کوئٹہ: (ویب ڈیسک) چیف آف آرمی اسٹاف عاصم منیر نے دورہ خضدار کے موقع پر بلوچستان کو غیر مستحکم کرنے کی کوششوں کو ناکام بنانے کے لیے بہترین آپریشنل تیاری پر زور دیا۔
پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف جنرل سید عاصم منیر نے بلوچستان کے علاقوں خضدار اور بسیمہ کا دورہ کیا، اس موقع پر آرمی چیف کو سیکیورٹی کی موجودہ صورتحال اور فارمیشن کی آپریشنل تیاریوں پر بریفنگ دی گئی اور پرامن اور محفوظ ماحول یقینی بنانے کے لیے اٹھائے جانے والے اقدامات سے آگاہ کیا گیا۔
آرمی چیف جنرل سید عاصم منیر کے بلوچستان پہنچنے پر کور کمانڈر کوئٹہ لیفٹیننٹ جنرل آصف غفور نے پرتپاک استقبال کیا۔
آئی ایس پی آر کا کہنا تھا کہ آرمی چیف نے بلوچستان کو غیر مستحکم کرنے کی کوششوں کو ناکام بنانے کے لیے بہترین آپریشنل تیاری پر زور دیا۔
جنرل سید عاصم منیر نے بلوچستان میں فوجیوں کے ساتھ بات چیت کرتے ہوئے کہا کہ بیرونی دشمنوں کے بلوچستان میں پرامن ماحول کو خراب کرنے کے مذموم عزائم سے آگاہ ہیں، اسی لیے صوبے میں فوج کی تعیناتی اور آپریشنز پر توجہ مرکوز کی جا رہی ہے ۔
آئی ایس پی آر کے مطابق اس موقع پر آرمی چیف کا کہنا تھا کہ بلوچستان میں سماجی و اقتصادی ترقی کے لیے سازگار ماحول فراہم کریں گے۔

اسلام آباد: (ویب ڈیسک) وزیر داخلہ رانا ثنا للہ نے کہا ہے کہ اسپیکر نے پی ٹی آئی کے اُن اراکین قومی اسمبلی کے استعفے منظور کیے جو بڑے لیڈر بننے کی کوشش کرتے ہیں۔
اسپیکر قومی اسمبلی کی جانب سے استعفوں کی منظوری اور الیکشن کمیشن کے پی ٹی آئی اراکین کو ڈی نوٹیفائی پر ردعمل دیتے ہوئے وزیرداخلہ نے پی ٹی آئی اراکین کو بیان حلفی جمع کرانے کی پیش کش کی۔
انہوں نے کہا کہ پی ٹی آئی کے اراکین اگر سمجھتے ہیں کہ اُن کے ساتھ زیادتی ہوئی ہے تو وہ بیان حلفی جمع کرادیں اور بتائیں کہ وہ استعفے دینے کے خواہش مند نہیں تھے۔
رانا ثنا اللہ نے کہا کہ جو لوگ اپنے منہ سے بڑی باتیں کرتےہیں ان کو اپنی باتوں پر دھیان دینا چاہیے، جو بڑے لیڈر بنتے ہیں ان کے بارے میں اسپیکرنے فیصلہ کیا ہے، جن ارکان کےاستعفےمنظورنہیں ہوئے وہ واپس آئیں ہم انہیں خوش آمدید کہیں گے۔
واضح رہے کہ اسپیکر قومی اسمبلی راجہ پرویز اشرف نے اسد عمر، پرویز خٹک، مراد سعید سمیت پی ٹی آئی کے 35 اراکین کے استعفے منظور کر کے نوٹی فکیشن جاری کیا ہے جس کے بعد الیکشن کمیشن نے بھی مذکورہ اراکین کو ڈی نوٹی فائی کردیا۔

کوئٹہ: (ویب ڈیسک) ضلع بولان میں تخریب کاروں نے 12 انچ قطر کی ہائی ٹرانسمیشن گیس پائپ لائن کو دھماکہ خیز مواد سے اڑا دیا۔
سوئی سدرن گیس کمپنی ذرائع کے مطابق گیس پائپ لائن کو دھاڈر اور گوکرت کے درمیانی علاقے سراج آباد کے قریب نشانہ بنایا گیا ہے، گیس پائپ لائن اڑائے جانے سے کوئٹہ، قلات، زیارت اور گرد و نواح میں گیس کی فراہمی متاثر ہوئی۔
ایس ایس جی سی ذرائع کا کہنا ہے کہ متاثرہ علاقوں کو گیس متبادل ذرائع سے فراہم کی جائے گی، سکیورٹی ملتے ہی متاثرہ پائپ لائن کی مرمت کا کام شروع کیا جائے گا۔

کوئٹہ: (ویب ڈیسک) بلوچستان میں ممکنہ بارش اور برفباری کے پیش نظر محکمہ پی ڈی ایم اے نے الرٹ جاری کر دیا، تمام مشینری قومی شاہراہوں پر پہنچا دی گئی۔
صوبائی وزیر پی ڈی ایم اے میر ضیاء لانگو نے کہا کہ ممکنہ بارشوں اور برفباری کے باعث طغیانی کے خدشے کے پیش نظر ٹیمیں ہائی الرٹ رہیں، متوقع بارش اور برفباری کے موقع پر کسی قسم کی کوتاہی برداشت نہیں کی جائیگی، پاک فوج، محکمہ صحت، موٹر وے پولیس، تمام اضلاع کی انتظامیہ آن بورڈ ہے۔
ڈائریکٹر پی ڈی ایم اے نصیر ناصر نے بتایا کہ متوقع بارشوں اور برفباری سے متاثرہ علاقوں میں مشینری اور ریسکیو عملہ موجود ہے، شاہراہوں کی ممکنہ بندش اور ہنگامی صورتحال کو مد نظر رکھتے ہوئے زیارت کے تمام سرکاری ریسٹ ہاؤسز کو خالی کرانے کے لئے احکامات جاری کر دیئے ہیں، تمام تر انتظامات مکمل اور قومی شاہراہوں پر ٹریفک بحال رکھنے ٹیمیں تشکیل دیدی گئی ہیں۔
ڈائریکٹر پی ڈی ایم اے عطاء اللہ مینگل نے کہا کہ کان مہترزئی میں پی ڈی ایم اے ویلیج فعال اور گرم ملبوسات پہنچا دیئے گئے ہیں، پی ڈی ایم اے کنٹرول روم فعال اور تمام اضلاع کے ڈپٹی کمشنرز سے مکمل رابطے میں ہیں، شہری آئندہ 2 روز تک غیر ضروری سفر سے گریز کریں۔