مسلم لیگ ن کے قائد نوازشریف اور سابق وزیراعظم شہبازشریف آج کوئٹہ روانہ ہوں گے جہاں ان کی بہت سے اہم سیاسی قائدین کی ملاقات ہوگی۔
مسلم لیگ (ن) کے قائد نوازشریف اور پارٹی صدر شہباز شریف آج کوئٹہ روانہ ہوں گے، جب کہ مریم نوازاور دیگر پارٹی رہنما بھی ہمراہ ہوں گے۔
ن لیگ کی ترجمان مریم اورنگزیب کا کہنا ہے کہ 21 اکتوبر کو وطن واپسی کے بعد نوازشریف پہلی بار بلوچستان جارہے ہیں، وہ صوبے کے اہم سیاسی قائدین سے اہم ملاقاتیں کریں گے، اور قائدن ن لیگ پارٹی کے اہم تنظیمی اجلاس کی صدارت کریں گے۔
دوسری جانب ذرائع کا کہنا ہے کہ پاکستان مسلم لیگ (ن) ایک بار پھر سے بلوچستان کی بڑی سیاسی جماعت بننے جارہی ہے، اور ن لیگ بلوچستان کے سینئر رہنما چوہدری نعیم کریم نے دعویٰ کیا ہے کہ بڑی سیاسی شخصیات ن میں شمولیت کا اعلان کریں گی۔
ذرائع کے مطابق مسلم لیگ ن میں شمولیت اختیار کرنے والے سابق صوبائی وزراء میں سردار عبدالرحمان کھیتران، محمد خان طور اتماخیل، محمد خان لہڑی، عبدالکریم نوشیروانی، نواب چنگیز مری، نور محمد دمڑ، عبدالغفور لہڑی، سردار مسعود لونی، ڈاکٹر ربابہ بلیدی، مجیب الرحمان محمد حسنی سمیت دیگر سابق وزراء شامل ہیں۔
سحر گل خلجی سمیت سینیئر سیاست دان اراکین اپنی باقاعدہ شمولیت کا اعلان کریں گے۔
