کراچی: (ویب ڈیسک) ایم کیو ایم کے مطالبات اور سندھ حکومت کے خطوط کے باوجود آج کراچی اور حیدرآباد کے 16 اضلاع میں بلدیاتی انتخابات شیڈول کے مطابق ہوں گے۔
بلدیاتی انتخابات کے لیے پولنگ صبح 8 بجے شروع ہوگی جو بغیر کسی وقفے کے شام 5 بجے تک جاری رہے گی، ہفتے کو شہر کے تمام اضلاع میں قائم ڈسپیج سینٹر سے پولنگ میٹریل کی تقسیم میں تاخیر دیکھی گئی، کئی مقامات پر پریزائیڈنگ افسران بھی دیر سے پہنچے، بیلٹ باکس، بیلٹ پیپر، انک اور دیگر سامان شام تک تقسیم کیا جاتا رہا۔
کراچی کے 7 اضلاع میں 23 امیدواروں کے انتقال اور 6 امیدواروں کے بلامقابلہ منتخب ہونے کی وجہ سے چئیرمین وائس چیئرمین اوروارڈ ممبر کی 1230 میں سے 1200 نشستوں پر پولنگ ہوگی، حیدرآباد ڈویژن میں 410 اور ٹھٹھہ ڈویژن میں بھی 310 امیدوار بلامقابلہ منتخب ہوچکے ہیں اور 27 امیدواروں کا انتقال ہو چکا ہے، جس کے بعد حیدرآباد ڈویژن کے اضلاع میں 1675 اور ٹھٹھہ ڈویژن کے اضلاع میں تمام کیٹگریز کی 709 نشستوں پر انتخابات ہوں گے، مجموعی طور پر 17862 امیدوار ایک دوسرے کے مدمقابل ہوں گے جن میں سے 9057 امیدواروں کا تعلق کراچی، 6228 حیدرآباد اور 2577 کا تعلق ٹھٹھہ ڈویژن سے ہے۔
کراچی میں ووٹرز کی تعداد 84 لاکھ 5 ہزار 475 ہے جن کے لیے 4990 پولنگ اسٹیشنز بنائے گئے ہیں، ان میں سے 3415 حساس، 1496 انتہائی حساس اور 79 کو نارمل قرار دیا گیا ہے جبکہ کراچی ڈویژن کے 7 اضلاع کو 25 ٹاؤنز میں تقسیم کیا گیا ہے۔
ضلع وسطی 5 ٹاؤن اور 45 یونین کمیٹیوں کے ساتھ سب سے بڑا ضلع ہے، جہاں رجسٹرڈ ووٹوں کی تعداد 20 لاکھ 76 ہزار 73 ہے۔ ضلع شرقی 5 ٹائون اور 43 یونین کمیٹیوں اور 14 لاکھ 54 ہزار 415 ووٹرز کے ساتھ دوسرا بڑا ضلع ہے۔
کورنگی میں 4 ٹائون اور 37 یونین کمیٹیاں بنائی گئی ہیں جہاں 14 لاکھ 52 ہزار 722 ووٹرز ہیں۔ ضلع غربی 3 ٹاؤن اور 33 یونین کمیٹیوں پر مشتمل ہیں جہاں 9 لاکھ 9 ہزار 187 ووٹرز رجسٹرڈ ہیں۔ ضلع کیماڑی میں 3 ٹاؤن، 32 یونین کمیٹیاں ہیں جہاں رجسٹرڈ ووٹرز کی تعداد 8 لاکھ 44 ہزار 851 ہے۔
اسی طرح ضلع ملیر میں 3 ٹاؤن، 30 یونین کمیٹیاں اور 7 لاکھ 43 ہزار 205 ووٹرز ہیں جبکہ ضلع جنوبی میں 2 ٹاؤن، 26 یونین کمیٹیاں اور 9 لاکھ 95 ہزار 54 ووٹرز ہیں۔
اعداد و شمار کے مطابق ملیر میں 1040، کورنگی میں 1450، شرقی میں 1579، جنوبی میں 876، غربی میں 1144، وسطی میں 1781 اور ضلع کیماڑی میں 1258 امیدوار بلدیاتی انتخاب میں مدمقابل ہیں۔

کراچی: (ویب ڈیسک) صدر مملکت ڈاکٹر عارف علوی نے کہا ہے کہ پاکستان کی موجودہ مالی مشکلات پر قابو پانے کا واحد حل واضح مینڈیٹ کی حامل حکومت ہے، تمام سٹیک ہولڈرز باہمی تعاون اور اتحاد کا مظاہرہ کریں اور ملک کو موجودہ مالیاتی صورتحال سے نکالنے کیلئے بھرپور کوششیں کریں۔
کراچی میں منعقدہ چوتھی فنانشل کرائم سمٹ سے خطاب کرتے ہوئے صدر مملکت نے کہا کہ ہم نے ماضی سے سبق نہیں سیکھا اور دیگر ممالک معاشی ترقی کے حوالے سے پاکستان سے آگے نکل گئے ہیں، موجودہ مالیاتی صورتحال پر قابو پانے کیلئے سیاسی تعاون کی ضرورت ہے، انہوں نے شام کے وقت بازاروں کو بند کر کے توانائی کے تحفظ کے حکومتی ویژن کی حمایت کا بھی اظہار کیا۔
صدر نے مزید کہا کہ انسان کا ضمیر جرائم کے خلاف سب سے بڑی رکاوٹ ہے اور اسلام سمیت مختلف مذاہب نے خود احتسابی کے جذبے کو ابھارنے کی کوشش کی ہے، مالیاتی جرائم پر قابو پانے کیلئے سماجی سطح پر مضبوط قوانین کا نفاذ، ان پر عمل درآمد کو یقینی بنانا، بدعنوان عناصر کو پکڑنا، مناسب سزائیں دینا اور بدعنوانی کی حوصلہ شکنی کرنا ضروری ہے۔
ڈاکٹر عارف علوی نے مزید کہا کہ قائد اعظم نے برصغیر پاک و ہند کے مسلم اشرافیہ میں پھیلی بدعنوانی کو بھی اجاگر کیا تھا، پاکستان کو اخلاقیات اور بانی پاکستان کے اقوال پر مبنی ملک بنانے کیلئے اجتماعی کوششوں کی ضرورت ہے، لوٹ مار اور کرپشن نے پاکستان کو مفلوج کر دیا ہے اور اب ہم امداد اور قرضوں پر انحصار کر رہے ہیں۔
انہوں نے کہا کہ بدعنوانی پوری دنیا میں پھیلی ہوئی ہے اور یہ صرف ترقی پذیر ممالک کا مسئلہ نہیں ہے اور مالیاتی قوانین اور نظاموں سے خامیوں کو ختم کرکے اس پر قابو پانے کی ضرورت ہے، نیب ترمیمی بل پر دستخط نہیں کیے کیونکہ وہ سمجھتے ہیں کہ یہ احتساب، انصاف کی روح کے خلاف ہے، دنیا بھر میں مالیاتی جرائم کے نئے قوانین کے تحت ملزم اور اثاثوں کے مالک کو منی ٹریل فراہم کرنا ہوتی ہے۔
صدر نے مزید کہا کہ عالمی نظام اخلاقیات اور بین الاقوامی قوانین کی بجائے مفادات پر مبنی ہے کیونکہ بھارت کو انسانی حقوق کی خلاف ورزیوں اور اقلیتوں بالخصوص بھارت کے مسلمانوں کے ساتھ ساتھ بھارت کے غیر قانونی طور پر مقبوضہ جموں و کشمیر میں مظالم کی اجازت دی جا رہی ہے، پاکستان نے جموں و کشمیر تنازعہ کے حل کیلئے ورلڈ آرڈر اور عالمی اداروں پر اعتماد کیا اور شاید یہ اعتماد غلطی تھی۔

لاہور: (ویب ڈیسک) پنجاب اسمبلی کی تحلیل کے بعد نگران وزیراعلیٰ کی تقرری کے معاملے پرگورنر نے وزیراعلیٰ اور قائد حزب اختلاف کو مراسلہ جاری کردیا۔
گورنر پنجاب بلیغ الرحمان کی جانب سے وزیراعلیٰ پنجاب چوہدری پرویز الہٰی اور قائد حزب اختلاف حمزہ شہباز کو بھیجے گئے مراسلے میں نگران وزیر اعلیٰ کے لیے متفقہ نام طلب کیا گیا ہے۔
مراسلے میں گورنر نےکہا ہےکہ نگران وزیر اعلیٰ کا نام 17 جنوری رات 10 بج کر 10منٹ تک دے دیا جائے۔
خیال رہے کہ گورنر پنجاب بلیغ الرحمان کی جانب سے سمری پر دستخط سے انکار کے بعد پنجاب اسمبلی از خود ٹوٹ گئی ہے۔
یاد رہے کہ 12 جنوری کو وزیر اعلیٰ پنجاب چوہدری پرویز الہٰی نے اسمبلی تحلیل کرنے کی سمری گورنر کو بھیجی تھی، آئین کے تحت گورنر پنجاب کو 48 گھنٹوں کے اندر سمری پر دستخط کرنے ہوتے ہیں۔
گورنر پنجاب اسمبلی توڑنے کے عمل کا حصہ نہیں بنے،گورنر پنجاب نے سمری پر دستخط کرنے سے انکار کرتے ہوئےکہا کہ ایسا کرنے سے آئینی عمل میں کسی قسم کی رکاوٹ کا اندیشہ نہیں، آئین و قانون میں وضاحت کےساتھ تمام معاملات کے آگے بڑھنےکا راستہ موجود ہے۔
ذرائع کا کہنا ہے کہ نگران وزیر اعلیٰ آنے تک پرویز الہٰی ہی وزیراعلیٰ کا عہدہ سنبھالیں گے۔

لاہور: (ویب ڈیسک) پاکستان تحریک انصاف کے مرکزی رہنما فرخ حبیب نے کہا ہے کہ ملک پر قابض چوروں کے ٹولے نے انتخابات رکوانے کیلئے ہر طرح کا حربہ استعمال کیا۔
سماجی رابطے کی ویب سائٹ ٹوئٹر پر اپنے بیان میں فرخ حبیب نے کہا کہ اب پنجاب اسمبلی تحلیل ہوچکی ہے اور صوبہ میں 90روز میں انتخابات کروانے آئینی پابندی ہے۔
سابق وزیر مملکت فرخ حبیب نے کہا کہ اب بھی موقع ہے ضد اور انا چھوڑ کر عام انتخابات کا اعلان کیا جائے تاکہ ملک میں جاری عدم استحکام کا خاتمہ ہو سکے۔