کی مد 40 سے 50 ارب خرچ کرتا ہے۔
عبدالقدوس بزنجو نے کہا کہ انٹرنل سکیورٹی الاؤنس کی مد میں خطیر رقم خرچ کرنا پڑتی ہے، ترقیاتی مد میں صرف 60 سے 70 ارب روپے دستیاب ہوتے ہیں، اتنے کم بجٹ میں تو کوئٹہ کی ترقی بھی ممکن نہیں، جس طرح کے پی کے کو این ایف سی سے سکیورٹی کی مد میں شیئر ملتا ہے بلوچستان کو بھی ملنا چاہیے۔
وزیر اعلیٰ کا کہنا تھا کہ کابینہ میں اتفاق راۓ سے طے پایا کہ وزیراعظم کے سامنے یہ مسلئہ رکھا جائے گا، اپنا کیس مشترکہ مفادات کونسل میں بھی پیش کریں گے، امید ہے کہ وزیراعظم اور برادر صوبے ہمارے موقف کوتسلیم کریں گے۔

اسلام آباد: (ویب ڈیسک) وزیر داخلہ رانا ثنا اللہ نے کہا کہ اسلام آباد میں ہونے والے دہشتگرد حملے کے ملزمان گرفتار کر لیے ہیں۔
نجی ٹی وی سے گفتگو کرتے ہوئے رانا ثنا اللہ نے کہا کہ حملے میں ٹیکسی ڈرائیور بے گناہ تھا اسکا کوئی قصور نہیں تھا، ٹیکسی ڈرائیور کو ملزم نے ہائیر نہیں کیا تھا۔
وزیر داخلہ رانا ثنا اللہ نے کہا کہ ملزم کرم ایجنسی سے چلے اور راولپنڈی میں ٹھہرے، ہینڈلرز کو بھی پکڑ لیا گیا ہے، ہم نے چار پانچ لوگوں کو راؤنڈ اپ کیا ہے۔