کراچی: (ویب ڈیسک) پاکستانی اداکار فیروز خان نے اپنے خلاف ٹوئٹس کرنے پر متعدد شوبز شخصیات کو قانونی نوٹس بھجواتے ہوئے 15 دن میں تحریری معافی مانگنے کا مطالبہ کیا ہے۔
جس کی تصدیق فیروز خان نے ٹوئٹ کے ذریعے کی، انہوں نے لکھا کہ ان تمام شخصیات کو قانونی نوٹس بھیج دیا ہے، جنہوں نے ان کے خلاف سوشل میڈیا پر جھوٹی مہم چلائی۔
فیروز خان کے وکیل فائق علی جاگیرانی نے بھی ایک ویڈیو کے زریعے تصدیق کی، اور کہا کہ انہوں نے اداکار کی ہدایت پر متعدد شوبز شخصیات کوفیروز خان کو بدنام کرنے کا قانونی نوٹس بھیج دیا ہے۔
اس فہرست میں ان کی سابق اہلیہ علیزے فاطمہ، آسکر ایوارڈ یافتہ ہدایت کارہ و پروڈیوسر شرمین عبید چنائے، گلوکار عاصم اظہر، اداکار خالد عثمان بٹ، ثروت گیلانی، ہدایت کار مصدق ملک، اداکارہ ایمن خان، منال خان اور اداکارہ میرا سیٹھی کے نام شامل ہیں۔
اداکار کے وکیل کے مطابق قانونی نوٹس میں تمام شخصیات کو 15 دن کی مہلت دی گئی ہے، جس میں ان سے تحریری معافی مانگنے کا مطالبہ کیا گیا ہے، اگر وہ ایسا نہیں کرتے ہیں تو ان پر ہرجانے کا مقدمہ دائر کیا جائے گا۔
درخواست میں موقف اپنایا گیا ہے کہ مذکورہ شخصیات نے شواہد کے بغیر ہی ان کے مؤکل کے خلاف سوشل میڈیا پر جھوٹی مہم چلائی اور انہیں بدنام کیا۔
جبکہ وکیل نے یہ بھی دعوی کیا ہے کہ فیروز خان کے خلاف عدالت میں کوئی بھی گھریلو تشدد کا مقدمہ زیر سماعت نہیں ہے۔
واضح رہے فیروز خان اور علیزے فاطمہ نے شادی کے 4 سال بعد ستمبر 2022 میں راہیں جدا کر لی تھیں، اور ان کی اہلیہ نے ان پر گھریلو تشدد کا الزام لگا کر سوشل میڈیا پر تصاویر بھی شئیر کی تھیں۔
علیزے نے اپنی انسٹا پوسٹ میں لکھا تھا کہ انہیں اس رشتے میں بے وفائی اور بلیک میلنگ کا بھی سامنا کرنا پڑا، اور بہت سوچنے کے بعد میں اس نتیجے پر پہنچی ہوں کہ میں اپنی پوری زندگی اس خوفناک ماحول میں نہیں گزار سکتی، میں نہیں چاہتی کہ میرے بچے ایسے تشدد زدہ ماحول میں پرورش پائیں، میرے بچوں کی بھلائی کیلئے یہ فیصلہ اہم تھا۔ میں اپنے بچوں کو سکھاؤں گی کہ کوئی زخم اتنا گہرا نہیں ہوتا کہ بھر نہ سکے۔
جس کے بعد کئی نامور ستاروں نے فیروز خان کو سخت تنقید کا نشانہ بنایا، اور ان سے لاتعلقی کا اظہار بھی کیا۔ یاد رہے فہروز خان اور علیزے فاطمہ کے دو بچے ہیں، جو اس وقت والدہ کے پاس ہیں۔

مکہ مکرمہ: (ویب ڈیسک) معروف کورین ولاگر اور سوشل میڈیا اسٹار داؤد کِم نے مکہ المکرمہ میں عمرے کی سعادت حاصل کی ہے۔
کم داؤد نے انسٹاگرام پر اپنے روحانی سفر کی تصاویر شیئر کی ہیں اور ساتھ ہی ایک نہایت جذباتی کیپشن لکھا ہے۔
انہوں نے لکھا کہ اسلام نے ان کو زندگی کی اندھیری راہوں سے نکال کر روشنی کے راستے پر ڈال دیا ہے۔=
سوشل میڈیا سٹار نے انکشاف کیا کہ وہ اپنی زندگی میں روشنی کی تلاش کے لئے اکیلے مارے مارے پھر رہے تھے، میری زندگی تباہ ہوچکی تھی، اور میرے خیال میں مَیں دنیا کا بدقسمت ترین شخص تھا۔
انہوں نے لکھا کہ میں ہمیشہ کوشش کرتا تھا کہ اپنے سوالوں کا جواب ڈھونڈوں، اسلام نے مجھے میرے سب سوالوں کے جوابات دے دیئے ہیں اور میں خوش قسمت ہوں کہ اللہ نے مجھے اسلام کیلئے چن لیا ہے۔

ممبئی: (ویب ڈیسک) معروف بالی ووڈ سٹار پریانکا چوپڑا پاکستانی فلم جوائے لینڈ کی تعریف کرتے ہوئے کہا ہے کہ یہ فلم دیکھنا ضروری ہے۔
سماجی رابطے کی ویب سائٹ ٹوئٹر پر اپنے ایک پیغام میں بالی ووڈ سٹار پریانکا چوپڑا نے جوائے لینڈ کو ایک مسرور کن فلم ہے قرار دیتے ہوئے کہا کہ فلم کی ٹیم کو مبارک باد جس نے ایسی کہانی کو زندہ کیا۔
اداکارہ کا کہنا تھا کہ اس فلم کو دیکھنا ضروری ہے، اپنے ٹوئٹر پیغام میں پریانکا چوپڑا نے فلم کے اداکار اور ٹیم ممبرز کو ٹیگ بھی کیا۔
خیال رہے کہ فلم جوائے لینڈ ایک خواجہ سرا کی زندگی پر بنائی گئی پاکستانی فلم جوائے لینڈ کو دنیا کے سب سے بڑے ایوارڈز آسکر ایوارڈ کے لئے شارٹ لسٹ کیا گیا ہے۔

نیویارک: (ویب ڈیسک) نوبل انعام یافتہ ملالہ یوسفزئی آسکرز کیلئے نامزد ہالی ووڈ فلم ’اسٹرینجر ایٹ دی گیٹ‘ کی شریک پروڈیوسر بن گئیں۔
آسکرز کیلئے نامزد پاکستانی فیچر فلم ’جوائے لینڈ‘ کے بعد ملالہ یوسفزئی کو امریکی دستاویزی فلم ’اسٹرینجر ایٹ دی گیٹ‘ کی ٹیم میں بطور ایگزیکٹیو پروڈیوسر شامل کر لیا گیا ہے۔
اس شارٹ ڈاکیومنٹری کی کہانی ایک ایسے امریکی میرین افسر پر مبنی ہے جومسلمانوں کی عبادت گاہ مسجد کو بم سے اُڑانے کا منصوبہ بناتا ہے تاہم اس منصوبہ بندی کے دوران کئی مرتبہ مسجد جانے اور مسلمانوں سے متاثر ہو کر اس کا دل بدل جاتا ہے اور وہ مسجد کو بم سے اُڑانے کے بجائے اسلام قبول کر کے مسلمان ہوجاتا ہے۔
غیر ملکی میڈیا کو دیئے ایک انٹرویو میں ملالہ کا کہنا تھا کہ جب انہوں نے یہ فلم دیکھی تو ان کا نظریہ ہی بدل گیا یہ فلم ایک مضبوط سچی کہانی پر مبنی ہے۔
ملالہ کا کہنا تھا کہ انہیں امید ہے یہ فلم ناظرین کو چیلنج کرے گی کہ وہ اپنے مفروضوں پر سوال اُٹھائیں اور ہر اس شخص کے ساتھ رحم دلی کا مظاہرہ کریں جس سے وہ ملتے ہیں۔
اپنی ٹوئٹ میں ملالہ نے لکھا کہ ’جب میں نے پہلی بار یہ فلم دیکھی تو اس نے میرا ذہن کھول دیا اور میرا نقطہ نظر بدل دیا، مجھے امریکی ہدایتکار جوشوا سیفٹیل کی ’اسٹرینجر ایٹ دی گیٹ‘ کی حمایت کرنے پر فخر ہے، یہ نجات کے بارے میں ایک طاقتور اور سچی کہانی ہے‘۔
یاد رہے کہ امریکی میرین افسر رچرڈ میک کینی اب مذکورہ مسجد کے صدر ہیں اور عبادت میں مشغول رہتے ہیں۔