بھارت اور آسٹریلیا کے درمیان فائنل ٹاکرا آج احمد آباد کے نریندر مودی اسٹیڈیم میں ہوگا۔
آسٹریلیا ورلڈ کپ کی تاریخ کی سب سے مضبوط ٹیم ہے، جو آٹھویں مرتبہ ورلڈکپ کا فائنل کھیل رہی ہے، پانچ مرتبہ ٹائٹل اپنے نام کیا اور تین مرتبہ ٹورنامنٹ میں رنر اپ رہی، بھارت دو مرتبہ عالمی چیمپیئن رہ چکی ہے۔
بھارت میں جاری ورلڈکپ میں پانچ بار کے چیمپیئن آسٹریلیا کا آغاز اچھا نہ تھا، ابتدائی دو میچز میں آسٹریلیا کو میزبان بھارت اور پھر جنوبی افریقہ سے شکست ہوئی۔
پاکستان کیخلاف تیسرا میچ ہوا تو آسٹریلیا ردھم میں آگیا، یہاں سے آسٹریلوی ٹیم کا جیت کا سفر شروع ہوا، تو پھر نہ تھما، آٹھ مسلسل کامیابیاں حاصل کرکے آسٹریلیا فائنل میں پہنچ گیا۔ آسٹریلیا نے سیمی فائنل میں جنوبی افریقا کو زیر کرکے آٹھویں بار فائنل کھیلنے کا اعزاز حاصل کیا ہے
آسٹریلیا نے 1987، 1999، 2003، 2007 اور 2015 میں میگا ایونٹ جیت کر کرکٹ پر حکمرانی کا قائم کی ہے، جبکہ 2003 کے ورلڈ کپ فائنل میں آسٹریلیا نے بھارت کو دھول چٹا کر عالمی کپ کا تاج اپنے سر پر سجایا تھا۔
واضح ہے کہ آج احمد آباد میں ہونے والے فائنل میں ایک بار پھر میزبان بھارت اور آسٹریلیا مدمقابل ہونگے، اس بار فاتح کون رہے گا۔ اس کا فیصلہ میدان میں ہوگا۔
