ڈیوس: (ویب ڈیسک) پاکستانی وزیر خارجہ بلاول بھٹو زرداری نے فن لینڈ کے وزیر خارجہ پیکا ہاوسٹو سے ڈیوس، سوئٹزر لینڈ میں ملاقات کی۔
پاکستانی وزیر خارجہ بلاول بھٹو زرداری اور فن لینڈ کے وزیر خارجہ پیکا ہاوسٹو سے ورلڈ اکنامک فورم کے موقع پر ملاقات کی، دونوں ملکوں کے وزرائے خارجہ میں باہمی دلچسپی کے امور پر تبادلہ خیال کیا گیا۔
بلاول بھٹو زرداری نے جنیوا کانفرنس میں پاکستان کے ساتھ تعاون پر فن لینڈ کے وزیر خارجہ پیکا ہاوسٹو کا شکریہ ادا کیا، انہوں نے پاکستان اور فن لینڈ کے درمیان تجارت، توانائی اور تعلیم میں تعلقات کو مزید بڑھانے کا عزم کا اعادہ کیا۔

اسلام آباد: (ویب ڈیسک) وزیر خزانہ اسحاق ڈار نے کہا ہے کہ متحدہ عرب امارات نے 2 ارب ڈالر ڈیپازٹس رول اوور کر دیئے ہیں۔
سماجی رابطے کی ویب سائٹ ٹوئٹر پر اپنے بیان میں وزیر خزانہ اسحاق ڈار نے کہا کہ وزیر اعظم شہباز شریف نے اپنے دورہ یو اے ای کے دوران 2 ارب ڈالر رول اوور کرنے کا کہا تھا، اسحاق ڈار نے پاکستان متحدہ عرب امارات دوستی زندہ باد کا نعرہ بھی لگایا۔

ڈیووس: (ویب ڈیسک) پاکستانی آموں کو پوری دنیا میں پسند کیا جاتا ہے یہی وجہ ہے کہ اب لکسمبرگ کے وزیر اعظم کو بھی پاکستانی آموں سے پیار ہوگیا۔
ہوا کچھ یوں کہ وزیر خارجہ بلاول بھٹو زرداری نے سوئٹزرلینڈ کے شہر ڈیووس میں لکسمبرگ کے وزیر اعظم زیویر بیٹل سے ملاقات کی اس دوران انہوں نے ان سے پاکستانی آموں کے حوالے سے پوچھا۔
بلاول نے سوشل میڈیا پر لکسمبرگ کے وزیر اعظم کے ساتھ ایک ویڈیوجاری کی جس میں بلاول نے ان سے پوچھا کہ کچھ عرصے پہلے پاکستانی آم لکسمبرگ بھیجے تھے ، وزیراعظم آپ پاکستانی آموں کے بارے میں کیا کہیں گے؟
بلاول کے سوال پر لکسمبرگ کے وزیر اعظم نے کہا کہ آپ کو اس کا جواب پہلے سے معلوم ہے، وہ آم بہترین تھے، کافی پسند آئے ۔
زیویر بیٹل نے کہا کہ بلاول مجھے لکسمبرگ میں ان آموں کا سفیر بنانا چاہتے ہیں، انہوں نے آم بھیجنے پر بلاول کا شکریہ ادا کرتے ہوئے اس امید کا اظہار کیا کہ اگلی بار بھی آم بھیجے جائیں گے۔

کراچی: (ویب ڈیسک) امیر جماعت اسلامی کراچی حافظ نعیم الرحمان نے کہا ہے کہ جماعت اسلامی شہر کی سب سے بڑی جماعت ہے، حلف اٹھانے سے قبل گلی، محلوں میں عوام کا شکریہ ادا کرنے جائیں گے۔
امیر جماعت اسلامی کراچی نے نیوز کانفرنس کرتے ہوئے کہا کہ نشستوں اور ووٹوں کے اعتبار سے جماعت اسلامی شہر کی سب سے بڑی جماعت ہے، جماعت اسلامی مسائل کے حل کے لیے عوامی رابطہ مہم شروع کر رہی ہے، ہم حلف اٹھانے سے قبل گلی، محلوں میں عوام کا شکریہ ادا کرنے جائیں گے۔
انہوں نے کہا کہ جمعہ 20 جنوری کو سراج الحق کراچی آ رہے ہیں، جمعہ 20 جنوری کو یوم تشکر منائیں گے، جماعت اسلامی ہی کراچی میں اپنا مئیر لائے گی۔
حافظ نعیم الرحمان کا کہنا تھا کہ جماعت اسلامی شہر میں اسی طرح خدمت کرے گی جیسے نعمت اللہ خان نے کی تھی۔

جنیوا: (ویب ڈیسک) وزیر خارجہ بلاول بھٹو زرداری نے ورلڈ اکنامک فورم کے موقع پر سعودی وزیر خارجہ شہزادہ فیصل بن فرحان السعود سے ملاقات کی۔
پاکستانی وزیر خارجہ بلاول بھٹو زرداری کا کہنا تھا کہ سعودی عرب اور پاکستان کے تاریخی اور گہرے برادرانہ تعلقات کی توثیق کرتے ہیں، اپنے بھائی شہزادہ فیصل بن فرحان السعود سے ملاقات کر کے بے حد خوشی ہوئی۔
بلاول بھٹو زرداری نے پاکستان کی دیرینہ حمایت کرنے پر سعودی عرب کے ساتھ اظہار تشکر کیا، اس موقع پر انہوں نے پاکستان اور سعودی عرب کے درمیان تمام شعبوں میں تعاون کو مزید گہرا کرنے کے عزم کا اعادہ کیا۔