اتراکھنڈ میں 40 مزدورسرنگ کی کھدائی کے دوران ملبے تلے پھنس گئے تھے، تاہم 6 سے زائد گزر جانے کے باوجود تاحال امدادی کارروائی ہی شروع نہیں کی گئی، جب کہ مزدوروں کی امداد کے لیے جو مشینری بھیجی گئی تھی وہ بھی ناقص اور خراب نکلی۔
انسانی حقوق کی پامالیوں میں سب سے آگے اور چاند پر پہنچنے والا بھارت چھ دنوں سے سرنگ میں پھنسے چالیس مزدورں کی جان نہ بچا سکا، اور مودی حکومت کی بے حسی کھل کر دنیا کے سامنے آ گئی ہے۔
مودی کے ہندوستان میں انسانی جان سستی ہے، 11 نومبرکو اتراکھنڈ میں 40 مزدورسرنگ کی کھدائی کے دوران ملبے تلے پھنس گئے تھے، سرنگ میں پھنسے مزدوروں کی امداد کے لیے جومشینری بھیجی گئی وہ بھی ناقص اورخراب تھے، جس کے باعث ریسکیو کاروائیاں مزید تاخیر کا شکار ہوگئیں، انتظامیہ نے ریسکیو میں ناکامی کے بعد تھائی اور نارویجین کمپنیوں سے مدد طلب کرلی ہے۔
دوسری جانب عالمی میڈیا نے بھی مودی سرکار اور انتظامیہ کی کارکردگی اور بے حسی کو اپنی رپورٹس میں واضح کیا ہے۔ رائیٹرز نے خبر دی کہ سرنگ کی کھدائی کے دوران لینڈ سلائیڈنگ کے باعث 40 مزدور ملبے کے نیچے دب گئے۔
الجزیرہ کی رپورٹ کے مطابق 6 دن سے بھی زیادہ گزر گئے لیکن ابھی تک امدادی کاروائیاں کامیاب نہ ہوسکیں، اور سرنگ میں پھنسے مزدوروں کی صورتحال نہایت سنگین ہوگئی۔
بزنس ریکارڈر کے مطابق سرنگ میں پھنسے 40 مزدور ادویات اور کھانے پینے کی اشیاء سے محروم ہیں۔ دی وائر کی رپورٹ میں کہا گیا ہے کہ مودی سرکاراورہندوستانی میڈیا غریب مزدوروں کی حالت زار پر خاموش ہے۔ اور اشوک سوئین کا کہنا ہے کہ 40 مزدوروں کو سرنگ میں پھنسے 6 دن گزر گئے لیکن ہندوستان خاموش ہے۔
دووسری جانب سرنگ کے باہر مزدوروں اور مقامی لوگوں نے وسیع پیمانے پر مودی سرکار کے خلاف احتجاج شروع کردیا ہے، مظاہرین کا کہنا ہے کہ انتظامیہ جان بوجھ کر ریسکیو کاروائیوں میں سستی دکھا رہی ہے۔
واضح رہے کہ سلکیارا اوردند لگاؤں کو جوڑنے کے لیے 4.5 کلومیٹر کی سرنگ بنائی جا رہی تھی، اور ماہرین نے لینڈ سلائیڈنگ کے خطرات کے بارے میں مودی سرکار کو پہلے ہی خبردار کیا تھا۔
رپورٹس کے مطابق بھارت میں تعمیرات کے بڑے منصوبوں کے دوران حادثات عام ہیں، جنوری 2023 کو اتراکھنڈ میں سیلاب میں 200 سے زائد افراد اپنی جان سے ہاتھ دھو بیٹھے تھے۔
عرب نیوز کے مطابق ماہرین نے بھارت میں سیلاب اور حادثے کی وجہ غیر ضروری تعمیرات بتائی ہیں، جولائی 2023 کومہاراشٹرا میں 27 افراد لینڈ سلائیڈنگ کے باعث ہلاک ہوگئے۔
