اسلام آباد: (خبریں ڈیجیٹل) مون سون کا نیا سپیل 31 جولائی تا 6 اگست جاری رہے گا، این ڈی ایم اے نے تمام متعلقہ اداروں کو اگلے سپیل میں بھی اربن فلڈنگ اور لینڈ سلائیڈنگ کے خدشہ پر الرٹ جاری کر دیا۔
این ڈی ایم اے نے بتایا کہ موسلادھار بارشوں سے دریاؤں میں پانی کے بہاؤ میں اضافہ ہو سکتا ہے، بارشوں اور فلڈنگ سے نشیبی علاقے زیر آب آنے کا امکان ہے، بھارتی ڈیمز پونگ اور تھین بھی مکمل طور پر بھر چکے ہیں جس کی وجہ سے بھارت دریائے راوی میں پانی چھوڑ سکتا ہے۔
این ڈی ایم اے نے متعلقہ اداروں کو ہدایت جاری کرتے ہوئے کہا ہے کہ دریاؤں اور بھارتی ڈیمز میں پانی کے اخراج کی نگرانی جاری رکھیں، تربیلا اور منگلا اپنی گنجائش سے 70 فیصد سے زائد بھر چکے ہیں، موجودہ بارشوں کی صورتحال پر نیشنل ایمرجنسیز آپریشن سنٹر کے اجلاس میں بریفنگ بھی دی گئی۔
دوسری جانب دریائے ستلج میں گنڈا سنگھ کے مقام پر پانی کا بہاؤ 60138 کیوسک ہے جبکہ دریائے راوی میں ہیڈ بلوکی کے مقام پر نچلے درجے کا سیلاب ہے، ہیڈ بلوکی میں پانی کی آمد 67845 جبکہ اخراج 42445 کیوسک ہے، ضلعی انتظامیہ کی جانب سے ہیڈ بلوکی اور تلوار پوسٹ کے مقام پر فلڈ ریلیف کیمپس قائم کیے گئے ہیں۔
